ფეხბურთი / მსოფლიო ფეხბურთი /
რონალდო და ნეიმარი: ვარცხნილობებზე, კარიერაზე, ტრავმებზე...
10/21/2019 12:53
1974

ბრაზილიელმა ვარსკვლავებმა - რონალდომ და ნეიმარმა ტელეარხ OTRO-სთვის მომზადებულ სიუჟეტში თავიანთ კარიერაზე, დასამახსოვრებელ მომენტებზე, ტრავმებსა და საინტერესო დეტალებზე ისაუბრეს.

თავდამსხმელებმა თავიანთი ვარცხნილობების განხილვით დაიწყეს:

ნეიმარი: მახსოვს, როგორ გავიმეორე შენი ვარცხნილობა. დედაჩემი ძალიან გამიბრაზდა. შენ მაშინ მსოფლიო ჩემპიონატზე თამაშობდი და მინდოდა, შენნაირი ვყოფილიყავი, შენნაირი მქონოდა ვარცხნილობაც და ყველაფერი სხვაც.

რონალდო: დედაშენი გაბრაზდა, მაგრამ მე რაღა ვთქვა? დედაჩემმა ჩემი ვარცხნილობა დაწყევლა.

ნეიმარი: ავდექი და თმა ლურჯად შევიღებე. დედამ ესეც დამიშალა, მაგრამ ბავშვთა ჩემპიონატის ფინალში შეღებილი თმით ვითამაშე.

რონალდო: ეს კარგია, რადგან სხვებზე ზემოქმედებას ვახდენთ. ნამდვილად შესაძლებელია, რომ ვარცხნილობამ გარკვეული ზეგავლენა იქონიოს. ფეხბურთში ბევრი საინტერესო დეტალია, რომელსაც ხალხი ხან სერიოზულად აღიქვამს, ხან - არა.

რონალდო და ნეიმარი მიიჩნევენ, რომ მომავალ თაობას ფეხბურთის სიყვარული აუცილებლად უნდა გადასცენ:

რონალდო: ახლახანს, ორი ფოტო დადე: ერთზე 15 წლის იყავი, მეორე კი, შარშანდელი იყო. ისეთივე პატარა სახე და გამოხედვა გაქვს. კონცენტრაციაც იგივეა. ფეხბურთისგან დღესაც ისეთივე სიამოვნებას იღებ, როგორც ბავშვობაში. ახლაც იგივე ენერგია გაქვს. ფეხბურთის სიყვარულთან დაკავშირებული უამრავი დაუჯერებელი ისტორია გვაქვს და ეს ყველაფერი მომავალ თაობას უნდა გადავცეთ.

ნეიმარი: გეთანხმები. ფეხბურთის ასეთი სიყვარული ძალიან სიღრმიდან მოდის. როცა მოედანზე ვარ, ვცდილობ სხვა ყველაფერი დავივიწყო და იმ კონკრეტული მომენტისგან მაქსიმალურად ვისიამოვნო. ჩვენი თამაშის სტილი ერთმანეთს ძალიან ჰგავს. ბურთს ვიღებთ და მასთან ერთად წინ მივდივართ. შეტევაზე ორიენტირებულები ვართ და გოლების გატანა გვინდა.

ეს შენგან, რონალდინიოსგან და რობინიოსგან ვისწავლე. თქვენს მატჩებს ყოველთვის ვუყურებდი. ვცდილობდი, ისეთივე სიამოვნებით მეთამაშა, როგორც ამას თქვენ აკეთებდით. რა თქმა უნდა, იგივეს გაკეთება არასდროს გამომდიოდა, მაგრამ ბედნიერი ვიყავი, თუ ვამსგავსებდი მაინც.

რონალდო: შედარება ძალიან რთულია, რადგან არასამართლიანები ვიქნებით. ერთ რჩევას მოგცემ: ეცადე, ფეხბურთის შენებური სიყვარული ახალგაზრდებს გადასცე. ეს მათ დიდ მოტივაციას მისცემს.

ნეიმარი: შენ ჩემი კერპი და მეგობარი ხარ. ამ ყველაფრის მოსმენა ძალიან მიხარია. სიტყვები არ მყოფნის.

ნეიმარმა და რონალდომ იმ ტრავმების შესახებაც ისაუბრეს, რომელთა გამოც კარიერაში საკმაოდ დიდი დრო გაუცდათ.

ნეიმარი: მსოფლიოს 2014 წლის ჩემპიონატზე მძიმე ტრავმა მივიღე. მსაჯი იმ მომენტში ვერაფერს შვრებოდა.

რონალდო: ზურგის? მეტოქეს აშკარად უნდოდა, რომ ტრავმა მოეყენებინა. ეს ძალიან უხეში თამაში იყო.

ნეიმარი: მაგრამ ეს მსაჯის ბრალი არ ყოფილა...

რონალდო: ჩემი აზრით, მსაჯებმა კარგი ფეხბურთელები უნდა დაიცვან. საუკეთესო მოთამაშეები სხვებზე ხშირად არიან ბურთით და სხვადასხვა ილეთების შესრულებას ცდილობენ. მსაჯების სამუშაო უფრო და უფრო რთული ხდება.

ხშირი წაქცევის გამო ბევრი გაკრიტიკებდა, მაგრამ იმის გათვალისწინებით, რომ ძალიან გამხდარი იყავი, შენთვის საუკეთესო თავდაცვა კარგად წაქცევა იყო. ხალხმა რაც უნდა ის თქვას, შენ - საკუთარი თავი უნდა დაიცვა. ბევრი ტრავმა გადავიტანე და ეს ყოველთვის რთული იყო.

უმეტეს შემთხვევებში, ტრავმებს საკუთარ თავს ვაბრალებდი, როცა მატჩების გამოტოვება მიწევდა. ახლა ვხვდები, რომ საკუთარ თავზე ზედმეტი ზეწოლა არ უნდა მოახდინო. კონცენტრირებული უნდა იყო ტრავმის მოშუშებაზე და იმ ხალხზე, რომელიც შენს გვერდითაა.

ნეიმარი: გეთანხმები, თავი უნდა დავიცვა, რადგან ამას სხვა ჩემს ნაცვლად არ გააკეთებს. ხედავ? თავს არ გავუფრთხილდი და ახლა ფეხი მაწუხებს.

ჩვენთვის, როგორც სპორტსმენებისთვის, ტრავმები ყველაზე რთულია. ამდენი დროის გაცდენა და ტრავმების დაუსრულებელი მკურნალობა კატასტროფაა, მაგრამ ეს ჩვენი სამუშაოს ნაწილია.

#Flashscore