ფეხბურთი / მსოფლიო ფეხბურთი /
Top 5 ფეხბურთელი, რომლებიც 35 წლის შემდეგაც ბრწყინავენ
10/21/2019 14:26
6336

ფეხბურთი ელვის სისწრაფით ვითარდება და ისეთი დრო დადგა, რომ შესაძლოა, ზოგიერთმა კლუბმა 18 წლის ფეხბურთელში 100 მილიონი ევროც კი გადაიხადოს. შესაბამისად, ახალგაზრდები უფრო მეტი ზეწოლის ქვეშ არიან, ვიდრე ადრე. ამ დროს, ვეტერანების დახმარება ძალზე მნიშვნელოვანია. ამის ნათელი მაგალითია 20 წლის მატიის დე ლიხტი, რომელიც იუვენტუსში ლეონარდო ბონუჩისთან და ჯორჯო კიელინისთან ერთადაა, მაგრამ დღეს ახალწვეულებზე არ ვისაუბრებთ. წარმოგიდგენთ 5 საუკეთესო ფეხბურთელს, რომელიც ასაკით 35 წელს ზემოთაა, მაგრამ დღემდე მაღალ დონეზე თამაშობს.

ხოაკინ სანჩესი, 38 წლის, ბეტისი

ხოაკინი ესპანური ფეხბურთის ნამდვილი ლეგენდაა. ძნელად თუ გავიხსენებთ იმ დროს, როცა ის არ თამაშობდა. ახლაც, 38 წლის ასაკშიც, მას ფორმაში არყოფნის არაფერი ეტყობა. ხოაკინი დღესაც ბეტისის ძირითადი შემადგენლობის წევრი და თილისმაა.

მიმდინარე სეზონში, ვეტერანმა ნახევარმცველმა 8 მატჩი ჩაატარა, სადაც გოლი და 2 საგოლე პასი მიითვალა. ეჭვი არავის ეპარება იმაში, რომ ხოაკინი მომდევნო სეზონშიც დიდ ფეხბურთში იქნება.

ფრანკ რიბერი, 36 წლის, ფიორენტინა

ბაიერნში გატარებული წლების შემდეგ, ფრანგი ფლორენციის ფიორენტინაში აღმოჩნდა. ბევრს არ ეგონა, რომ რიბერი ევროპაში დარჩებოდა, მაგრამ ნახევარმცველი დიდი ფეხბურთიდან წასასვლელად მზად არ აღმოჩნდა. გამოცდილმა ფრანგმა ჩინეთსა და აშშ-ში იოლი ფულის კეთებაზე უარი თქვა.

ახალი გუნდის შემადგენლობაში, რიბერიმ 2 გოლი და 1 საგოლე პასი უკვე მიითვალა. ფრანგმა მილანის წინააღმდეგ იმდენად კარგად ითამაშა, რომ ფანებმა ის ტრიბუნიდან აპლოდისმენტებით გააცილეს.

ფაბიო კვალიარელა, 36 წლის, სამპდორია

კვალიარელა კარგი ღვინოსავითაა. იტალიელი კლასიკური მაგალითია იმისა, თუ როგორ უნდა გააუმჯობესო თამაში ასაკის მატებასთან ერთად. სერია ა-ს გასულ სეზონში, მან 26 გოლი გაიტანა და ბომბარდირი გახდა. კვალიარელამ თვით კრიშტიანუ რონალდუს აჯობა!

მართალია, ამ სეზონში მის ანგარიშზე მხოლოდ 1 გოლია, მაგრამ ეს ბევრს არაფერს ცვლის. კვალიარელა თავისი ასაკის ფეხბურთელებს შორის ერთ-ერთი საუკეთესოა.

ჯორჯო კიელინი, 35 წლის, იუვენტუსი

იუვენტუსისთვის კიელინი უმნიშვნელოვანესი წევრია და ძნელია, ეს შეუმჩნეველი დარჩეს. როცა ის თამაშობს, მთელი გუნდი ბოლომდე იხარჯება. მართალია, 35 წლისაა, მაგრამ იუვენტუსისთვის ის შეუცვლელი წევრია. იტალიელს ძირითად შემადგენლობაში ადგილი მხოლოდ სერიოზულმა ტრავმამ დააკარგვინა.

კიელინის მოედანზე მარტისთვის ელიან. ასაკის მიუხედავად, ჯორჯო თავის პოზიციაზე ერთ-ერთი საუკეთესოა.

ტიაგო სილვა, 35 წლის, პსჟ

თუ მსოფლიოში ვინმე 35 წლის ზემოთაა და კიელინიზე უკეთესია, ეს ტიაგო სილვაა. ბრაზილიელმა თავდაპირველად მილანში გაიბრწყინა, შემდეგ კი, პსჟ-ს შეუცვლელი ფიგურა გახდა. მიმდინარე სეზონში ვეტერანმა ბრაზილიელმა 8 მატჩი ჩაატარა და საკმაოდ მაღალ დონეზე იასპარეზა. არადა, ბევრმა არ იცის, რომ კარიერის ადრეულ წლებში, ტიაგო სილვა მოსკოვის დინამომ დაიწუნა და გუნდს არ გააკარა...

#Flashscore