კალათბურთი / NBA /
NBA - ახალი სეზონის პრევიუ (ნაწილი II)
10/22/2019 17:04
420

დასავლეთი (WEST)

 

15. მემფის გრიზლისი

გრიზლისი ერთ-ერთი უსუსტესი გუნდია, სადაც რეორგანიზაცია მიმდინარეობს. გუნდშია 2019 წლის დრაფტის მეორე არჩევანი ჯა მორანტი, რომელიც უნიჭიერეს მოთამაშედ ითვლება და გუნდის აშენებას სწორედ მის გარშემო აპირებენ.

რა თქმა უნდა, გამოსარჩევია ჯარენ ჯექსონ ჯუნიორიც, რომელმაც ტრავმის მიუხედავად გასული სეზონი უმაღლეს დონეზე ჩაატარა და ყველას დაუმტკიცა, რომ ძალიან მაღალი დონის კალათბურთელია.

პლეიოფისთვის ბრძოლა "დათვებს" არ შეუძლიათ, მათ უფრო მომავლისკენ აქვთ მზერა მიპყრობილი.

 

14. ოკლაჰომა სიტი თანდერი

ოკლაჰომამ პოლ ჯორჯის სანაცვლოდ შეი გილჯეს-ალექსანდერი მიიღო და ახალი გუნდის მშენებლობას სწორედ ამ უნიჭიერესი კანადელი გამთამაშებლის გარშემო აპირებს.

ვესტბრუკი ჯორჯის "პროექტის" ჩავარდნის შემდეგ, ოკლაჰომაში აბსოლუტურად ახალი ერა იწყება. უკანასკნელი "მოჰიკანი" რასელ ვესტბრუკი ძველ მეგობარ ჯეიმს ჰარდენთან წავიდა. ამით გუნდში ძველი ერა დასრულდა.

საინტერესოა, რამდენად მოუნდება ამ გუნდში თამაში კრის პოლს, გააგრძელებს თუ არა იგივე შემართებით თამაშს დანილო გალინარი, როგორი იქნება სტივენ ადამსი, ასევე საინტერესო იქნება დენის შროდერის თამაშის ხილვაც.

ეს გუნდი გარდამტეხ სტადიაშია, თუმცა სიურპრიზების შემოთავაზება შეუძლია. ვფიქრობ, პლეიოფისთვის ბრძოლა ასეთ ძლიერ დასავლეთ კონფერენციაში თანდერებს არ შეუძლიათ.

 

13. მინესოტა ტიმბერვულვზი

ძალიან საინტერესო და იმედისმომცემი გუნდი, რომელმაც ვერა და ვერ გაამართლა გაცემული ავანსები. ეს მეტწილად კანადელი ენდრიუ ვიგინსის დანაშაულია, ვიდრე კარლ-ენტონი თაუნზის, რომელიც შესანიშნავ ფორმაშია და "მგლები" სწორედ მასზე არიან დამოკიდებული.

გუნდს არ ჰყავს მაღალი დონის გამთამაშებელი (ჯეფ ტიგს ასეთად ვერ ჩავთვლით), ამიტომ იყო საუბრები დიანჯელო რასელის რობერტ კოვინგტონში გაცვლის შესახებ. ეს თუ მოხდა გუნდი ბევრად საინტერესო იქნება.

წინა ორი გუნდის მსგავსად მინესოტაც გარდამტეხ სტადიაშია, ჩრდილოელებმა ჯერჯერობით ვერ მოახერხეს იმ გზის პოვნა საითაც დარწმუნებით ივლიან. ამიტომ პლეიოფის ზონა მათთვისაც მიუღწეველი "ციხესიმაგრე" იქნება.

 

12. ფინიქს სანსი

არიზონაში თითქოს ყველაფერი რიგზეა, გუნდში გამთამაშებლის პოზიციაზე მსოფლიო ჩემპიონი რიკი რუბიო მოვიდა, ასევე სანსის წევრი გახდა ხორვატი დარიო შარიჩი, რომელიც საკმაოდ კარგ მოთამაშედ ითვლება.

