ფეხბურთი / ქართული ფეხბურთი /
ხვიჩა კვარაცხელია - "მთელი ჩემი ცხოვრებაა მადრიდის რეალის გულშემატკივარი ვარ"
09/03/2019 17:36
717

ზაფხულის სატრანსფერო ფანჯრის დროს ქართული ფეხბურთის ამომავალმა ვარსკვლავმა ხვიჩა კვარაცხელიამ კონტრაქტი ყაზანის რუბინთან გააფორმა.

ის გუნდში მყოფი 4 ქართველიდან ერთ-ერთია და კლუბის ლიდერადაც შეიძლება ჩავთვალოთ.

კვარაცხელია XXI საუკუნეში დაბადებული პირველი მოთამაშეა, რომელმაც რუსეთის პრემიერ ლიგაში გაიტანა. საინტერესოა, რომ ეს მან ლოკომოტივის შემადგენლობაში რუბინის წინააღმდეგ მოახერხა, რამდენიმე თვის შემდეგ კი ყველაფერი პირიქით მოხდა.

რუსულმა გამოცემა business-gazeta.ru-მ მასთან საკმაოდ ვრცელი ინტერვიუ ჩაწერა, რომლის ძირითად ნაწილს croco.ge გთავაზობთ.

ხვიჩა, რუსეთში ოჯახის გარეშე ცხოვრობთ. როგორ უმკლავდებით ამას 18 წლის ასაკში?

ძნელია და ეს განსაკუთრებულად რთული მაშინ იყო, "ლოკომოტივში" რომ გადავედი. მიჭირდა, სულ ოჯახში ვრეკავდი ტელეფონით. ყაზანში შედარებით ადვილია, რადგან პირველი ტალღა გადავიარე. თუ გსურს დიდი ფეხბურთი ითამაშო, მსგავს სირთულეებს უნდა გაუმკლავდე.

ალბათ, ხვდებოდით, რომ ოდესმე უცხო ქვეყანაში წასვლა მოგიწევდათ. ადრეული ასაკისთვის არ ემზადებოდით ამისთვის ფსიქოლოგიურად?

მსგავსი რამისთვის წინასწარ ვერ მოემზადები, სანამ ფაქტის წინაშე არ დადგები. პატარაობაში არ ვფიქრობდი, რომ ასე ადრე წავიდოდი უცხოეთში, მხოლოდ საკუთარი თამაშის გაუმჯობესება მსურდა.

არის რამე განსაკუთრებული, რაც რუსეთში ოჯახის გარდა გენატრებათ?

ხინკალი! ძალიან მიყვარს სახლში დამზადებული ხინკალი. თავიდან ძალიან ძნელი იყო მეგობრების და ნაცნობების გარეშე, ახლა შევეჩვიე.

ხინკალი ერთი - კიდევ?

ხინკლის გარდა, აჭარული ხაჭაპური ძალიან მომწონს.ყველას გირჩევთ, გასინჯოთ. მეგრელი ვარ და ჩვენი კუთხის ტრადიციული საჭმელი ელარჯია, ეს არის სიმინდის ფაფა სულგუნით. ძალიან გემრიელია, ვერც კი აღვწერ გემოს, თავად უნდა დააგემოვნოთ.

მოგვიყევი მშობლიური მიწის შესახებ...

ულამაზესი ადგილია, ჩემთვის ყველაზე კომფორტულიც. საქართველოში გავიზარდე, პატარაობიდანვე ეზოში, ქუჩაში მეგობრებთან ერთად დავრბოდი, მდინარეზე დავდიოდით. კურორტზე წასვლა არც კი მინდოდა, სადაც ვცხოვრობდი, იდეალურად ვისვენებდი.

შვებულება რომ მოგცეს კლუბმა და გითხრას, მსოფლიოს ნებისმიერ წერტილში დაისვენეო, საქართველოს აირჩევდი?

ყველა კურორტი კარგია, მაგრამ საქართველო ჩემთვის პირველია. თავისუფალ დროს ყოველთვის სამშობლოში ჩავალ.

ცდილობთ იპოვოთ საყვარელი საჭმელი ადგილობრივ რესტორნებში?

მოსკოვში კვერკველიასთან ერთად დავდიოდი ქართულ რესტორანში და თუ ყაზანში თავისუფალი დრო გვაქვს, ჩვენც მივდივართ, თუმცა საქართველოში დამზადებული სულ სხვანაირია.

ზაფხულის დასაწყისში ეროვნულ ნაკრებში პირველად გამოგიძახეს. როგორი გრძნობა იყო?

ძალიან მაგარი! კარგად დამხვდნენ და ნაკრების გამოცდილმა წევრებმა არც მაგრძნობინეს, 18 წლის რომ ვიყავი. ვიცი, რომ მაკვირდებოდნენ 15-16 წლიდან.

რუბინში ქართველებისთვის სპეციალური თარჯიმანიც არის. რაში გეხმარება ეს?

მისი ჩვენთან ყოფნით ბევრი რამ არ შეცვლილა. ამ ინტერვიუმდე თარჯიმანი არც მჭირდებოდა, რადგან ფეხბურთისთვის საჭირო ფრაზები უკვე ვიცი: ვესალმები პარტნიორებს, შემიძლია ვკითხო როგორ არიან. გუნდში ურთიერთობა ყველასთან შესანიშნავი მაქვს.

ტულას "არსენალთან" მატჩის შემდეგ ზურიკო დავითაშვილი რუს ჟურნალისტებს შეგვპირდა, რომ 1,5 თვეში ინტერვიუს ადგილობრივ ენაზე მოგვცემს. შენ როდის იქნები მზად?

