ფეხბურთი / ლა ლიგა /
16 წლის ტალანტი, რომელსაც ვიქტორ ვალდესმა ბუცები უყიდა
09/04/2019 16:14
5054

კატალონიის ბარსელონამ ახალი სეზონი ცუდად დაიწყო. ბილბაოსთან მარცხისა და ოსასუნასთან ფრის გამო, სადღეისოდ, ერნესტო ვალვერდეს გუნდი სატურნირო ცხრილის შუაშია. კატალონიელთა დაღმასვლა ლიონელ მესის, ლუის სუარესისა და უსმან დემბელეს ტრავმებმა გამოიწვია. შეტევის ხაზის გასაძლიერებლად, ვალვერდემ პირველ გუნდში 16 წლის ანსუ ფატი და 21 წლის კარლეს პერესი დააწინაურა.

პერესმა პირველ გუნდში გასულ სეზონშიც რამდენჯერმე ითამაშა, ფატი კი, ბარსა ბ-ში ამ ზაფხულს გადაიყვანეს. ივლისის ბოლოს, ფატიმ კლუბთან პროფესიონალური კონტრაქტი გააფორმა 2022 წლამდე. მისი გამოსასყიდი თანხა 100 მილიონი ევროა.

იმისათვის, რომ ფატის ბეტისის წინააღმდეგ ეთამაშა, ბარსელონას ფეხბურთელის მშობლებისგან ნებართვა დასჭირდა. ლა ლიგა არასრულწლოვანებს ღამით თამაშის უფლებას მხოლოდ იმ შემთხვევაში აძლევს, თუ მშობლები თანახმანი არიან. ცხადია, დედ-მამას უარი არ უთქვამთ.

78-ე წუთზე, ფატიმ პერესი შეცვალა და დანარჩენი უკვე ისტორიაა: ბოლო 78 წელიწადში, ფატი ბარსელონას ყველაზე ახალგაზრდა დებიუტანტია. მატჩის შემდეგ, ფატი ლეო მესიმ გაამხნევა და მოგვიანებით, მას “ინსტაგრამზე“ პოსტიც მიუძღვნა. ამის შემდეგ, ფატის გამომწერების რაოდენობა 20 ათასიდან 500 ათასამდე გაიზარდა.

ეს ლამაზი ამბავი ამით არ დასრულებულა. ბარსას ლიდერებმა გამოჯანმრთელება ვერც ოსასუნასთან მატჩისთვის მოასწრეს და ფატი კვლავ განაცხადში აღმოჩნდა. ანსუ მოედანზე მეორე ტაიმში გამოჩნდა და 51-ე წუთზე, პერესის ჩაწოდების შემდეგ გოლი ზუსტი თავურით გაიტანა. 16 წლისა და 304 დღის ასაკში, ის ბარსელონას ყველაზე ახალგაზრდა ფეხბურთელია, ვისაც ესპანეთის ჩემპიონატში გაუტანია.

ორიოდე კვირის წინ, ფატის ცხოვრება ჩვეულებრივი იყო: დილის 8 საათზე ადგა და ლა მასიაში ფეხით წავიდა. მწვრთნელებმა უთხრეს, რომ მთავარ გუნდთან ერთად უნდა ევარჯიშა. ანსუმ მამის ნომერი აკრიფა, მაგრამ მან არ უპასუხა, შემდეგ დედას დაურეკა და ხმამაღლა დაიყვირა: “დედა, პირველ გუნდში გამომიძახეს!“

ახლობლებმა იფიქრეს, რომ ეს ხუმრობა იყო, მაგრამ შემდეგ სიხარულისგან ატირდნენ. ისინი ვერც კი წარმოიდგენდნენ, რომ 5 დღის შემდეგ, ბიჭუნას “კამპ ნოუზე“ დებიუტი ექნებოდა.

“როცა ანსუ მინდორზე გავიდა, ვერ ვიჯერებდით, რომ ეს რეალობა იყო. სიხარულისგან მეცხრე ცაზე ვიყავით“, - იხსენებს ანსუს მამა, ბორი ფატი.

გვინეა-ბისაუდან ესპანეთამდე

ანსუ ფატი 2002 წელს გვინეა-ბისაუში დაიბადა. 6 წლის ასაკში, მისი ოჯახი ესპანეთის პატარა ქალაქ ერერაში გადაბარგდა, სადაც მოსახლეობა მხოლოდ 6000 ადამიანისგან შედგებოდა. ერერა სევილიადან 1 საათის სავალ გზაზეა. მამამისი გვინეა-ბისაუში ფეხბურთელი იყო, ესპანეთში კი, მუშაობა ნაგვის მცლელად დაიწყო. მოგვიანებით, ეს მერინალედის მერის მძღოლი გახდა.