გასული წლის დრაფრის პირველი არჩევანი დეანდრე ეიტონი წლევანდელ სეზონში კიდევ უკეთესი უნდა იყოს. რაც შეეხება დევინ ბუკერს, სწორედ ის უნდა იყოს გუნდის ლიდერი, თუმცა რამდენად აქვს მას საამისო თვისებები საწყის ტურებშივე გამოჩნდება.

მაიკ დანტონის გუნდის შემდეგ ფინიქსში სიტუაცია არეულია, რამდენად მოხერხდება ამის წლევანდელ სეზონში დალაგება ძნელი სათქმელია. ვფიქრობ ამ გუნდს პლეიოფში გასვლის შანსი, მითუმეტეს ასეთ ძლიერ დასავლეთში ფაქტობრივად არ არის. თუ მათ რამის მიღწევა უნდათ ეიტონი და ბუკერი ერთმანეთს იდეალურად უნდა შეეწყონ, რაც ურთულესი საკითხია.

 

11. საკრამენტო კინგსი

საკრამენტო კინგსი ლიგის ერთ-ერთი ყველაზე საინტერესო გუნდია, რომელსაც ძალიან კარგი მწვრთნელი და შემადგენლობა ჰყავს. ვლადე დივაცმა, რომელსაც თავის დროზე "ბუგი" კაზინსის "სულელურ" გაცვლაში ადანაშაულებდნენ ძალიან კარგი კოლექტივის შეკვრა მოახერხა.

დეივ იეგერს ძალიან კარგი უკანახაზი დეარონ ფოქსი და ბადი ჰილდი ჰყავს, ასევე 2019 წლის დრაფტის მეორე არჩევანს მარვინ ბაგლის მეორე სეზონი ბევრად უკეთესი უნდა ჰქონდეს. საინტერესო იქნება ბოგდან ბოგდანოვიჩი და ჰარისონ ბარნსის თამაშის ხილვა.

საკრამენტო გუნდია, რომელსაც ტალანტთან ერთად აქვს კარგი და გამართული სისტემა. ამ გუნდს შეუძლია ბევრი სიურპრიზის შემოთავაზება. პლეიოფში გასვლა ძალიან რთული იქნება, თუმცა არა წარმოუდგენელი.

 

10. ნიუ ორლეანს პელიკანსი

ზაიონ უილიამსონი, ბრედნან ინგრამი, ლონზო ბოლი, ჯოშ ჰარტი, ჯრუ ჰოლიდეი, ნიკეილ ალექსანდერ-უოკერი... ეს საინტერესო მოთამაშეების არასრული ჩამონათვალია, რომელიც ელვინ ჯენტრის განკარგულებაში იქნებიან.

ნიჭი და ტალანტი რომ ამ გუნდში საკმარისზე მეტია არავინ დავობს, თუმცა რამდენად შეეწყობა ერთმანეთს ამდენი სუპერვარსკვლავის პოტენციალის მოთამაშე, შეძლებს თუ არა ელვინ ჯენტრი მათ გაერთიანებას.

ბევრ კითხვასთან ერთად პელიკანები მედიის და გულშემატკივრების მხრიდან უდავოდ ყურადღების ძალიან ჭარბ მოზღვავებას იგრძნობენ, ასე რომ ნერვების დამშვიდება და საქმის კეთება გართულდება. პლეიოფისთვის ბრძოლა ადვილი არ იქნება, თუმცა არა წარმოუდგენელი.

 

9. დალას მავერიქსი

დალას მავერიქსი წლევანდელ სეზონში ანგარიშგასაწევი ძალა იქნება. ლიგაში ადაპტაცია გაიარა ლუკა დონჩიჩმა, ხოლო კრისტაპს პორზინგისი მძიმე ტრავმის შემდეგ დაბრუნდა და პრესეზონზე თავი საკმაოდ კარგად წარმოაჩინა.

