ჩოგბურთი / ATP /
ჟენევაში ლეივერის თასისთვის ემზადებიან
09/19/2019 1:31
171
Loading the player...

შვეიცარიის ქალაქ ჟენევაში 20-22 სექტემბერს როდ ლეივერის თასი გაიმართება.

უკვე ტრადიციად ქცეული ტურნირი კვლავაც სანახაობრივ და სახალისო მატჩებს გვპირდება. ევორპისა და მსოფლიოს გუნდები უკვე დაირაზმნენ და მოგებისთვის ემზადებიან.

გულშემატკივრებს კი კვლავაც ერთი სული აქვთ, თუ როდის იხილავენ როჯერ ფედერერსა და რაფაელ ნადალს ერთ გუნდში, თანაც წყვილებში. რაფა და როჯერი კი ამისთვის მზად არიან და კვლავაც მოგებისკენ მიისწრაფიან.

ფედერერმა ტურნირის დაწყებამდე ნადალზე ისაუბრა და აღნიშნა, რომ ესპანელს თავისუფლად შეეძლო, მონაწილეობაზე უარი ეთქვა, თუმცა ამის ნაცვლად, იგი მაინც მათ გვერდშია და ლეივერის თასზე ითამაშებს.

"რაფა ამ ღონისძიებისთვის ძალიან მოტივირებულია. მან სულ რაღაც რამდენიმე დღის წინ ამერიკის ღია პირველობა მოიგო. და სრულიად თავისუფლად შეეძლო ეთქვა, 'მისმინეთ, დასვენება მჭირდება', მაგრამ ამის ნაცვლად გვითხრა 'არა, ჩემი დასვენება ამის შემდეგ იქნება. ყველაფერს გვერდზე გადავდებ და ვიტამაშებ, რადგანაც ლეივერის თასის კონცეფციის მჯერა. თქვენი მჯერა ბიჭებო", - განაცხადა ფედერერმა.

მსოფლიოს მეორე და მესამე ჩოგნებმა წყვილებში უკვე ივარჯიშეს და როგორც ჩანს, გულშემატკივრებს იმედებსაც არ გაუცრუებენ.

თუმცა, როჯერისა და რაფას გარდა, ორივე გუნდში არაერთი ვარსკვლავური სახე შეგვხვდება. გუნდები კი ასე დაკომპლექტდნენ.

ევროპის გუნდი: როჯერ ფედერერი, რაფაელ ნადალი, დომინიკ ტიმი, ალექსანდრ ზვერევი, სტეფანოს ციციპასი, ფაბიო ფონინი.

კაპიტანი: ბიორნ ბორგი; ვიცეკაპიტანი: ტომას ენკვისთი.

ალტერნატივა: რობერტო ბაუტისტა აგუტი.

მსოფლიოს გუნდი: ჯონ იზნერი, მილოშ რაონიჩი, ნიკ კირიოსი, ტეილორ ფრიცი, დენის შაპოვალოვი, ჯეკ სოკი.

კაპიტანი: ჯონ მაკენროი; ვიცეკაპიტანი: პატრიკ მაკენროი.

ალტერნატივა: ჯორდან ტომპსონი.

#Flashscore