ფეხბურთი / მსოფლიო ფეხბურთი /
რონალდუს 8 თანაგუნდელი, რომლებსაც მესი უკეთესად მიაჩნიათ
10/25/2019 14:46
8218

კრიშტიანუ რონალდუსა და ლიონელ მესის შედარების თემა აქტუალურობას დღემდე არ კარგავს. წარმოგიდგენთ ფეხბურთელებს, რომლებსაც რონალდუს მხარდამხარ უთამაშიათ, მაგრამ მათ შორის საუკეთესოდ მესის მიიჩნევენ.

  • სიაში განზრახ არ არიან შეყვანილი არგენტინელი მოთამაშეები.

რაიან გიგზი

რონალდუსთან ერთად თამაშობდა 2003-დან 2009 წლამდე

ამჟამად, გიგზი უელსის ეროვნული ნაკრების მთავარი მწვრთნელია. 2003-2009 წლებში, ის მანჩესტერ იუნაიტედში კრიშტიანუ რონალდუს მხარდამხარ თამაშობდა. ცნობილ კითხვაზე მან ასეთი პასუხი გასცა:

“მესი თუ რონალდუ? ორი აზრი არ არსებობს - პასუხი მესია. რონალდუსთან ერთად ვთამაშობდი და მას სიამოვნებით დავასახელებდი, მაგრამ სამართლიანობა მოითხოვს, მესი ვახსენო. მესი ნამდვილი გენიაა. ასეთი ფეხბურთელები შეიძლება ცხოვრებაში ერთხელ ნახო. კრიშტიანუს დასახელება მინდა, მაგრამ მათი შედარება ნამდვილად არ შემიძლია“.

ხოსე მარია გუტიერეს ერნანდესი (გუტი)

რონალდუსთან ერთად თამაშობდა 2009/10 წლებში

გუტიმ რეალის სტრუქტურაში 25 წელი გაატარა. მან მესი რონალდუს პირველად 2013 წელს არჩია: “ამის აღიარება მტკივნეულია, მაგრამ მათ შორის მესის ვირჩევ“.

რამდენიმე წლის შემდეგ, ესპანელმა თავისი აზრი კიდევ ერთხელ დააფიქსირა, მაგრამ “ჩვენება“ ოდნავ შეცვალა: “ადრე დავწერე, რომ მესის რონალდუზე უკეთესად მივიჩნევ. ახლა, შემიძლია ვთქვა, რომ ორივეს ავირჩევდი. მესი უფრო ნიჭიერია, მაგრამ რონალდუმ თავისი თავი თვითონ შექმნა და ნამდვილ ბომბარდირად ჩამოყალიბდა. კრიშტიანუმ მესის ეპოქაში “ოქროს ბურთი“ 5-ჯერ მოიგო, რაც დიდი მიღწევაა“.

უეინ რუნი

რონალდუსთან ერთად თამაშობდა 2004-დან 2009 წლამდე

“რონალდუ თუ მესი? მესი. შესაძლოა, ისინი ფეხბურთის ისტორიაში ორ საუკეთესო ფეხბურთელად მოვიხსენიოთ, მაგრამ ჩემი აზრით, მესი უფრო სრულყოფილია“, - თქვა ინგლისელმა 2018 წელს ერთ-ერთ შოუში.

რამდენიმე თვის შემდეგ, რუნიმ თავისი აზრი კიდევ უფრო განავრცო: “კრიშტიანუმ გრძელი გზა გაიარა: ვინგერიდან ცენტრფორვარდად იქცა. ის მატჩის ბედს ერთი შეხებით წყვეტს, მაგრამ მესი რაღაც წარმოუდგენელს აკეთებს. ის თითქოს მოედნის ცენტრში მისეირნობს, უცებ კი, კართან ახლოს ჩნდება და სანამ მე დავდივარ, გოლს იტანს. მას ყველაფერი აქვს და ამიტომაცაა საუკეთესო“.

რუდ ვან ნისტელროი

რონალდუსთან ერთად თამაშობდა 2003-დან 2006 წლამდე და 2009/10 წლების სეზონში

ახლახანს, ევროპულ მედიაში ჰოლანდიელის ხმამაღალი განცხადება გავრცელდა: “მესი საუკეთესოა, რადგან მასში მბაპეს, ფიგუსა და ზიდანის თვისებები ერთადაა თავმოყრილი“.

