ფეხბურთი / ლა ლიგა /
თეთრი ლეგენდა - რაულ გონსალეს ბლანკო
11/01/2019 17:28
165

რაულ გონსალეს ბლანკო - დაიბადა 1977 წლის 27 ივნისს. რაული ღარიბ ოჯახში ცხოვრობდა. მისი დედა მდიდართა სახლებში მოსამსახურედ მუშაობდა, ხოლო მამა ელექტრიკოსი იყო. თავდაპირველად რაული ატლეტიკოს ბავშვთა სკოლაში მოხვდა, რომელიც მალევე დაიხურა. რაულის მამამ მისი ვაჟი მადრიდის რეალის ბავშვთა გუნდში მიიყვანა საიდანაც მისი დიდებული კარიერა დაიწყო.

1992 წელს რაულმა კასტილიაში სადებიუტო მატჩი ჩაატარა ატლეტიკოს წინააღმდეგ, სადაც მისმა გუნდმა 5-0 მოიგო. რაულმა ამ შეხვედრაში ერთი გოლის გატანა შეძლო. ამავე წელს მან სან ვისენტეს 8 გოლი გაუტანა ერთ მატჩში. 1994 წლის 29 ოქტომბერს შედგა რაულის დებიუტი რეალის პირველ გუნდში. სადებიუტო მატჩში რეალი დამარცხდა. მატჩის შემდგომ კლუბის მაშინდელმა დირექტორმა ხორხე ვალდანომ განაცხადა: ''ამ მატჩამდე 2 დღით ადრე მე რაულს ვუთხარი, რომ ის მალე პირველ გუნდში ითამაშებდა. მის თვალებში მე შიშს ველოდი, მაგრამ დავინახე დიდი სიხარული და ბრძოლის ჟინი.'' ესპანელი ჟურნალისტები იმ პერიოდში რაულს ფერარის ბოლიდს ადარებდნენ.

დადგა პერიოდი, როცა ახალგაზრდა ფორვარდი ვერ იყო მოწოდების სიმაღლეზე, რის გამოც "სამეფო კლუბის" იმდროინდელი მწვრთნელი იუპ ჰაინკესი ბრაზობდა და აცხადებდა, რომ რაულმა მილიონები იშოვა და კარგ თამაშს მოუკლო. ამის შემდეგ მან ბლანკოს ხელფასიც კი შეუმცირა.

რაულის ასეთი მდგომარეობა არც ჟურნალისტებს და ინჩასებს გამოპარვიათ. ჟურნალისტებმა მასზე გამოაქვეყნეს საშინელი სტატიები. პრესა იუწყებოდა, რომ ბლანკო სვამდა და ნარკოტიკებს ეტანებოდა. ამის შემხედვარე გულშემატკივრები სტვენით ეგებებოდნენ რაულს და მის მიმართ სიყვარული უცებ სიძულვილმა შეცვალა.

ამ დროს ახალგაზრდა მოთამაშემ ფოტომოდელი სანსი გაიცნო, რომელზეც მან იქორწინა. დაოჯახებამ რაულზე დადებითად იმოქმედა. მისმა მეუღლემ მას დიდი ფსიქოლოგიური დახმარება გაუწია, რის გამოც რაული მისი მადლიერი იყო და ამას არასდროს მალავდა. ესპანელი მალე ფორმაში შევიდა. ის არაჩვეულებრივი სილამაზის გოლებს იტანდა და თითქმის ყველა გოლს თავის მეუღლეს უძღვნიდა. კლუბის ხელმძღვანელები ამ ფაქტმა იმდენად გაახარა, რომ მას ხელფასი უმალვე მოუმატეს და კონტრაქტიც 2006 წლამდე გაუხანგრძლივეს.

ესპანეთის ეროვნულ ნაკრებშიც იგი ჩინებულ მატჩებს ატარებდა, მაგრამ მას მალე აქაც შეექმნა პრობლემა. ფეხბურთელს პასიურობას აბრალებდნენ, რის გამოც ლუის არაგონესის ესპანეთის მწვრთნელად დანიშვნის შემდეგ მას თითქმის აღარ იძახებდნენ. 2008 წელს ის ევროპის ჩემპიონატზეც არ წაიყვანეს.

ერთი წლით ადრე 2007 წელს რეალის ახალი მწვრთნელი შუსტერი გახდა. ესპანელ ფორვარდს ნაკრებში ხშირად სხვა პოზიციაზე უწევდა თამაში, რის გამოც მის შესაძლებლობებს ბოლომდე ვერ ავლენდა, მაგრამ "სამეფო კლუბში" შუსტერმა მას ზუსტად შეურჩია ადგილი და რაულმა კვლავ გაიბრწყინა. ყველა ფიქრობდა, რომ რაულს მისი ნაკრებისთვისაც შეეძლო დიდი სარგებელის მოტანა, მაგრამ არაგონესმა ის აითვალწუნა და მაინც არ იძახებდა ნაკრებში. რეალში რაულმა 1994 დან 2010 წლამდე ითამაშა. იქ მან ესპანეთის პრიმერა დივიზიონი 6 ჯერ მოიგო. გახდა ჩემპიონთა ლიგის გამარჯვებულიც სამჯერ. 4 ესპანეთის სუპერ თასი, 1 ევროპის სუპერ თასი, 2 საკონტინენტთაშორისო თასი. ორჯერ გახდა ლა ლიგის საუკეთესო ბომბარდირი და ამდენჯერვე ჩემპიონთა ლიგის. 2007-2008 წლებში გახდა პრიმერა დივიზიონის საუკეთესო ფეხბურთელი. 2014-15 წლის სეზონის დაწყებამდე წლების მანძილზე იყო ჩემპიონთა ლიგის ყველა დროის საუკეთესო ბომბარდირი, მაგრამ ამჟამად მას ლეო მესიმ და კრიშტიანო რონალდუმ გადაასწრეს და ის მესამე პოზიციაზე ჩამოქვეითდა.

2010 წელს მას რეალის დატოვება მოუწია და 2 სეზონი შალკეში გაატარა. ლეგენდარული ესპანელი გერმანელებმა დიდი სიყვარულით მიიღეს. ის ახალ კლუბშიც ჩინებულად გამოიყურებოდა. გერმანიაში მან 2 ტიტული მოიგო (გერმანიის თასი: 2010–11 & გერმანიის სუპერთასი: 2011). შემდგომ მან 2 სეზონი ალ - სადიში გაატარა და გახდა კიდევ 2 ტიტულის მფლობელი (ყატარის ვარსკვლავების ლიგა: 2012–13 & ყატარის თასი: 2014).

რაული 2 ჯერ გახდა პიჩიჩის მფლობელი. ჩემპიონთა ლიგის საუკეთესო ფორვარდად დასახელდა 3 ჯერ. რეალში მან 323 გოლის გატანა მოახერა და ჩაატარა 741 მატჩი. 228 გოლი მან ლა ლიგაში გაიტანა სადაც 550 შეხვედრა გამართა. 150 მატჩი ევროტურნირებზე. 5 ჯერ გახდა ლა ლიგის საუკეთესო ესპანელი ფეხბურთელი.

საბოლოოდ კი რაულის კარიერა 2015 წელს ნიუ-იორკ კოსმოსში დასრულდა. მას მის მშობლიურ რეალში გამოსამშვიდობებელი მატჩიც მოუწყვეს, სადაც დიდი კაპიტანი საბოლოოდ დაემშვიდობა ქომაგებს.

#Flashscore