სამხრეთ კორეელი გოლფის მოთამაშე, ბიო კიმი 3 წლიანი დისკვალიფიკაციით დაისაჯა. ყოველივე ამის მიზეზი კი ის გახლდათ, რომ მან დამსწრე საზოგადოების გარკვეულ ნაწილს შუა თითი უჩვენა. კიმმა გაცუდებული დარტყმა სწორედ იმ ხალხს დააბრალა, რომლებიც მას ტელეფონით ვიდეოს უღებდნენ.

"ტელეფონის კამერების ხმამ მე ხელი შემიშალა დარტყმის მომენტში. ისინი იღებდნენ ფოტოებს და ვიდეოებს, რამაც არ მომცა საშუალება, რომ მშვიდად და გაწონასწორებულად გამეკეთებინა ჩემი საქმე." - განაცხადა ბიო კიმმა.

გოლფის პროფესიონალურმა ასოციაციამ სამხრეთ კორეელი სპორტსმენი 3 წლიანი დისკვალიფიკაციით დასაჯა და ასევე ჯარიმის სახით 7,660 ევროს გადახდა დააკისრა. როგორც ირკვევა, კიმმა შემდგომ ბოდიში მოიხადა, თუმცა ეს არ აღმოჩნდა საკმარისი იმისთვის, რომ მას სასჯელი თავიდან აეცილებინა.