კალათბურთი / NBA /
NBA - ახალი სეზონის პრევიუ (ნაწილი I)
10/21/2019 15:16
385

ნაციონალური საკალათბურთო ასოციაციის 2019/20 წლების სეზონი სპეციალისტების აზრით უკანასკნელ ათწლეულში (მინიმუმ) საუკეთესო უნდა გამოვიდეს. გუნდები ძალიან დაბალანსდნენ, ჩემპიონობისთვის ბრძოლა ძალიან ბევრს შეუძლია, არ არის გამოკვეთილი "თავკომბალა", რომელიც ყველას და ყველაფერს დაამარცხებს.

ვფიქრობ საინტერესო იქნება ყველა გუნდის სათითაოდ განხილვა და გაგება, თუ ვის რა შანსი ექნება (ჩვენი აზრით) ახალ სეზონში. მაშ ასე, ახალი "დუეტების" ლიგა, სადაც წარმატების მიღწევა ბევრს შეუძლია.

 

აღმოსავლეთი (EAST)

 

15. კლივლენდ კავალიერსი

Image result for kevin love

კლივლენელები დიდი ალბათობით ეცდებიან რაც შეიძლება სარფიანად გაცვალონ კევინ ლავი, ტრისტან ტომპსონი და მათ სანაცვლოდ მიიღონ ან დრაფტის პიკები, ანაც ახალგაზრდა და პერსპექტიული მოთამაშეები.

აკრონელთა მთავარი იმედი გასულ სეზონში გამთამაშებელი კოლინ სექსტონი იყო, რომელმაც თავი საკმაოდ კარგად წარმოაჩინა და განვითარება წელსაც უნდა განაგრძოს. კავალიერსმა 2019 წლის დრაფტზე მეხუთე ნომრად დარიუს გარლანდი აირჩია, რომელიც თამაშის სტილით ხსენებულ სექსტონს ჰგავს, თუმცა უკეთ ისვრის. ვნახოთ, რამდენად მოახერხებს გუნდის მთავარი მწვრთნელი ამ მოთამაშეების ერთად გამოყენებას.

გუნდი აშკარა აუტსაიდერია და პლეიოფისთვის ბრძოლის შანსიც არ აქვს, თაობათა ცვლა კი საკმაოდ მძიმედ მიმდინარეობს.

 

14. შარლოტ ჰორნეტსი

შარლოტელთა შემადგენლობა როგორც იქნა დატოვა კემბა უოკერმა, რომელიც წლების მანძილზე გუნდის მთავარ იარაღად ითვლებოდა და თუ გუნდი პლეი ოფის ზონასთან ტრიალებდა სწორედ მისი დამსახურებაა.

ახალ სეზონში ჰორნეტსში აბსოლუტურად განსხვავებული სიტუაცია იქნება. კემბას შემცვლელად გუნდში მოვიდა უნიჭიერესი ტერი როზიერი, რომლისგანაც გულშემატკივრები საკმაოდ ბევრს ელიან. მან მიიღო ყველაფერი, რაზეც ოცნებობდა. გუნდი, რომლის ლიდერიცაა და შეუძლია მის გარშემო საკმაოდ საინტერესო კოლექტივიც შემოიკრიბოს.

აღსანიშნავია ასევე მაილს ბრიჯისი, რომელიც როზიერის მსგავსად ძალიან პერსპექტიულია და შესაძლოა მანაც მოახერხოს კარიერაში დიდი ნახტომის გაკეთება.

კაროლინელებს პლეიოფისთვის ბრძოლა უნდა გაუჭირდეთ, მათი შემადგენლობა ოპტიმალურისგან ძალიან შორსაა.

 

13. ვაშინგტონ ვიზარდსი

დედაქალაქელები პირდაპირ რომ ვთქვათ ერთი კაცის გუნდად იქცნენ. ჯონ ვოლის ტრავმის შემდეგ, სადავეები ხელში ბრედლი ბილმა აიღო და ჯერჯერობით გუნდში ერთადერთი მოთამაშეა, რომელიც კალათბურთს უმაღლეს დონეზე თამაშობს.

