ფეხბურთი / ქართული ფეხბურთი /
საქართველომ აზერბაიჯანსაც მოუგო და ჯგუფში ერთპიროვნულად გალიდერდა
09/10/2019 22:36
291

საქართველოს 21-წლამდე ნაკრებმა ევროპის ჩემპიონატის საკვალიფიკაციო ეტაპის მეორე ტურის მატჩი სტუმრად, აზერბაიჯანის წინააღმდეგ გამართა.

გია ცეცაძის გუნდმა, აზერბაიჯანის დედაქალაქ ბაქოში, მასპინძლებს დიდი ანგარიშით, 3:0 მოუგო.

ქართველი ფეხბურთელები მატჩში სრულ უპირატესობას ფლობდნენ და არაერთი სახიფათო მომენტიც შექმნეს. თუმცა პირველი გოლი ქართველებმა პირველი ტაიმის მიწურულს, დამატებით მესამე წუთზე გაიტანეს. ვატო არველაძის გოლის შემდეგ, მატჩის მთავარმა არბიტრმა, პირველი ტაიმი დაასრულა.

მეორე ტაიმიც პირველის მსგავსად ქართველების აქტიურობით მიმდინარეობდა. 73-ე წუთზე კი გიორგი არაბიძის შესანიშნავი თამაშისა და პასის შემდეგ, ბუღრიძემ მეორე გოლი გაიტანა და საქართველო კომფორტული უპირატესობით დაწინაურდა - 2:0.

მატჩის 84-ე წუთზე კი გუნდის კაპიტანმა, არაბიძემ, რომელმაც აზერბაიჯანის წინააღმდეგ ბრწყინვალე მატჩი ჩაატარა, ეფექტური გოლი გაიტანა და საბოლოო ანგარიში - 3:0 დააფიქსირა.

გასულ ორ თამაშში ცეცაძის შეგირდება, როგორც დაცვაში, ასევე შეტევაში ბრწყინვალედ ითამაშეს. საქართველომ ბოლო ორ თამაშში შვიდი უპასუხო გოლი გაიტანა და მეორე ჯგუფს ერთპიროვნულად ლიდერობს.

მეორე ადგილს შვეიცარია იკავებს, რომელმაც მიმდინარე პაუზის დროს, მხოლოდ ერთი მატჩი გამართა. სწორედ შვეიცარია იქნება საქართველოს ნაკრების მომდევნო მეტოქე. შვეიცარიასა და საქართველოს შორის მატჩი 11 ოქტომბერს შუცენვისეს სტადიონზე, თბილისის დროით 21:00 საათზე გაიმართება.

შეგახსენებთ, რომ საკვალიფიკაციო ეტაპის პირველ ტურში საქართველომ ლიხტენშტაინი, ანგარიშით 4:0 გაანადგურა.