რიკ კარლაილი გუნდს ამ ევროპული დუეტის გარშემო აშენებს, დანარჩენი კალათბურთელები კი მათი დამხმარეებივით უნდა იყვნენ.

ტეხასელებს პოტენციალი უდავოდ აქვთ, თუ რაიმე გაუთვალისწინებელი არ მოხდა, ისინი პლეიოფის საგზურისთვის ბრძოლას მოახერხებენ.

 

8. გოლდენ სტეიტ უორიორსი

უკანასკნელი წლების საუკეთესო გუნდი ძალიან დასუსტდა. "მებრძოლები" ახალ არენა CHASE CENTER-ში გადავიდნენ, თუმცა მათ სუპერვარსკვლავი კევინ დურანტი დააკლდათ. მათთვის მტკივნეული იქნება ანდრე იგუადალასა და შონ ლივინგსტონის გუნდიდან წასვლა, რადგან დაცვა ამით ძალიან შესუსტდება.

უორიორსში მაღალი დონის მცველი მხოლოდ დრეიმონდ გრინია, ტრავმირებულმა კლეი ტომპსონმა შესაძლოა მთელი სეზონი გამოტოვოს, ეს კი გუნდს ძალიან მძიმე მდგომარეობაში აგდებს.

სტეფ კარის გაცილებით კარგი სეზონი ექნება, რადგან დურანტის წასვლის შემდეგ გუნდი მასზე ზედმეტად იქნება დამოკიდებული. რაც შეეხება დიანჯელო რასელს, ის შეტევაში ძალიან კარგია, თუმცა უკლებლივ ყველა ამ ორი ბიჭის დაცვის უნარებზე დარდობს, მათ ძალიან გაუჭირდებათ და არსებობს შანსი, რომ ეს დუეტი მალე დაიშალოს.

პლეიოფში გასვლა გუნდს არ უნდა გაუჭირდეს, თუმდაც მხოლოდ ზემოთ ჩამოთვლილი მოთამაშეების გამო, მაგრამ მეტის შანსი მათ დიდი ალბათობით არ ექნებათ.

 

7. პორტლენდ ტრეილ ბლეიზერსი

პორტლენდი უკანასკნელ წლებში პლეიოფის სტადიამდე შესანიშნავად გამოიყურებოდა, თუმცა იქ უშანსოდ მარცხდებოდა. გასულ სეზონში გუნდმა მოახერხა და ეს ნავსი გატეხა, ბლეიზერსმა ვესტბრუკისა და ჯორჯის თანდერი ასპარეზობას დრამატულ ბრძოლაში გამოთიშა.

შესანიშნავები არიან დემიენ ლილარდი და სი ჯეი მაკკალუმი, რომლებიც ლიგის ერთ-ერთ საუკეთესო უკანახაზს ქმნიან, თუმცა მათი პრობლემა ყოველთვის იყო არასაკმარისად კარგი მაღლები. წელს გუნდმა ტრეიდით მოიყვანა ჰასან ვაითსაიდი, რომელიც ბოლო პერიოდში მაიამიში საშინლად გამოიყურებოდა. საინტერესო იქნება ზაკ კოლინზის, მარიო ჰეზონიას და კენტ ბეიზმორის თამაშის ნახვა, უნდა გამოვარჩიოთ 2019 წლის ოცდამეხუთე არჩევანი ნასირ ლიტლიც.

ბლეიზერებს პლეიოფში გასვლა არ უნდა გაუჭირდეთ, თუმცა მესამე ვარსკვლავის არყოფნა მათ სავარაუდოდ კვლავ საშუალო გუნდად აქცევს, რადგან მხოლოდ ლილარდი და მაკკალუმი წარმატებისთვის არ კმარა.

