ბორჯღალოსნებისა და ბორდოს შერკინების შემკვრელი ბექა გორგაძე მიიჩნევს, რომ შოტლანდიასთან 23 ოქტომბერს გამართული მატჩი კარგი გაკვეთილი იყო “შემოდგომის ერთა თასის“ წინ.

“შოტლანდიის მატჩმა დაგვანახა რა გველოდება “შემოდგომის ერთა თასზე“ და რისთვის უნდა მოვემზადოთ. ეს განსაკუთრებით კონტაქტის არეალს ეხება. ასევე გამოჩნდა ისეთი ფაქტორები, რომლებზეც ვერ ვიმუშავეთ და სასწრაფოდ გამოსასწორებელი გვაქვს – შეტევითი და დაცვითი მოლი.

ამ თამაშმა დაგვანახა, რომ იმ სფეროში, რაშიც ადრე ძალიან მაგრები ვიყავით, ბევრი სამუშაო გვაქვს, რადგან უთამაშებლობა და უვარჯიშებლობა თავისას შვება.

რა თქმა უნდა ანგარიშით და თამაშის ხარისხით კმაყოფილები არ ვართ, მაგრამ ეს იყო უმნიშვნელოვანესი შეხვედრა შემდგომი პროგრესისთვის“, - თქვა მან.

24 წლის მორაგბის აზრით, ხანგრძლივი უთამაშებლობა როგორც ინდივიდუალურად მოთამაშეებზე, ასევე გუნდზე აისახა:

“თბილისში მყოფ მორაგბეებთან შედარებით, კლუბში რამდენიმე თამაშის ჩატარების საშუალება მომეცა, მაგრამ ეს საკმარისი არაა. შოტლანდიასთან მცირე ტრავმით ვითამაშე, კუნთი მქონდა გახეული და ამან სრულად დახარჯვის საშუალება არ მომცა.

ტრავმის შესახებ მხოლოდ კლუბში დაბრუნების შემდეგ გავიგე, ვიმკურნალე, უკვე სრული დატვირთვით ვვარჯიშობ და “შემოდგომის ერთა თასისთვის“ სრულ მზადყოფნაში ვიქნები.

სამწუხაროდ, როგორც მე, ასევე ზოგადად გუნდს, უთამაშებლობა დაეტყო. გუნდში რამენიმე ისეთი მორაგბე იყო, რომელთაც შარშანდელი მსოფლიო თასის შემდეგ არ უთამაშია, მაგალითად მერაბ შარიქაძეს, უმრავლესობამ კი, შოტლანდიამდე ბოლოს მარტის დასაწყისში, რაგბი ევროპის ჩემპიონატზე ითამაშა.

ასეთი ხანგრძლივი უმოქმედობის შემდეგ, ძალიან რთულია შოტლანდიის დონის მოწინააღმდეგესთან ტოლსწორად თამაში“.

ბექა გიორგაძე: კარგად ვიცით რა გველოდება “რვა ერზე“

გიორგაძემ შოტლანდიასთან მარცხი შეაფასა

ასევე იხილეთ

უახლესი ამბები