ჩოგბურთი / ATP /
ბასილაშვილი განახლებულ რეიტინგში დაწინაურდა
09/09/2019 18:47
343

დღეს, 9 სექტემბერს, პროფესიონალ ჩოგბურთელთა ასოციაციამ ოფიციალურ ვებგვერდზე განახლებული რეიტინგი გამოაქვეყნა.

წლის ბოლო გრანდ სლემის დასრულების შემდეგ, ATP-მ ორკვირიანი პაუზის შემდეგ, რეიტინგში ჩოგბურთელებს ახალი პოზიციები მიუჩინა.

საქართველოს პირველმა ჩოგანმა, ნიკოლოზ ბასილაშვილმა, ამერიკის ღია პირველობაზე ქულების დაცვა ვერ მოახერხა, თუმცა მსოფლიო რეიტინგში მის პოზიციას ეს არ შეხებია.

ნიკამ, ჯონ იზნერისა და კევინ ანდერსონის ჩამოქვეითების ფონზე, რეიტინგში ერთი ადგილით წინ წაიწია. ამჟამად ბასილაშვილი 1895 ქულით, მეჩვიდმეტე ადგილზეა.

აღსანიშნავია, რომ ქართველ ჩოგბურთელს, ხელის ტრავმა აწუხებს, რის გამოც იგი წლის ბოლოს ოპერაციის გაკეთებას გეგმავს. ამის შესახებ კი ნიკამ თავად, ინსტაგრამის მეშვეობით, გულშემატკივრების კითხვაზე საპასუხოდ განაცხადა.

ცნობისთვის, მომდევნო ტურნირი, სადაც ნიკოლოზ ბასილაშვილი იასპარეზებს, მეცის ღია ჩემპიონატია, რომელიც სტარტს 16 სექტემბერს აიღებს.

რაც შეეხევათ, ქართველ ჩოგბურთელ გოგონებს, WTA-ს ჯერჯერობით რეიტინგი არ განუახლებია. "ცოცხალი რეიტინგის" თანახმად კი, საკვალიფიკაციო ეტაპის დაძლევისა და ამერიკის ღია პირველობაზე მეორე ტურში გასვლის შემდეგ, მარიამ ბოლქვაძე 46 ქულით დაწინაურდა და ამჟამად 156-ე ადგილს იკავებს, ხოლო ეკატერინე გორგოძე 23 პოზიციით დაქვეითდა და მსოფლიოს 234-ე ჩოგანია.

#Flashscore