ქართული სპორტი / ქართული რაგბი /
სტიქია იაპონიაში - რა ემუქრება რაგბის მსოფლიო თასს?!
09/10/2019 23:37
322

ამომავალი მზის ქვეყანას ქარიშხალი ფაქსაი უტევს. იაპონური მედიის ცნობით, ფაქსაი ისტორიაში ერთ-ერთი ყველაზე ძლიერი ქარიშხალია.

ძლიერმა სტიქიამ კი იაპონიაში გასამართი რაგბის მსოფლიო თასი, რომელიც სულ რაღაც ათ დღეში იწყება, კითხვის ნიშნის ქვეშ დააყენა.

მსოფლიო თასზე მონაწილეობას საქართველოს მორაგბეთა ეროვნული ნაკრებიც იღებს, რომელიც უკვე იაპონიაში იმყოფება. ბორჯღალოსნებს, მსოფლიოს რამდენიმე წამყვანი გუნდისგან განსხვავებით, იაპონიაში ჩაფრენის პრობლემა არ შექმნიათ. ჩვენი ნაკრები უკვე ქალაქ ტოკუშიმაში დაბინავდა, სადაც მსოფლიოპირველობისთვის მზადებას განაგრძობს.

მსოფლიო თასის დაწყებამდე ქარიშხლის მოახლოვების შემდეგ რამდენიმე კითხვა გაჩნდა.

ექნება თუ არა გავლენა ქარიშხალ ფაქსაის მსოფლიო თასზე?

მსოფლიო რაგბის ყველაზე მნიშვნელოვანი ღონისძიება, განსაკუთრებით პირველი თხუთმეტი დღე, ქარიშხლის ძირითად სეზონს ემთხვევა. ფაქსაი მიმდინარე წლის მეთხუთმეტე ტროპიკული შტორმია.

სტიქიამ რამდენიმე გუნდის მოსამზადებელ ეტაპზე უკვე მოახდინა გავლენა. ავსტრალიელებს ფრენა გადაედოთ, ფრანგებმა კი ტოკიოში დაფრენა შტორმის დაწყებამდე სულ ცოტახნით ადრე მოახერხეს.

ქარიშხალი კი ერთადერთი სანერვიულო არ არის. იაპონია სეისმურად ერთ-ერთი ყველაზე აქტიური ქვეყანაა, ტურნირის ორგანიზატორები კი ვარაუდობენ, რომ, შესაძლოა, მსოფლიო თასის განრიგი მიწისძვრებმაც შეაფერხოს.

როგორ მოემზადნენ ორგანიზატორები?

ტურნირის დირექტორის, ალან გილპინის თქმით, საგანგებო სიტუაციებისთვის მზადებას, ტურნირისწინა აქტივობების უდიდესი ნაწილი დაუთმეს.

"ვფიქრობთ, რომ ყველაფრის დაგეგმვაა შესაძლებელი. უბრალოდ უნდა დარწმუნდე, რომ ყველა სხვადასხვა ცვლილებაზე იმუშავე და მოემზადე. მზად ყველანაირი შემთხვევისთვის უნდა ვიყოთ. ჩვენ ყველანაირი გაუთვალისწინებელი შემთხვევისთვის გვაქვს გეგმა - როგორც მიწისძვრებისთვის, სატრანსპორტო საშუალებებისთვის, თუ ნებისმიერი სხვა შემთხვევისთვის", - განაცხადა გილპინმა AFP-სთან საუბრისას მიმდინარე წლის დასაწყისში.

როგორ მოემზადნენ გუნდები?

ინგლისის ეროვნული ნაკრების მთავარი მწვრთნელი, ედი ჯონსი, რომლისთვისაც იაპონური ექსტრემალური ამინდები უცნობი არ არის, ფიქრობს, რომ ქარიშხალი მსოფლიო თასზე გავლენას იქონიებს. მისივე თქმით, იმ შემთხვევაში, თუ ამინდი მათ გარეთ ვარჯიშში ხელს შეუშლის, ინგლისის ნაკრები შენობაში, ხელოვნურ ბალახზე ივარჯიშებს.

გარდა ვარჯიშისა, დიდი პრობლემა იქნება ტრანსპორტირებაც. იაპონიის მასშტაბით ოცი გუნდის ტრანსპორტირება თორმეტ ლოკაციაზე ერთ-ერთი მთავარი პრობლემა იქნება.

ძალიან ბევრი ფრენა და მატარებლების განრიგი, ორშაბათს, 9 სექტემბერს ქარიშხალი ფაქსაის გამო გადაიდო, ამავდროულად, ტოკიოს მატარებლების ქსელის დიდი ნაწილი გაითიშა, რამაც გარკვეული ქაოსი შექმნა.

რა მოხდება, თუ მატჩი გადაიდება?

მსოფლიო თასის რეგულაციები დამოკიდებულია, მატჩი ჯგუფურ ეტაპზე გადაიდება, თუ პლეიოფში.

იმ შემთხვევაში, თუ რომელიმე თამაში ჯგუფურ ეტაპზე გადაიდება, მატჩი ხელახლა აღარ გაიმართება, ანგარიში ფრე 0:0 დაფიქსირდება და ორივე გუნდს 2-2 ქულა ჩაეწერება. პლეიოფში ჩაშლილი მატჩები კი უახლოესი ორი დღის განამვლობაში ჩატარდება.

თუ ჯგუფურ ეტაპზე მატჩი პირველი ტაიმის დასრულებამდე შეჩერდება, ორივე გუნდს 2-2 ქულა ჩაეწერება, თუმცა ასევე აისახება მატჩის ანგარიში და ბონუსქულები. ხოლო მეორე ტაიმში შეწყვეტილი მატჩის შედეგი უცვლელი დარჩება.

უნდა ინერვიულონ თუ არა გულშემატკივრებმა?

მიუხედავად იმისა, რომ მსოფლიო თასის მსვლელობისას, შვიდი კვირის განმავლობაში ძლიერი ქარიშხლისა და მიწისძვრების საფრთხე არსებობს, გულშემატკივრებმა არ უნდა იღელვონ, რადგან იაპონია სტიქიური უბედურებებისთვის უკიდურესადაა მომზადებული.

რეკორდული სიძლიერის წვიმისა და ქარების დროს, ყველაზე ხალხმრავალ ქალაქში, ტოკიოში მხოლოდ ერთი ადამიანი გარდაიცვალა და მსუბუქი დაზიანებები მიზერული რაოდენობის მოქალაქემ მიიღო.

შენობები და ტრანსპორტი ისეა მოწყობილი, რომ ძლიერმა მიწისძვრებმა, შესაძლოა, მხოლოდ მცირე დაზიანებები მიაყენოს.

იაპონიის მთავრობამ იზრუნა იმაზე, რომ სტიქიის ადრეულ ეტაპზევე ინფორმაცია ყველგან გაჟღერებულიყო და ამავდროულად, ყველაფერი ინგლისურ ენაზეც გავრცელებულიყო.

შეგახსენებთ, რომ რაგბის მსოფლიო თასი სტარტს 21 სექტემბერს აიღებს. მსოფლიო თასზე გასული 20 რჩეული გუნდი ოთხ ჯგუფში გადანაწილდა და ვებ ელისის თასისთვის 2 ნოემბრამდე იბრძოლებს.