ფეხბურთი / ქართული ფეხბურთი /
ტესტი უცნობ მეტოქესთან და გამარჯვების იმედი კარგად ნაცნობ დანიასთან
09/04/2019 14:28
1774

საქართველოს ეროვნული საფეხბურთო ნაკრები 5 და 9 სექტემბერს ორ მატჩს გამართავს. ეროვნული გუნდი მოახლოებული შეხვედრებისთვის სტამბოლში ემზდება.

დანიის წინააღმდეგ ევრო 2020-ის საკვალიფიკაციო ეტაპის შინ გასამართ შეხვედრამდე, ვლადიმირ ვაისის გუნდი სტამბოლში, ამხანაგურად სამხრეთ კორეას დაუპირისპირდება. 

მეტოქე, რომელსაც საქართველოს ნაკრები ისტორიაში პირველად ხვდება, ფიფას სანაკრებო რეიტინგში 37-ე პოზიციაზეა. კორეელებმა 2019 წელს 9 მატჩი გამართეს და მხოლოდ ერთხელ დამარცხდენ, შვიდ შეხვედრაში კი გამარჯვება იზეიმეს. კორეელთა მთავარი მწვრთნელი პორტუგალიელი პაულო ბენტუა, ხოლო გუნდის ლიდერი, ტოტენჰემის შემტევი ჰონ-მინ სონი გახლავთ. 

გაცილებით მდიდარია საქართველოსა და დანიის ნაკრებების ურთიერთშეხვედრების ისტორია. ეს გუნდები ერთმანეთს მეხუთედ დაუპირისპირდებიან და რაც არ უდნა სამწუხარო იყოს, საქართველოს ნაკრებს მსოფლიო რეიტინგში ამ დროისთვის მე-13 ადგილზე მყოფი გუნდი დამარცხებული არ ჰყავს. ორ ოფიციალურ საშინაო შეხვედრაში დანიელებმა დიდი ანგარიშით (6:1; 5:1) სძლიეს მეტოქეს, დანიაში 2013 წელს ჩატარებული ამხანაგური შეხვედრა კი 2:1 დასრულდა მასპინძელთა სასარგებლოდ.

დანიის ნაკრები თბილისში ერთხელ, 2004 წელსაა ნამყოფი და ის უხვგოლანი შეხვედრა, რომელშიც მასპნინძლები ორჯერ მარცხდებოდნენ, ფრედ, 2:2 დასრულდა. 

შემადგენლობა

სანაკრებო პაუზამდე ვლადიმირ ვაისის მიერ დასახელებულმა შემადგენლობამ გულშემატკივართა კრიტიკა დაიმსახურა. ერთ-ერთი მთავარი კითხვა ნაკრებში გიორგი ხარაიშვილის არყოფნას ეხება. შვედური გიოტებორგის ლიდერი, რომელმაც მიმდინარე სეზონში 5 გოლი გაიტანა და საგოლე გადაცემებითაც ლიდერია, ვაისმა მხოლოდ გაფართოებულ შემადგენლობაში დაასახელა. გაფართოებულ შემადგენლობაშია ლუკა ზარანდიაც, რომელმაც ვერც ბეგლიურ ვარეგემში გადასვლის შემდეგ დაიმსახურა ვაისის ყურადღება. 

გარკვეული პაუზის შემდეგ ნაკრებში მურთაზ დაუშვილი დაუბრუნდა, რომელმაც ახალი სეზონი თემურ ქეცბაიას ანორთოსისში დაიწყო. კვიპროსული კლუბიდან ნაკრებში გიორგი ლორია და თორნიკე ოქრიაშვილიც მოხვდნენ, ნიკა კაჭარავა კი ამჯერად სანაკრებო სიაში არ არის. 

სასიხარულოა ეროვნულ გუნდში ვაკო ყაზაიშვილის დაბრუნება. სან ხოსეს ფორვარდი ვლადიმირ ვაისმა წინა სანაკრებო შეკრებაზე არ გამოიძახა, რის შემდეგაც ქართველი შემტევი შესანიშნავად ათამაშდა და MLS-ის თვის საუკეთესო ფეხბურთელიც კი გახდა.

სანაკრებო მატჩებს კარგ ფორმაში ხვდებიან ვაკო გვილია და საბა ლობჟანიძე. ლეგიაში გადასვლის შემდეგ, გვილია ვარშაველთა ძირითადის უცვლელი წევრია და შედეგიანადაც ასპარეზობს, ლობჟანიზე კი დანიური რანდერსის გამოკვეთილი ლიდერია და გასულ ტურში საკუთარ გუნდს დუბლით მოაგებინა.

დანაკლისი

მნიშვნელოვანი მატჩების წინ საქართველოს ნაკრებს რამდენიმე წამყვანი ფეხბურთელი დააკლდება.

ტრავმის გამო ეროვნულ გუნდს ცენტრალური მცველები, დავით ხოჭოლავა და სოლომონ კვერკველია ვერ დაეხმარებიან. ნაკრების კაპიტანი, ჯაბა კანკავა კი დისკვალიფიკაციის გამო დანიასთან მატჩს გამოტოვებს. შემადგენლობაში არც ნიკა კვეკვესკირია, რომელსაც ასევე ტრავმა აწუხებს. ამიტომ, დანიელებთან თბილისურ მატჩში ნახევარდაცვის ცენტრის განახლებულ ვარიანტს ვიხილავთ. 

დებიუტანტები

საქართველოს ნაკრების შემადგენლობაში მოახლოებული მატჩებისთვის ორი დებიუტანტი ემზადება.

23 წლის ლევან შენგელია დინამო თბილისიდან რამდენიმე დღის წინ გადავიდა თურქულ კონიასპორში. ეროვნული ლიგის გამორჩეული მოთამაშე დინამოსთან ერთად ევროტურნირებზეც შედეგიანი იყო და 5 შეხვედრაში 3 გოლი გაიტანა. საქართველოს ჩემპიონატში კი ლევანმა მიმდინარე სეზონში 12 გოლი გაიტანა.

შენგელიასთან ერთად ნაკრებში პირველად არის 18 წლის ზურიკო დავითაშვილი, რომელმაც რუსული პრემიერ ლიგის მიმდინარე გათამაშებაში, რუბინთან ერთად 8 მატჩში მიიღო მონაწილეობა.

სამხრეთ კორეასთან 5 სექტემბერს, სტამბოლში გასამართი შეხვედრა თბილისის დროით 17:30-ზე დაიწყება, ხოლო საქართველოსა და დანიის ეროვნული გუნდების მატჩს, დინამო არენა 8 სექტემბერს, 20:00-ზე უმასპინძლებს.

ფოტოებ: სფფ-ს პრესსამსახური

#Flashscore