მოგვიანებით, თავდამსხმელმა ეს განცხადება უარყო და თქვა, რომ ყველაფერი პრესის მოგონილი იყო, მაგრამ 2018 წელს, მას მსგავსი რამ ნამდვილად ნათქვამი აქვს: “მესი თავის თაობაში საუკეთესოა. სადავო საკითხია, მაგრამ ჩემი აზრით, ის ფეხბურთის ისტორიაში საუკეთესო მოთამაშეა“.

რაული

რონალდუსთან ერთად თამაშობდა 2009/10 წლებში

2015 წელს, როცა რეალის ლეგენდარული კაპიტანი აშშ-ში თამაშობდა, ინტერვიუებს უხვად არიგებდა. ერთ-ერთ საუბარში, მან აღნიშნა: “მქონდა ბედნიერება, მეთამაშა ზიდანთან, რონალდოსთან, ფიგუსთან და კრიშტიანუსთან, მაგრამ მესი ყველასგან განსხვავებულია. ის განსაკუთრებულია. ყველაფერს მარტივად, ზედმეტი ძალდატანების გარეშე აკეთებს, შეუძლებელს ახერხებს“.

როი კინი

რონალდუსთან ერთად თამაშობდა 2003-დან 2006 წლამდე

ირლანდიელმა ლეგენდარული შედარების შესახებ 2015 წელს ისაუბრა, მაშინ, როცა რონალდუსთან ყველანაირი კავშირი დიდი ხნის გაწყვეტილი ჰქონდა: “როცა ვიზრდებოდი, ჩემი კერპი დიეგო მარადონა იყო. კრიშტიანუ წარმოუდგენლად კარგი ფეხბურთელია, მაგრამ მესი საუკეთესოა მათ შორის, ვისი თამაშიც მინახავს. იშვიათად ვაქებ ვინმეს, მაგრამ მესი ამას იმსახურებს. ვცდილობ, მის თამაშში მინუსი დავინახო, მაგრამ ვერ ვახერხებ. ის სრულყოფილებაა“.

პოლ სქოულზი

რონალდუსთან ერთად თამაშობდა 2003-დან 2009 წლამდე

“მინდორზე ბევრი დიდებული ფეხბურთელი მინახავს: კანტონა, ზიდანი, ხავი, პირლო, კრიშტიანუ... საუკეთესოდ მაინც ლიონელ მესის მივიჩნევ. საქმე მხოლოდ გოლებში არაა. შესაძლოა, ზოგმა ფეხბურთელმა ზედიზედ 2-3 მატჩი მაღალ დონეზე ჩაატაროს, მაგრამ ლეო ამას ყოველ კვირაში ახერხებს და ასე უკვე წლებია გრძელდება“, - თქვა სქოულზმა 2015 წელს მას შემდეგ, რაც ბარსამ ჩემპიონთა ლიგა მოიგო.

დიმიტარ ბერბატოვი

რონალდუსთან ერთად თამაშობდა 2008/2009 წლებში

“გეფიცებით, მესი ნამდვილად საუკეთესოა! კრიშტიანუ სუპერია, მაგრამ ლეო უფრო მომწონს. ის თამაშს იდეალურად კითხულობს, მომენტს ქმნის და გოლსაც იტანს. ნამდვილი სრულყოფილებაა! შესაძლოა, მსოფლიოში საუკეთესოც იყოს“.

ბონუსი:

ჟოზე მოურინიო

რონალდუს წვრთნიდა 2010 წლიდან 2013 წლამდე

როცა მოურინიო რეალის მწვრთნელი იყო და რონალდუს ავარჯიშებდა, ლეოსა და კრიშტიანუს შედარებაზე არასდროს საუბრობდა. ის მხოლოდ პორტუგალიელის სათამაშო უნარებს აქებდა, მაგრამ 2016 წელს, დუმილი დაარღვია: “მსოფლიოს ისტორიაში საუკეთესო ფეხბურთელი? სამს დავასახელებ: პელე, მარადონა და მესი“.

 

იხილეთ ასევე: Top 5 ფეხბურთელი, რომლებიც 35 წლის შემდეგაც ბრწყინავენ

#Flashscore