საინტერესო იქნება ვეტერანი აიზია ტომასის ამ გუნდში ხილვა, რადგან ბოსტონიდან წასვლის შემდეგ მას არც ერთ გუნდში ასეთი როლი და შესაძლებლობა არ ჰქონია. თუ "პატარა ჯადოქარი" ტრავმებმა არ შეაწუხა, შესაძლოა სელტიკსში გაბრწყინებული მოთამაშის 70-80% მაინც ვიხილოთ.

ყურადღება უნდა გავამახვილოთ იაპონელ რუი ჰაჩიმურასა და ავსტრიელ მორიც ვაგნერზე, რომლებმაც პრესეზონზე თავი საინტერესოდ წარმოაჩინეს.

ვაშინგტონელები წელს საკმაოდ სუსტები იქნებიან, ვნახოთ რამდენად მოახერხებს ბრედლი ბილი გუნდის სისუსტეების დაბალანსებას.

 

12. ნიუ იორკ ნიქსი

ჯულიუს რენდლი, დენის სმიტ ჯუნიორი, კევინ ნოქსი, ბობი პორტისი, ფრენკ ნილიკინა, გუნდში უამრავი ახალგაზრდა და პერსპექტიული მოთამაშეა, თუმცა მთავარი აქცენტი წლევანდელი დრაფტის მესამე არჩევანზე, კანადელ არ ჯეი ბარეტზე კეთდება.

ახალგაზრდა ვარსკვლავმა პრესეზონზე თავი საკმაოდ კარგად წარმოაჩინა და ყველას აჩვენა, რომ NBA-ში საკმაოდ დიდი ამბიციებით მოდის.

ნიქსის პროექტი ბევრი ნიჭიერი მოთამაშიდან რამდენიმეს გამართლებაზე და მათ გარშემო ახალი გუნდის აშენებაზეა ორიენტირებული, ვნახოთ რამდენად გაამართლებს ეს გეგმა.

პლეი ოფისთვის ბრძოლა ვერც "მედისონ სქვეარ გარდენის" ბინადრებმა უნდა მოახერხონ.

 

11. ჩიკაგო ბულსი

"ხარების" მთავარი იმედი ზაკ ლავინია, რომელმაც გასული სეზონი ტრავმის რეაბილიტაციას და გუნდში ადაპტაციას მოახმარა, წელს კი გულშემატკივრები მისგან კარიერის ახალ ეტაპზე ასვლას ელიან.

საინტერესო დანამატია ტომას სატორანსკი და ტადეუშ იანგი, რომლებიც თავიანთ პოზიციაზე მოთამაშე ახალგაზრდა მოთამაშეებს განვითარებაში უნდა დაეხმარონ.

გუნდში არ არის სტაბილური სიტუაცია, საკმარისი კონტიგენტი, რომ მათ პლეი ოფისთვის იბრძოლონ.

 

10. ატლანტა ჰოუქსი

ჯორჯიელთათვის მომავალი სეზონი ახალ საფეხურზე ასვლის საშუალებაა, რომელსაც თუ ტრავმები არ იქნა, გუნდი აუცილებლად გააკეთებს.

მთავარი ვარსკვლავი ცალსახად გამთამაშებელი ტრეი იანგია, რომელმაც გასული სეზონის განსაკუთრებით მეორე ნახევარი უმაღლეს დონეზე ჩაატარა და ყველას აჩვენა, რამდენად კარგი მოთამაშეა წარმოუდგენელი შესაძლებლობებით.

ასევე საინტერესოა ჯონ კოლინსი, რომელიც იანგთან ერთად გამორჩეულ ტალანტად ითვლება. მიმდინარე სეზონში ატლანტელები პლეი ოფში გასვლას ვერ მოახერხებენ, თუმცა ზემოთ ნახსენებ ახალ საფეხბურზე აუცილებლად ავლენ.