 

6. სან ანტონიო სპურსი

Image result for dejounte murray contract

სან ანტონიო შარშანდელ წელთან შედარებით გაცილებით უკეთესი იქნება. გუნდის სისტემასთან ადაპტაცია ბოლომდე გაიარა დემარ დეროზანმა და რაც მთავარია შემადგენლობაში დაბრუნდა დეჟანტე მარი, რომელიც წელს ტეხასელთა მთავარი საკვანძო ფიგურა უნდა იყოს.

გუნდში შეიკრიბა ძალიან საინტერესო უკანა ხაზი პატი მილსი, დერიკ უაითი, ლონი უოლკერი, ბრინ ფორბსი და ხსენებული დეჟანტე მარი ერთმანეთს აბალანსებენ, ამ უკანასკნელმა კი დაცვაში მდგომარეობა უნდა გამოასწოროს.

სპურსში დარჩა ვეტერანი რუდი გეი, მოვიდა დემარე კეროლი და ახალგაზრდა ტრეი ლაილზი. მთავარი ფაქტორი კვლავინდებურად გრეგ პოპოვიჩი იქნება, რომელიც ჯიუტად თავისი კალათბურთის თამაშს აპირებს, ვნახოთ ეს რამდენად გაამართლებს. გუნდს პლეიოფისთვის ბრძოლა არც ამჯერად უნდა გაუჭირდეს, თუმცა მაღალი მიზნებისთვის ბრძოლა რთული იქნება.

 

5. ლოს ანჯელეს ლეიკერსი

ლეიკერსმა როგორც იქნა მოახერხა და კარგა ხნიანი პაუზის შემდეგ გუნდში ერთზე მეტი სუპერვარსკვლავი ჰყავს. უნდა აღინიშნოს, რომ ენტონი დევისის გუნდში მოყვანით მათ საკმაოდ რისკიანი გადაწყვეტილება მიიღეს, რადგან მოთამაშე ტრავმებისკენ არის მიდრეკილი.

ლებრონისა და ეი დის დუეტი უდავოდ ლიგაში ერთ-ერთი საუკეთესოა, შარშანდელისგან განსხვავებით კი წელს მათი შემადგენლობა საკმაოდ დაბალანსებული და საინტერესოა.

კაილ კუზმა უნდა გახდეს ის ჯოკერი, რომლითაც გუნდი ახალ სიმაღლეზე ასვლას სწრაფად მოახერხებს. ლეიკერსი არა მარტო პლეიოფის, არამედ ჩემპიონობის მაძიებელიცაა, თუმცა ამაში საკმაოდ ბევრი კონკურენტი ჰყავს.

 

4. იუტა ჯაზი

იუტა ჯაზი ლიგის ერთ-ერთი ყველაზე დაბალანსებული გუნდია. ქუინ სნაიდერმა, რომელმაც ცოტა ხნის წინ კონტრაქტიც გაახანგრძლივა შესანიშნავი კოლექტივი შეკრა, რომელიც ძალიან კარგ კალათბურთს თამაშობს.

ჯაზმენთა მთავარი ვარსკვლავები კვლავ დონოვან მიჩელი და რუდი გობერი იქნებიან. შესანიშნავი დამატებაა მაიკლ კონლი და ბოიან ბოგდანოვიჩი, რომლებიც გუნდს კიდევ უფრო მრავალფეროვანს გახდიან.

აღსანიშნავია, რომ სოლტ ლეიკ სიტელებს საკმაოდ ღრმა სათადარიგო სკამი აქვს. ყველა ფაქტორის გათვალისწინებით გუნდი საკმაოდ ძლიერი "ქონთენდერია" და ჩემპიონობისთვის ბრძოლის ძალაც გააჩნია.

 

3. დენვერ ნაგეთსი

დენვერ ნაგეთსი ბოლო რამდენიმე წელია საოცრად პროგრესირებს. გუნდს აქვს შესანიშნავად აწყობილი სისტემა, რამდენიმე ლიდერი და კარგად დაბალანსებული შემადგენლობა.

