კალათბურთი / NBA /
NBA დაიჯესტი - ზაიონის 29 ქულა, MVP მილუოკიში დაბრუნდა
10/10/2019 11:12
193

მოსამზადებელ ეტაპზე ზედიზედ მეორე მატჩი მოიგო ნიუ ორლეანს პელიკანსმა, ხოლო ზაიონ უილიამსონმა 29 ქულის დაგროვება მოახერხა.

აღსანიშნავია, რომ ჩიკაგომ მეტოქე პირველ სამ მეოთხედში პირწმინდად დაჩაგრა და ზემოთ ხსენებული უილიამსონის -/+ პროცენტი -19 იყო. თუმცა ჯოშ ჰარტის, ნიკეილ ალექსანდერ-უოლკერის, ფრენკ ჯექსონისა და ჯალილ ოკაფორის შესანიშნავი თამაშის წყალობით გუნდმა 127:125 მოიგო.

ბულსის მხრიდან გამორჩეული მატჩი ჩაატარა ზაკ ლავინმა, მის ანგარიშზე 28 ქულა იყო. ამ მოთამაშისგან მიმდინარე სეზონში გაბრწყინებას ელიან, ვნახოთ რამდენად გაამართლებს ის გაცემულ ავანსებს.

უპრობლემოდ გაიმარჯვა აღმოსავლეთ კონფერენციის შარშანდელმა ტრიუმფატორმა მილუოკი ბაქსმა. მათი მეტოქე რუდი გობერის გარეშე მოთამაშე იუტა ჯაზი იყო და ერთ-ერთი ლიდერის არყოფნაში ვისკონსინელების შეჩერება ვერ მოახერხეს.

22 ქულა და 11 მოხსნა დააგროვა გასული სეზონის MVP იანის ანტეტოკუნმპომ, რომელიც მსოფლიო ჩემპიონატზე განცდილი ფიასკოს შემდეგ, ახალ სეზონში ორმაგად მოტივირებული იქნება.

საინტერესო დაპირისპირება შედგა დეტროიტში, სადაც ადგილობრივი პისტონსი დალას მავერიკსს დაუპირისპირდა და მეტოქე 124:117 დაამარცხა. ტეხასელთა შემადგენლობაში დებიუტი ჰქონდა კრისტაპს პორზინგისს, რომელიც ხანგრძლივი ტრავმის შემდეგ დაბრუნდა. ლატვიელმა 19 წუთში 18 ქულა და 7 მოხსნა დააგროვა.

შესანიშნავი მატჩი ჩაატარა დეტროიტელთა ახალწვეულმა დერიკ როუზმა, ლიგის ყოფილი სუპერვარსკვლავის ანგარიშზე 18 ქულა და 5 შედეგიანი გადაცემა იყო. მიმდინარე სეზონში ყველაზე ახალგაზრდა MVP-სგან ბევრს ელიან.

მორიგი მატჩი მოიგო მაიამი ჰიტმა, ამჯერად ფლორიდელთა მსხვერპლი მაიკლ ჯორდანის შარლოტ ჰორნეტსი იყო (108:94). გამორჩეული მატჩი ჩაატარა დიონ ვეიტერსმა, რომელმაც 16 წუთში 19 ქულა ჩააგდო და ყველას თავი შეახსენა.

შესანიშნავი იყო გუნდის "რუქი" მსუბუქი ფორვარდი დანკან რობინსონი(14ქ). რომელმაც ყველას აჩვენა, რომ სროლა შესანიშნავად შეუძლია და მეორე ახალწვეულ ტაილერ ჰიროუსთან (8ქ.) ერთად პერიმეტრიდან მეტოქეების "დაბომბვას" აპირებს.

ტერენს როსის (20ქ.) გამორჩეული თამაშის წყალობით მეორე შეხვედრაში გაიმარჯვა ორლანდო მეჯიქმა, მათი მეტოქე ამჯერად ატლანტა ჰოუქსი იყო (97:88). მომავალ სეზონში ყველა დიდი ინტერესით ელის მარკელ ფულცის (6ქ.) თამაშს, ფილადელფიასგან განსხვავებით მას აქ შანსი უნდა მიეცეს და ვნახოთ მოახერხებს თუ არა მის გამოყენებას.

ჩინურ გუანჟოუსთან ძალიან მარტივად 137:98 გაიმარჯვა ვაშინგტონ ვიზარდსმა. გამორჩეული მატჩი ჩაატარა მორიც ვაგნერმა, რომელმაც თამაში სკამიდან დაიწყო, თუმცა 21 ქულის დაგროვება მაინც მოახერხა.

ავტორი: მარიამ მესხი

#Flashscore