ქართული სპორტი / ქართული რაგბი /
როგორი იქნება ბორჯღალოსნების პოზიცია განახლებულ რეიტინგში?!
09/07/2019 20:31
228

რაგბის მსოფლიო ჩემპიონატის დაწყებამდე სულ რაღაც ცამეტი დღე რჩება. ყველაზე მნიშვნელოვან ღინისძიებამდე კი გუნდებმა მსოფლიო თასის მოსამზადებელი ეტაპი გაიარეს და რამდენიმე პროდუქტიული მატჩიც გამართეს.

სწორედ ასეთი შეკრება გაიარა საქართველოს ეროვნულმა ნაკრებმაც. ხანგრძლივი და ნაყოფიერი შეკრების შემდეგ, ბორჯღალოსნები საქმეში ჩაერთვნენ და სამი ტესტმატჩიც გამართეს. რუსეთთან გაუქმებული მატჩის ნაცვლად, ჩვენი ნაკრები სამხრეთაფრიკულ ფრანჩიზას, საუზერნ კინგს დაუპირისპირდა და ბრძოლაში ანგარიშით 24:20 სძლია. მოგვიანებით კი თბილისმა და დინამო არენამ ისტორიულ მატჩს უმასპინძლეს. ბორჯღალოსნები, ისტორიაში პირველად, ტიერ 1-ის გუნდს შინ დაუხვდნენ, მოგვიანებით კი შოტლანდიას მარიფილდზე ესტუმრნენ. საბოლოოდ ორივე მატჩში ქართველი მორაგბეები დამარცხდნენ, თუმცა ბორჯღალოსანთა მთავარი მწვრთნელის, მილტონ ჰეიგის განცხადებით, საქართველომ მსოფლიო თასის წინ კარგი გაკვეთილი მიიღო და ეს სწორედ ის იყო, რაც მათ სჭირდებოდათ.

ცხადია, მატჩების შემდგომ, გუნდებს სარეიტინგო ქულები მოაკლდათ და მოემატათ კიდეც, რაც მსოფლიო რეიტინგზეც აისახა. პირველ თამაშში შოტლანდიასთან მარცხის შემდეგ, ბორჯღალოსნებმა 1.13 ქულა დაკარგეს, თუმცა 2 სექტემბერს განახლებულ რეიტინგში არცერთი პოზიცია დაუკარგავთ და კვლავაც მეთორმეტე ადგილს იკავებენ. ლაივ რეიტინგის მიხედვით კი 9 სექტემბრის რეიტინგში ქართველებს არცერთი ქულა მოაკლდებათ და მსოფლიო თასს მეთორმეტე ნომრად შეხვდებიან.

რაც შეეხება მსოფლიო რეიტინგის ათეულს - მსოფლიოს თასამდე რაგბის სამყაროს ახალი ლიდერი, ირლანდია ეყოლება. მიუხედავად იმისა, რომ ახალმა ზელანდიამ ტონგა ანგარიშით 92:7 გაანადგურა, სარეიტინგო ქულები მაინც არ მომატებია. ირლანდიამ კი უელსთან გამარჯვების (19:10) შემდეგ 0.61 ქულა გამოიმუშავა, რაც საკმარისი გახდა, რათა მსოფლიო რეიტინგის სათავეში მოხვედრილიყო.

ათეულში კიდევ ერთი მცირე ცვლილებაა. სამხრეთ აფრიკამ და უელსმა ადგილები გაცვალეს. იაპონიასთან 41:7 გამარჯვების შემდეგ, სამხრეთაფრიკელებს 0.51 ქულა დაემატათ და მეოთხე ადგილზე გადაინაცვლეს. ხოლო უელსმა, რომელიც სულ რაღაც ორი კვირის წინ პირველ ადგილს იკავებდა, მეხუთე ადგილზე დაქვეითდა.

შეგახსენებთ, რომ რაგბის მსოფლიო თასი სტარტს 21 სექტემბერს აიღებს. მსოფლიო თასზე გასული 20 რჩეული გუნდი ოთხ ჯგუფში გადანაწილდა და ვებ ელისის თასისთვის 2 ნოემბრამდე იბრძოლებს. საქართველოს ეროვნულ ნაკრებს კი საკმაოდ რთულ, D ჯგუფში მოუწევს ბრძოლა. ბოჯღალოსნების მეტოქეები ჯგუფში ავსტრალიის, უელსის, ფიჯისა და ურუგვაის ნაკრები გუნდები იქნებიან.

ფოტო: ლევან ვარძეული