 

9. დეტროიტ პისტონსი

დეტროიტი წელსაც ისეთივე გუნდი იქნება, როგორიც გასულ სეზონში, ისინი ზედმეტად არიან დამოკიდებული ბლეიკ გრიფინის უნივერსალიზმზე და საოცარ ტალანტზე. ვერ ვიტყვით, რომ ეს მოთამაშე არაგუნდურია, ან თავის თავზე ზედმეტად ბევრს იღებს, უბრალოდ გუნდი საკმაოდ სუსტია და სხვანაირად ვერაფერს გახდებიან.

ძალიან საინტერესო დანამატია ვეტერანი დერიკ როუზი, რომელმაც გასული სეზონი მინესოტას შემადგენლობაში ძალიან კარგად ჩაატარა და ძველი როუზის ჩრდილი მაინც გვაჩვენა. რამდენად მოახერხებს ის ტრავმის არმიღებას და დეტროიტისთვის პირველ გამთამაშებლად ყოფნას, ამას დრო გვიჩვენებს. ფაქტია, რომ რეჯი ჯექსონმა გაცემული ავანსები საერთოდ ვერ გაამართლა და ყველაზე ახალგაზრდა MVP-ის შესანიშნავი შანსი ეძლევა.

გუნდი პლეი ოფისთვის იბრძოლებს, თუმცა დიდი ალბათობით მაღალი ადგილებისთვის ვერა.

 

8. ორლანდო მეჯიქი

ორლანდო გასულ სეზონთან შედარებით, წელს კიდევ უფრო ძლიერი იქნება, რადგან გუნდმა მოახერხა და შეინარჩუნა ნიკოლა ვუჩევიჩი, ხოლო ახალგაზრდა მოთამაშეები კიდევ უფრო ვითარდებიან.

ეს წელი გარდამტეხი უნდა იყოს აარონ გორდონისთვის, რომელსაც ვარსკვლავობისთვის ყველაფერი აქვს, თუმცა ამისთვის თავისი თამაში ბოლომდე უნდა იპოვოს. საინტერესო მოთამაშეები არიან ჯონათან აიზეკი და მო ბამბა, რომლებიც წელს ბევრად უკეთესები იქნებიან.

ცალკე აღნიშვნის ღირსია მარკელ ფულცი, რომელსაც ტრავმების გამო თავის გამოჩენის საშუალება არ მიეცა, ამას სხვა პრობლემებიც დაემატა და საბოლოოდ ფილადელფიამ ის გაცვალა. ორლანდოში მასზე აქცენტი კეთდება და ვნახოთ რამდენად მოახერხებს განვითარებას.

თუ ეს გუნდი შეკვრას მოახერხებს პლეი ოფში გასვლა არ უნდა გაუჭირდეს, მით უმეტეს ბევრად სუსტ აღმოსავლეთ დივიზიონში.

 

7. ტორონტო რეპტორსი

კავაი ლეონარდის წასვლა ტორონტოს კვლავ "ჩვეულებრივ" რიგით გუნდად აქცევს, რომელსაც მართალია საკმაოდ საინტერესო შემადგენლობა ჰყავს, თუმცა ჩემპიონობის შანსი არ აქვს.

საინტერესოა, რომ გასულ სეზონში გუნდში გამოჩნდა პასკალ სიაკამი, რომელიც მიმდინარე სეზონში გუნდის ლიდერად უნდა იქცეს და ნაწილობრივ კავაი ლეონარდის ფუნქციებიც უნდა იტვირთოს, რამდენად შესწევს მას ამის ძალა ეს ცალკე საკითხია.

კაილ ლოური, მარკ გასოლი და სერჟ იბაკა ძალიან გამოცდილები არიან, მათ უკვე სუპერფინალის მოგების გამოცდილებაც აქვთ, ასე რომ ხსენებული სიაკამთან ერთად ტორონტო საინტერესო და კონკურენტუნარიანი გუნდი იქნება.

