ბლოგი / /
შეგვძლებია | წარმატებული ოქტომბერი
10/18/2019 0:48
650

ერთი კვირის წინ მსოფლიო ფეხბურთში სანაკრებო პაუზა გამოცხადდა, რის გამოც საკლუბო ფეხბურთის მოყვარულები ეროვნული ნაკრებების გულშემატკივრობისკენ გადაერთვნენ.

გამონაკლისი არც საქართველო გახლდათ. ჩვენმა ეროვნულმა და ასაკობრივმა ნაკრებებმა რამდენიმე შეხვედრა გამართეს და შედეგებიდან გამომდინარე, სანაკრებო პაუზა ნაყოფიერად უნდა შეფასდეს.

დავიწყოთ ასაკობრივი ნაკრებებით: 18-წლამდელებმა ძალები ამხანაგურ შეხვედრებში გამოსცადეს და ესტონელ თანატოლებთან ორი მატჩი გამართეს. გიორგი მიქაძის შეგირდებმა მეტოქე ორივეჯერ დამაჯერებლად დაამარცხეს. ჯერ გიორგი ომარაშვილის დუბლითა და ზურაბ ერაძის გოლით 3:0, ხოლო შემდეგ ოგბაიძისა და ფაჩულიას გოლებით 2:0 იმარჯვეს.

რამაზ სვანაძის 19-წლამდელებმა საკმაოდ ხმაურიანი გამოსვლა შემოგვთავაზეს. ევროშესარჩევის ციკლის სამივე შეხვედრა ჩვენებურებმა დამაჯერებლად მოიგეს და ჯგუფში პირველი ადგილი დაიკავეს. საწყის დაპირისპირებაში უნგრელებს 4:2 მოვუგეთ, რასაც ყაზახეთთან 3:1 გამარჯვება მოჰყვა. გადამწყვეტ შეხვედრაში მრისხანე ხორვატია 2:0 დავამარცხეთ და ელიტ-რაუნდში თამაშის უფლება მოვიპოვეთ.

ევროშესარჩევის ჯგუფურ ეტაპზე 21-წლამდელთა ნაკრებმაც იასპარეზა. გია ცეცაძის შეგირდები, რომელთაც ჯგუფში ორი მოგება ჰქონდათ, უდანაკარგო შვეიცარიას ესტუმრნენ და 1:2 დამარცხდნენ. სამივე გოლი მეორე ნახევარში გავიდა. 57-ე წუთზე მასპინძლები დაწინაურდნენ, რასაც 4 წუთში გიორგი არაბიძის გოლი მოჰყვა. შვეიცარიელებმა საბოლოო შედეგი 83-ე წუთზე დააფიქსირეს.

და ბოლოს, საქართველოს ეროვნული ნაკრები, რომელმაც ორი შეხვედრა გამართა. პირველ მათგანში ძალიან უხერხულ მეტოქეს, ირლანდიას დავუპირისპირდით, რომელთანაც ისტორიაში გამარჯვება არ გვქონია. საქართველოსთვის ამ შეხვედრას მნიშვნელობაზე მეტად, პრინციპული ხასიათი ჰქონდა – ჩვენს ბიჭებს ნავსი ჰქონდათ გასატეხი. რამდენიმე მომენტის მიუხედავად, მეტოქის კარი ვერ დავლაშქრეთ და გოლიც არ გაგვიშვია. საბოლოოდ 0:0 და უსიამოვნო ტრადიცია გრძელდება – 2 ფრე, 9 მარცხი.

უკანასკნელი შეხვედრა ჯგუფში ყველაზე სუსტ მეტოქესთან, გიბრალტართან გავმართეთ და გამარჯვების მიუხედავად, ამ მატჩს დადებითად ვერ შევაფასებთ. ჩვენმა ბიჭებმა მეტოქეს 21 წუთში ორი გოლი გაუტანეს, რის შემდეგაც ცოტა მოდუნდნენ. მეორე ნახევარში გიბრალტარელებმა, რომელთაც ჯგუფში გოლი არ ჰქონდათ გატანილი, მოუმატეს და რამდენიმე სახიფათო მომენტიც შექმნეს. საბოლოოდ მიზანს 66-ე წუთზე მიაღწიეს, რასაც 8 წუთში მეორე გოლიც მოჰყვა – 2:2. საბედნიეროდ, შეტევაში გადასულმა საქართველოს ნაკრებმა გიორგი ქვილითაიას გოლით 3:2 იმარჯვა და აქტივში სამი ქულა ჩაიწერა.

ვლადიმირ ვაისის შეგირდებს ჯგუფურ ეტაპზე ბოლო შეხვედრის ჩატარება მოუწევთ. ისინი 15 ნოემბერს შვეიცარიას ესტუმრებიან, რომელსაც გამარჯვება ჰაერივით ესაჭიროება.

#Flashscore