ვცდილობ მალე, მასწავლებელთან ვემზადებით. რუსულად ძალიან ბევრი რამ მესმის, მაგრამ მწირი ლექსიკის გამო საუბარი მიჭირს.

რთული ენაა სასწავლად?

გრამატიკულად კი. საქართველოში ფეხბურთელების უმეტესობამ რუსული ენა იცის. ახალგაზრდებმა ინგლისური უფრო იციან.

საქართველოში რუსულს ასწავლიან?

დიახ, კვირაში 2-3-ჯერ სკოლაში რუსული ენის გაკვეთილები არის.

"რუბინს" 4 ქართველი ჰყავს. ამით თავს კომფორტულად გრძნობთ?

რა თქმა უნდა, ეს ოთხივეს გვეხმარება. ერთმანეთში ბევრს ვურთიერთობთ, ამას გარდა, ყველანი შემტევები ვართ და დარბაზში მსგავსი ტიპის ვარჯიშების ჩატარება გვიწევს, რაშიც ერთმანეთს ვეხმარებით. ზურიკო "რუბინში" ჩემი საუკეთესო მეგობარია, ერთად ძალიან დიდ დროს ვატარებთ.

18 წლიდან "რუბინის" ლიდერი გახდით. არ არის რთული ასეთი დონის შენარჩუნება?

ვერ ვიტყვი, რომ "რუბინის" ლიდერი ვარ. 18 წლის ვარ, მაგრამ ამას ყურადღებას საერთოდ არ ვაქცევ. მთავარია, რა ამოცანას მისახავს მწვრთნელი. თუ მენდობა და სათამაშო დროს მაძლევს, ამისთვის ყოველთვის დიდ მადლობას ვუხდი.

რომელი უფრო ძლიერი დრიბლიორია, შენ თუ ზურიკო?

ჰა-ჰა, თამამად ვიტყვი რომ ზურიკო.

ოჯახში გეხმარებოდნენ?

მამაჩემი ყოფილი ფეხბურთელია. ჩემთვის ის იდეალია, სწორედ მისი დახმარებით მივყვები დასახულ მიზანს.

ახალ კლუბებთან მოლაპარაკებების დროს რამდენად მნიშვნელოვანი იყო მისი აზრი?

მამა ყოველთვის საქმის კურსშია, თუმცა ამაში ყველაზე მეტად ჩემი აგენტი მამუკა ჯუღელი მეხმარება. ისინი მეგობრობენ და ვარიანტებს ყველანი ერთად განვიხილავთ.

გაგიგიათ ფრაზა: ქართველების გარეშე რუბინი არ არსებობს?

რა თქმა უნდა! მე ამ კლუბში გადმოსვლამდე აზრი ჩვენს ქვეყანაში ძალიან დაფასებულ რუბინის ყოფილ მოთამაშეებს ვკითხე. ჩვენ აგენტთან ერთად მათი აზრი ძალიან გვაინტერესებდა. ლაშა სალუქვაძემ და საბა კვირკველიამ გუნდი შესანიშნავად დამიხასიათეს და მითხრეს, რომ აქ ქართველებს ძალიან აფასებენ.

შენ თბილისში ცხოვრობდი, შემდეგ მოსკოვში და ყაზანში. შეგიძლია ეს ქალაქები დაგვიხასიათო?

რაღაც საერთო აქვთ, თუმცა ამაზე ნაკლებად ვფიქრობ. სამივე ქალაქი ძალიან ლამაზია, თუმცა ეს არ არის მთავარი, მე მხოლოდ ფეხბურთზე ვფიქრობ.

როგორ ერთობი თავისუფალ დროს?

ბიჭებთან ერთად ვარ, ყველასთან შესანიშნავი ურთიერთობა მაქვს. ვხუმრობთ, ვთამაშობთ კომპიუტერულ თამაშებს, როცა დრო გვაქვს სახინკლეშიც მივდივართ, თუმცა არა ფიზიკური დატვირთვების დროს.

რა თამაშებს ანიჭებ უპირატესობას?

FIFA-ს, ზურიკოსთან ერთად ნებისმიერს მოვუგებ!

რომელ გუნდს გულშემატკივრობ?

მთელი ჩემი ცხოვრებაა მადრიდის რეალის გულშემატკივარი ვარ.

რონალდუს გამო?

მე ის ძალიან მომწონს, თუმცა ყოველთვის აღმაფრთოვანებდა ხოსე მარია გუტი. მე ვუყურებდი მას და ვხვდებოდი, რამდენად ლამაზად თამაშობდა.

მესი თუ რონალდუ?

მესი უცხოპლანეტურ ფეხბურთს თამაშობს, ხოლო კრიშტიანო მომწონს, რადგან მან ყველაფერს საკუთარი შრომით მიაღწია.

მაინც რომელი?

ოჰ, ძალიან რთული არჩევანია. მე არ შემიძლია ერთის არჩევა.

რონალდუს ფანი ვარ, - ზურიკო დავითაშვილი ჩაერთო - თუმცა, რა თქმა უნდა მესი უკეთესია. ის - ღმერთია.

ლოკომოტივის გულშემატკივრებიდან ბევრი უარყოფითი სახის შეტყობინება მიიღე?

დიახ, გაუჩერებლად მწერდნენ. თუმცა მათი მესმის, რთულია გაუგო ფეხბურთელს, რომელიც შენი საყვარელი კლუბიდან მიდის.

ბევრი დაბლოკე?

არა, საერთოდ არავინ!

როგორ ფიქრობ, რა იქნება რუბინის მაქსიმუმი ამ სეზონში?

მე არ მინდა კონკრეტული ციფრის დასახელება, თუმცა გულშემატკივრებს ვპირდები, რომ რაც შეიძლება მაღალი ადგილის დასაკავებლად ყველაფერს გავაკეთებთ.

#Flashscore