 

6. ბრუკლინ ნეთსი

ბრუკლინ ნეთსი ლიგის ერთ-ერთი ყველაზე საინტერესო გუნდია, რომელსაც გულშემატკივრისთვის ძალიან ბევრი სიურპრიზის შეთავაზება შეუძლია.

მართალია მიმდინარე სეზონში გუნდს ლიგის ერთ-ერთი საუკეთესო კალათბურთელი კევინ დურანტი ვერ დაეხმარება, თუმცა გუნდმა მეორე სუპერვარსკვლავი - კაირი ირვინგიც დაიმატა, რომელიც ცალსახად დიანჯელო რასელის გაუმჯობესებული ვერსიაა.

აღნიშვნის ღირსია სპენსერ დინვიდი, კარის ლევერტი, ჯარეტ ალენი და დეანდრე ჯორდანი, რაც ნიუიორკული გუნდის ძალიან ძლიერ შემადგენლობაზე მიგვანიშნებს.

მომავალ სეზონში კაირი ირვინგმა თუ ისეთი ლიდერის როლი მოირგო, როგორსაც დიანჯელო რასელი გვთავაზობდა, გუნდი პლეი ოფის მაღალი საფეხბურისთვისაც იბრძოლებს.

 

5. მაიამი ჰიტი

მაიამელთა მთავარი ძალა უდავოდ ჯიმი ბატლერი იქნება, რომელმაც როგორც ჩანს (როგორც იქნა) თავისი გუნდი იპოვა და აქ დარჩენას დიდი ხანი აპირებს. ვნახოთ, რამდენად კარგად გამოუვა მას ლიდერობა.

აღსანიშნავია, რომ ფლორიდელებმა კონტრაქტი გუნდის მთავარ მწვრთნელს ერიკ სპოელსტრას გაუხანგრძლივეს, რითაც სტაბილურობას შეინარჩუნებენ. მათ "მოიშორეს" ჰასან ვაითსაიდი თავისი დიდი კონტრაქტით, რაც მშვენიერ შანსს მისცემს ბამ ადებაიოს, ასევე საინტერესო იქნება მაიერს ლეობარდის საქმეში ხილვა.

ცალკე აღნიშვნის ღირსია ახალწვეული ტაილერ ჰიროუ, რომელმაც პრესეზონზე თავი საოცრად კარგად წარმოაჩინა. მაიამის პლეი ოფისთვის ბრძოლა არ უნდა გაუჭირდეს.

 

4. ინდიანა პეისერსი

კიდევ ერთი საინტერესო გუნდი (ქართველებისთვის განსაკუთრებით), ძალიან კარგი მწვრთნელით და დაბალანსებული შემადგენლობით.

ქართველი გულშემატკივრის ყურადღება ინდიანაპოლისისკენაა მიპყრობილი, რადგან 2019 წლის დრაფტზე მეთვრამეტე ნომრად გოგა ბითაძე სწორედ ამ გუნდმა აირჩია. ახალგაზრდა ცენტრს ნეიტ მაკმილანმა თავის გამოჩენისთვის სათამაშო დრო უნდა მისცეს და იმედია ის ამას სწორად გამოიყენებს.

სამწუხაროდ, გუნდის უდავო ლიდერი ვიქტორ ოლადიპო პეისერსს შესაძლოა მიმდინარე წელს ვერ დაეხმაროს და თამაში ახალი წლის შემდეგ დაიწყოს. მანამდე ლიდერის ფუნქციების კისრება ახალწვეულ მალკოლმ ბროგდონს, მაილს ტერნერს და დომას საბონისს მოუწევთ.

პლეი ოფში გასვლა გუნდს დიპოს გარეშეც არ უნდა გაუჭირდეს, თუმცა მასთან ერთად ისინი საკმაოდ მაღალი ადგილებისთვისაც გაიბრძოლებენ.