ანსუ ადგილობრივ საფეხბურთო სკოლაში - სიერა სურში თამაშობდა. პირველივე წელს, მისმა გუნდმა ასაკობრივი კატეგორიის ჩემპიონატთან ერთად კიდევ 2 ტიტული მოიგო. გუნდის ლიდერები ტოპ კლუბებმა დაიტაცეს: ხესუს მარტინი მადრიდის რეალში წავიდა, ხავი გომესი და ანდრიან ვერდე - ატლეტიკოში. ფატი სევილიაში წავიდა და 11-წლამდელთა გუნდში თამაშობდა, მაგრამ იქ დიდ ხანს არ გაჩერებულა.

უარი რეალს, თანხმობა ბარსას

სევილიაში თამაშის დროს, ფატის ბარსელონასა და რეალის სკაუტები დაუკავშირდნენ. ხაზზე იყვნენ ბეტისი და სარაგოსაც. სევილიას ტალანტის შენარჩუნება უნდოდა, მაგრამ ეს რთული აღმოჩნდა.

“რეალმა ბარსელონაზე უკეთესი პირობები შემოგვთავაზა, მაგრამ კატალონიური გუნდი ავირჩიეთ. “ბლაუგრანა“ კონკრეტული წინადადებითა და კონტრაქტით მოვიდა. მათ ჩვენი დარწმუნება მოახერხეს. რეალი ბევრ ფულს გვთავაზობდა, მაგრამ ბარსელონადან ალბერტ პუჩი გვესტუმრა და გვითხრა, რომ კლუბის პროექტის თანახმად, ჩვენი ვაჟი რამდენიმე წელში პირველ გუნდში ითამაშებდა. ვერ წარმოვიდგენდით, თუ ანსუ ასეთი დონის ფეხბურთელებთან მოხვდებოდა“, - იხსენებს ტალანტის მამა.

ბარსელონასა და ანსუს შორის შეთანხმების შემდეგ, სევილიამ ფეხბურთელი გუნდიდან მოკვეთა.

ანსუ ფატი და ტაკეფუსა კუბო

ანსუ ბარსელონაში 2012 წელს, 10 წლის ასაკში ჩაირიცხა. კატალონიელებმა მისი ძმა ბრაიმიც დაიმატეს. ფატი ალევინ ა-ში ერთი წლით უფროსებთან თამაშობდა და მალევე, გუნდის საკვანძო ფეხბურთელი გახდა. სეზონის განმავლობაში, მწვრთნელმა ფატი ცენტრფორვარდის პოზიციიდან მარცხენა ფრთაზე გადაწია.

იმ გუნდში ნიჭიერი მეკარე არნაუ ტენასი თამაშობდა. ასევე იყო ერიკ გარსია, რომელიც დღეს მანჩესტერ სიტიშია. ანსუ ყველაზე კარგ ტანდემს იაპონელ ტაკეფუსა კუბოსთან ქმნიდა, რომელიც ახლახანს რეალმა იყიდა და მალიორკაში გაანათხოვრა. იმ სეზონში, ფატიმ 56 გოლი გაიტანა, კუბომ - 73.

2015 წელს, ფატიმ ესპანიოლთან კატალონიურ დერბიში სერიოზული ტრავმა მიიღო - ფეხი მოიტეხა.

ვალდესისგან ნაჩუქარი ბუცები

2 თვის წინ, ბარსელონას 19-წლამდელთა გუნდის მწვრთნელად ყოფილი მეკარე ვიქტორ ვალდესი დაინიშნა. მან ფატის გაცნობა გაიხსენა: “ვთხოვე, თავისი ბუცები მოეტანა. გავოგნდი, რადგან ისინი საშინლად გამოიყურებოდნენ და ანსუს ფეხს ტკენდნენ. მას ახალი არავინ უყიდა და ეს მე გავაკეთე. ანსუსთვის რამდენიმე წყვილი ბუცი შევიძინე“.

ანსუ ფატის პირველი მწვრთნელი პერეს მენია ამბობს, რომ გვინეაში ბიჭუნა ნაჭრის ბურთით თამაშობდა, რაც აფრიკისთვის ჩვეულებრივი ამბავია.

“ანსუს ენით აღუწერელი სახე ჰქონდა მაშინ, როცა ნამდვილი ბურთი მოსინჯა. მას ძალიან ძლიერი ხასიათი აქვს. ანსუს არავისი ეშინია“, - იხსენებს პერეს მენია.

***

ასე და ამგვარად, დღეს ანსუ ბარსელონას პირველი გუნდის ფეხბურთელია. “კამპ ნოუზე“ დებიუტის შემდეგ, ფატიმ “კამპ ნოუ“ ძმასთან ერთად მანქანით დატოვა, მისი მშობლები კი, დანარჩენ გულშემატკივრებთან ერთად შინ ტრამვაით დაბრუნდნენ.