სხვა / UFC /
UFC 242 - ჯოჯუას დებიუტი და ნურმაგომედოვი პორიეს წინააღმდეგ
09/04/2019 16:22
792

შერეული ორთაბრძლები აბუ-დაბიში 5-წლიანი პაუზის შემდეგ ბრუნდება. 

შაბათს, 7 სექტემბერს, UFC 242-ის მთავარ დაპირისპირებაში ხაბიბ ნურმაგომედოვი დასტინ პორიეს შეხვდება, ქართველი გულშემატკივრებისთვის კი განსაკუთრებით საინტერესო UFC-ში ლიანა ჯოჯუას პირველი ბრძოლა იქნება. 

წარუმატებელი მცდელობა

აბუ-დაბიში UFC-ის ბრძოლების ჩატარების პირველი მცდელობა 2010 წლით თარიღდება. კომპანია Flash Entertainment-მა, რომელიც არაბეთის გაერთიანებული საამიროების მთავრობას ეკუთვნის, UFC-ს აქციების 10 პროცენტი 200 მილიონ დოლარად იყიდა. ამავე წელს აბუ-დაბიში პირველად შედგა მსოფლიოს ყველაზე რეიტინგული ორგანიზაციის ივენთი - UFC 112. დროში სხვაობის გამო ღონისძიება აშშ-ში ორჯერ აჩვენეს. ჯერ პირდაპირ ეთერში, შემდეგ კი ამერიკელებისთვის უფრო მოსახერხებელ დროს. ტურნირი ხელოვნურ კუნძულ იასზე ჩატარდა, სადაც ღონისძიებისთვის ახალი სტადონი ააშენეს, რომელიც ბრძოლებიდან ერთ კვირაში დაანგრიეს.

აღსანიშნავია, რომ UFC 112 ორგანიზაციის პირველი ღონისძიება იყო, რომელიც ღია ცის ქვეშ ჩატარდა და საკმაოდ დიდი ინტერესიც გამოიწვია. ბილეთებიდან შემოსულმა თანხამ 3,5 მილიონი დოლარი შეადგინა, ხოლო მებრძოლებმა 50 ათასი დოლარის ნაცვლად 75 ათასი მიიღეს. მიუხედავად ამისა, UFC-მ და აბუ-დაბიმ 4-წლიანი პაუზა აიღეს.

2014 წლის დაბრუნება ნაკლებად ხმაურიანი გამოდგა. UFC Fight Night 39 The du Arena-ზე გაიმართა, რომელიც ძირითადად კონცერტებისთვისაა გათვლილი და 25 ათას მაყურებელს იტევს, თუმცა ღონისძიებაზე მხოლოდ 7963 ადამიანი მივიდა. ამით UFC-სა და აბუ დაბის ურთიერთობა დროებით დასრულდა და 2018-ში Flash Entertainment-ის პრეზიდენტმა, ჯონ ლიკრიშმა აქციების გაყიდვის თაობაზე გააკეთა განცხადება.

ისტორიული მოვლენა

UFC 242 ისტორიული მოვლენაა იმის გამო, რომ არაბეთის გაერთიანებულ საამიროებში პირველად გაიმართება ქალთა ორთაბრძოლები და ერთ-ერთის მონაწილე ლიანა ჯოჯუა იქნება. ქართველი დებიუტანტის მეტოქე კანადელი სარა მორასი იქნება.

"UFC-ის ყველა ტურნირზეა ქალთა ბრძოლები და არც აბუ-დაბი იქნება გამონაკლისი. ამ ღონისძიებაზე გოგონები აუცილებლად უნდა გამოსულიყვნენ. ბევრი ელოდა ბრძოლის აქ ჩატარებას, რადგან პოსტსაბჭოური ქვეყნებიდანაც ჩამოვლენ გულშემატკივრები. ასე რომ, აბუ-დაბიში ქალების ბრძოლაში პრობლემას ვერ ვხედავ. ვფიქრობ, რომ მშვენივარდ შევავსებ ამ ტურნირს", - აღნიშნა ჯოჯუამ Sports.ru-სთან საუბარში.

მთავარი გმირი და თამამი პრეტენდენტი 

ტურნირის აბუ-დაბიში დაბრუენბის ერთ-ერთი მთავარი მიზეზი ხაბიბ ნურმაგომედოვია, რომელმაც ორგანიზაციას ახალი საზღვრები გაუხსნა. აქამდე, მუსულმანურ აბუ-დაბიში ჩატარებულ ბრძოლებს მთავარი გმირი და ვარსკვლავი არ ჰყავდა, ახლა კი ნურამოედოვს გულშემატკივრების დიდი არმია ეყოლება. 

ხაბიბის და პორიეს დაპირისპირება ბევრ ჭრილშია საინტერესო. ერთ-ერთი მთავარი ინტრიგა, რა თქმა უნდა, რუსეთის და აშშ-ის წარმომადგენლების შეხვედრაა, თუმცა აღსანიშნავია ისიც, რომ ნურმაგომედოვი და პორიე ამერიკის ორ მთავარ დარბაზში, American Kickboxing Academy-ში და American Top Team-ში ვარჯიშობენ, რომლებიც წლებია მკაცრი კონკურენციის რეჟიმში არიან და პირველობისთვის იბრძვიან.

"მაქვს შანსი, ვიყო პირველი, ვინც ხაბიბს დაამარცხებს და ამ შესაძლებლობას ხელიდან არ გავუშვებ. მთავარია, რომ 7 სექტემბერს, 25-წუთიან მონაკვეთში მასზე ძლიერი ვიყო და დარწმუნებული ვარ, რომ ამას შევძლებ. ნურმაგომედოვი არ დაუმარცხებიათ, თუმცა ეს არ ნიშნავს, რომ ის დაუმარცხებელია. უბრალოდ, ეს ჯერ არავის გაუკეთებია. მსოფლიოს ვაჩვენებ, რომ ეს ადამიანი უშვებს შეცდომებს, გრძნობს ტკივილს და სისხლისგან იცლება. ყველა დაინახავს, რომ მე საუკეთესო ვარ", - განაცხადა პორიემ MMA Junkie-სთან ინტერვიუში.

ცნობისთვი, დაუმარცხებელ ნურმაგომედოვს UFC-ში 27 ბრძოლა აქვს მოგებული, ხოლო პორიეს ანგარიშზე 25 გამარჯვება და 5 მარცხია.