ფეხბურთი / ქართული ფეხბურთი /
ტორპედოს ფეხბურთელებმა ვარჯიში შეწყვიტეს
10/09/2019 15:36
166

ქუთაისის ტორპედოში ფინანსური კრიზისი გრძელდება. 

ქუთაისელტა ოფიციალური გვერდის ცნობით, კლუბში და საწვრთნელ ბაზაზე შექმნილი გაუსაძლისი პირობების გამო, ტორპედოს ფეხბურთელებმა ვარჯიში შეწყვიტეს.

გუნდში შექმნილ ვითარებაზე კომენტარი ტორპედოს კაპიტანმა, როინ კვასხვაძემ გააკეთა. 

"მინდა, გულშემატკივარმა სწორად გაიგოს ჩვენი პოზიცია. ტორპედოდან არცერთი ფეხბურთელი წასულა. პირიქით, ძალიან გვინდა გავიდეთ, ვივარჯიშოთ, მოახლოებულ მატჩებს სათანადოდ მომზადებულები შევხვდეთ და ჩვენი გულშემატკივარი გავახაროთ, მაგრამ, სამწუხაროდ, იქამდე მივედით, რომ ეს ფიზიკურად აღარ შეგვიძლია.

ფეხბურთელთა დიდი ნაწილი კლუბის საწვრთნელ ბაზაზე ცხოვრობს. ელემენტარულია, ხომ უნდა იკვებონ?! დღეს უკვე აღარც მაგის საშუალებაა! სავარჯიშო პირობები არაა, მომავალი გაურკვეველია...

ტორპედო არ მიგვიტოვებია! უბრალოდ, იმდენად რთულ პირობებში ვართ, ძველებურად გაჩერება შეუძლებელია.

პირადად ჩემთვის ტორპედოს დაშლა ძალიან მტკივნეული იქნება. ტორპედო არაა რიგითი კლუბი, მას გაფრთხილება უნდა. დღეს ტორპედო ჩვენს თვალწინ იშლება და რაღაც უნდა ვიღონოთ", - განაცხადა ქუთაისელთა მეკარემ.

შეგახსენებთ, რომ ევროთასების დაწყებამდე ტორპედო წამყვანმა ფეხბურთელებმა სახელფასო დავალიანების გამო დატოვეს, მათ ნაცვლად კი კლუბში აქცენტი ახალგაზრდა მოთამაშეებზე გააკეთეს. 

ამჟამად ქუთაისური კლუბის ეროვნულ ლიგაში მე-4 ადგილზეა და საქართველოს თასის 1/2-ფინალშია გასული

#Flashscore