ზაფხულში მათ განსაკუთრებული მოქმედება არ გაუკეთებიათ, თუმცა უნდა აღინიშნოს, რომ გუნდს მაიკლ პორტერი დაემატა, რომელიც დრაფტზე არჩევის შემდეგ ტრავმას მკურნალობდა და გუნდის ახალწვეულად ითვლება. ასევე სიახლეა ოკლაჰომადან ჯერამი გრანტის დამატება, ეს მოთამაშეები სამი ნომრის ასე თუ ისე პრობლემურ პოზიციას შეავსებენ.

დენვერის პროგრესიდან გამომდინარე გასაკვირი არავისთვისაა, რომ ნიკოლა იოკიჩის, ჯამალ მარის, გარი ჰარისის და მათი მეგობრების საჩემპიონო შანსები საკმაოდ დიდია.

 

2. ჰიუსტონ როკეტსი

Image result for harden and russ

ჰიუსტონ როკეტსში ორმა სუპერშემტევმა მოიყარა თავი, რომლებსაც ერთად უკვე უთამაშიათ და ერთმანეთთან შესანიშნავი ურთიერთობა აქვთ. თუ ოკლაჰომაში ვესტბრუკის როლი უფრო დიდი იყო, ახლა რასმა ძალიან კარგად იცის, რომ ის ჰარდენის გუნდშია და პირველი ოფცია სწორედ ის იქნება.

სამმაგი დუბლების სპეციალისტს შეუძლია სუპერვარსკვლავებთან თამაში და გავრცელებული აზრის მიუხედავად ის მარტივად თმობს ერთპიროვნულ ლიდერობას. ჰარდენი პოლ ჯორჯზე უკეთესი შემტევია, ამაზე ლაპარაკიც ზედმეტია, მაიკ დანტონის გუნდი ბევრად აწყობილია ვიდრე ბილი დონოვანის ოკლაჰომა, ასე რომ მათ ვესტბრუკთან ერთად რამე განსაკუთრებულისთვის ბრძოლა შეუძლია.

კლინტ კაპელა, ერიკ გორდონი, პი ჯეი ტაკერი, ჯერალდ გრინი, ოსტინ რივერსი, ჰიუსტონი საჩემპიონო გუნდია, თუმცა მათ როგორც ზემოთ ჩამოთვლილ გუნდებს საკმაოდ ბევრი კონკურენტი ეყოლება.

 

1. ლოს ანჯელეს კლიპერსი

ლოს ანჯელეს კლიპერსი უნიკალური გუნდია, რომელმაც შარშანდელ სეზონში სუპერვარსკვლავის გარეშე მოახერხა და დიდი წინააღმდეგობა "მონსტრ" გოლდენ სტეიტ უორიორსს.

ამ გუნდის ძირითადი ბირთვი ლუ უილიამსი, მონტრეზ ჰარელი და პატრიკ ბევერლი შენარჩუნებულია, რასაც ორი სუპერვარსკვლავი კავაი ლეონარდი და პოლ ჯორჯი დაემატა.

კავაი ლეონარდი დღეისთვის მსოფლიოს საუკეთესო მოთამაშედ მიმაჩნია და მისი ასეთ კარგ დაბალანსებულ გუნდში მოხვედრა რასაც ნიშნავს გასულ სეზონში ტორონტო რეპტორსშიც დამტკიცდა.

ლენდრი შემეტი, ივიცა ზუბაჩი, ჯამაიქალ გრინი და მორის ჰარკლესი ამ გუნდს სიღრმეს მატებს. შესანიშნავი მწვრთნელი დოკ რივერსი, რომელსაც საჩემპიონო გამოცდილება აქვს და დანარჩენი ყველა ფაქტორი გუნდს ჩემპიონობის უმთავრეს ფაქტორად აქცევს.

#Flashscore