 

3. ბოსტონ სელტიკსი

ბოსტონი იმ იშვიათ გუნდებს მიეკუთვნება, რომელმაც სუპერვარსკვლავი გაუშვა და ამით დასუსტების ნაცვლად გაძლიერდა. დიდად გასაკვირი არ არის, რომ კაირი ირვინგი ბრედ სტივენსის გუნდურ კალათბურთში ვერ ჯდებოდა. ამის და მისი გუნდიდან წასვლის შესახებ ჭორების გამო, მას გუნდში მდგომარეობა დაეძაბა, საბოლოოდ კი გუნდიდან წავიდა.

"კელტებმა" კაირის ნაცვლად კემბა უოკერი მიიყვანეს, რომელიც ბევრად გუნდურ კალათბურთელად ითვლება და ინდივიდუალურად მას ბევრად არ ჩამოუვარდება. ლიდერობის შანსი მიეცემათ ჯეისონ ტატუმს და ჯეილენ ბრაუნს, ვნახოთ რამდენად მოახერხებენ ისინი მის გამოყენებას.

ტალანტი, პერსპექტივა, გუნდურობა, ამ ბოსტონმა შესაძლოა "გაისროლოს", თუმცა საბოლოო ნაბიჯი გადასადგმელია, ეს კი ყველაზე რთული ეტაპია. აღმოსავლეთ კომფერენციის სამეული ამ გუნდისთვის "ჭერი" არ იქნება, წელს თუ არა, მომავალში მაინც.

 

2. ფილადელფია სიქსერსი

ფილადელფია ამ შემადგენლობას წლების განმავლობაში აგროვებდა და როგორც იქნა, ის იდეალურთან ძალიან მიაახლოვეს. ჯიმი ბატლერის გაშვებით, რომელიც თანაგუნდელებით და გუნდით მუდამ უკმაყოფილოა "ფილიმ" გუნდში ბალანსი შეინარჩუნა.

მთავარ ვარსკვლავებს ბენ სიმონსს და ჯოელ ემბიდს შესანიშნავი ურთიერთობა აქვთ. გუნდში მოვიდა ალ ჰორფორდი და ჯოშ რიჩარდსონი, კონტრაქტი გაახანგრძლივა ტობაიას ჰარისმა, ეს ხუთეული ლიგის საუკეთესოობაზეც თავისუფლად გაიწევს.

ძალიან ბევრი რამ ავსტრალიელ ბენ სიმონსზე იქნება დამოკიდებული, სწორედ ის უნდა იყოს ყველაფრის გარდამტეხი, ვნახოთ მოახერხებს თუ არა ავსტრალიელი ამის გაკეთებას.

სიქსერები ჩემპიონობის ერთ-ერთი მთავარი პრეტენდენტები იქნებიან, რადგან შარშანდელისგან განსხვავებით ბევრად კარგი შემადგენლობა ჰყავთ.

 

1. მილუოკი ბაქსი

ვისკონსინელები აღმოსავლეთის საუკეთესო გუნდად მიმაჩნია. ამის მთავარი მიზეზი, გასული სეზონის საუკეთესო მოთამაშე კვლავ საოცარ ფორმაშია, გამოცდილებაც მოემატა და მეტოქეებს მისი შეჩერება კიდევ უფრო გაუჭირდებათ.

დანაკლისად უნდა ჩაითვალოს მალკოლმ ბროგდონის გუნდიდან წასვლა, თუმცა გუნდმა ძალიან კარგი მსროლელი ვესლი მეთიუზი დაიმატა, ასე რომ ბაქსის პერიმეტრი კვლავ მრისხანე იქნება.

მაიკლ ბუდენჰოლზერი ძალიან ძლიერი სპეციალისტია, სწორედ მის სწორ ტაქტიკაში მდგომარეობს "ხარირმების" წარმატების ფორმულა, ის იანისს იდეალურად იყენებს და ეს შედეგს იძლევა.

მილოუკი მომავალ სეზონში სიქსერსის მსგავსად ჩემპიონობის ერთ-ერთი მთავარი ფავორიტი იქნება.

#Flashscore