ზიონ უილიამსონი 18 წლის საკალათბურთო ფენომენია, თუმცა მის შესახებ კალათბურთის გულშემატკივარი ინფორმაციას უკვე წლებია ფლობს. ჯერ კიდევ საშუალო სკოლის პერიოდში მისი ათლეტიზმის წყალობით შესრულებული ჩატენვები ინტერნეტ სივრცეში ვირუსული ვიდეოებით ვრცელდებოდა. ეს ზიონის ისტორიის ბოლო ნაწილია. დასკვნითი ეტაპი, რომელიც რაღაც დიდის, საოცრების დასაწყისია.

ყველაფერი 15 წლით ადრე თარიღდება. ზიონ უილიამსონი კალათბურთს 5 წლის ასაკიდან თამაშობს. მისი მიზანი დასაწყისშივე კოლეჯის კალათბურთის ვარსკვლავობა გახლდათ და 9 წლის უილიამსონი ყოველდღე, დილის 5 საათზე დგებოდა და ვარჯიშს იწყებდა.

ზიონი 2.03 სანტიმეტრია და 129 კგ-ს იწონის. სიმაღლესთან შედარებით მისი მასა იმდენად დიდია, რომ მსგავსი ტიპის მოთამაშეები როგორც წესი მაღალ დონეზე ვერ ასპარეზობენ. უილიამსონი ფენომენია. მისი სისწრაფე შეუდარებელია, ხოლო ნახტომი - უპრეცენდენტო.

დიუკის კოლეჯი თავისი არსებობის ისტორიაში ერთ-ერთ საუკეთესო შედეგს აჩვენებს და ეს სწორედ ზიონის დამსახურებაა. არანორმალური ათლეტიზმი, სწრაფი გარღვევების უბადლო შესრულება და ფიზიკა, რის ხარჯზეც როგორც დაცვაში, ასევე შეტევაში ყველა პოზიციაზე ასპარეზობა შეუძლია.

დიუკი

უილიამსონის საშუალო მონაგარი მიმდინარე სეზონში ფანტასტიკურია. საშუალოდ 28,8 წუთში 22 ქულა (68%), 9,4 მოხსნა, 2,3 შედეგიანი გადაცემა, 2,2 ჩაჭრა და 2 ბლოკი. აქამდე რამდენ ახალწვეულს ჰქონია მსგავსი სტატისტიკა კოლეჯის კალათბურთში? პასუხი მარტივია - არც ერთს.

მიუხედავად სროლის პრობლემებისა ( სამქულიანები - 29% საშუალოდ 1,9 ცდიდან) უილიამსონს NCAA-ში ვერავინ აჩერებს. მისმა პოპულარობამ ისიც კი გამოიწვია, რომ ნაციონალური საკალათბურთო ასოციაციის პარალელურად მიმდინარეობისას ESPN სწორედ დიუკის შეხვედრას გადასცემდა.

სისწრაფე, ათლეტურობა, ეფექტურობა და დაცვა. უილიამსონი სრული პროსპექტია და ბევრი ექსპერტის აზრით ლებრონ ჯეიმსის შემდეგ ლიგაში მსგავსი მოლოდინი არავისადმი ყოფილა. დრაფტამდე 4 თვეზე ოდნავ მეტი რჩება და პირველი პიკის შესახებ კითხვის ნიშნები არ არსებობს.

zion williamson-áá¡ á¡á£á áááá¡ á¨ááááá

შეტევა

როგორც მოგახსენეთ, ზიონს სროლის პრობლემები აქვს. უკეთ რომ ვთქვათ, ამ მხრივ პრობლემები NBA-ში თუ ექნება, თორემ კოლეჯში ის უდაოდ საუკეთესო კალათბურთელია და მასთან ახლოსაც არავინ დგას. უილიამსონის ქულების მთავარი მონაგარი ფარქვეშ ან სწრაფ შეტევებში გამოიხატება. არანორმალური სისწრაფისა და ათლეტურობის ხარჯზე, სრულ გარბენზე ზიონის გამჩერებელი არავინაა.

იხილეთ მისი საუკეთესო მომენტები და დატკბით:

Zion Williamson's nasty highlights vs St. John!

29 PTS (13-17 FG), 6 REB, 5 STL, 2 BLK

(Via @WatchStadium) pic.twitter.com/9hREPEfjir
— Ballislife.com (@Ballislife) February 2, 2019

დაცვა

უილიამსონი ფენომენალური მცველია. მას თანაბრად შეუძლია როგორც დაბალი, ასევე მაღალი მოთამაშეების დაცვა. გამთამაშებლები ზიონის ფიზიკური მონაცემების მქონე კალათბურთელისგან იმ სისწრაფეს არ ელიან, რასაც ის აფიქსირებს. უილიამსონი მუდმივად ახერხებს ბურთის მატარებლის წინ დგომას და მცირედ გასწრების შემთხვევაში სიმაღლის და ათლეტურობის ხარჯზე უკნიდან წამოწევა მარტივად შეუძლია.

არც მაღლებთანაა საქმე განსხვავებულად. ფარქვეშ მიღებული ბურთის, ანუ კლასიკურ POST-UP შემთხვევაში ზიონს ზურგით მიწოლით ვერაფერს აკლებენ. სიმაღლეში უპირატესობას კი თავისი ათლეტური ნახტომის მარტივად აქრობს.

შესანიშნავია დამხმარე მცველად. სისწრაფის ხარჯზე როტაციას სწრაფად ახერხებს, მაღალი საკალათბურთო IQ-ს მეშვეობით მარტო დარჩენილ მსროლელზე გადადის და ისეთ შედეგს ვიღებთ, როგორიც გუშინ მოხდა...

Zion Williamson with the volleyball spike ?️pic.twitter.com/9lQyYSOfaK
— SI College Hoops (@si_ncaabb) February 10, 2019

დასკვნა

შაკილ ო'ნილის მასა, ლებრონ ჯეიმსის ათლეტურობა და რასელ ვესტბრუკის სისწრაფე. ზიონმა თუ სროლის განვითარება მოახერხა, ნაციონალურ საკალათბურთო ასოციაციას ახალი მეფე ეყოლება. მაგრამ თუ არა...

დააკვირდით ბენ სიმონსს. ავსტრალიელ ვარსკვლავს კარიერაში სამქულიანი არ ჩაუგდია, ამას არც ცდილობს, თუმცა ფილადელფია სიქსერსის მომავლის ერთ-ერთი უდიდესი წევრია და პირველი ოლ-სტარიც მოიპოვა.

ბევრის აზრით ზიონი სიმონსს უკვე ჯობია. უფრო სწრაფია, სამიანს დაბალ დონეზე, თუმცა მაინც ისვრის და ფიზიკური მონაცემები თვით ავსტრალიური ფეხბურთის (დიახ, სიმონსი ბავშვობაში ავსტრალიურ ფეხბურთს თამაშობდა) ყოფილ მოთამაშეზე უკეთესი აქვს.

ნაციონალურმა საკალათბურთო ასოციაციამ დრაფტის ლატარიის წესები შეცვალა. სამი ყველაზე უარესი ბალანსის მქონე გუნდს პირველი არჩევანის მოპოვების თანაბარი, 14%-იანი შანსი ექნება. ვის გაუმართლებს ლატარიაში? ვინც არ უნდა იყოს ეს გუნდი, 14 მაისს NBA-ს ერთ-ერთი გუნდის ისტორია შეიცვლება...

გაიცანით ზიონ უილიამსონი - მიზეზი, რის გამოც NBA-ს გუნდები ძალით აგებენ!

ასევე იხილეთ

უახლესი ამბები