კალათბურთი / ქართული კალათბურთი /
დაუწერელი კანონის დამრღვევი ბითაძის წარმატებული მატჩი
11/02/2019 21:46
297

გოგა ბითაძემ ინდიანაში გადასვლის შემდეგ საუკეთესო მატჩი ჩაატარა, რაც კავალიერსთან შეხვედრის მიმოხივლაში NBA-ს ოფიციალურ ვებგვერდზეც აღინიშნა. 

მატჩის მიმდინარეობისას გოგამ კლივლენდის წაქცეული კალათბურთელი, ჯორდან კლარკსონი წამოაყენა, რითაც ლიგის "დაუწერელი კანონი" დაარღვია და მეტოქე გუნდის მოთამაშეს დაეხმარა. 

"ვიფიქრე, ტრავმა მიიღო და დახმარება გადავწყვიტე. მინდოდა დავრწმუნებულიყავი, რომ კარგად იყო, რადგან არცერთი მოთამაშის ტრავმა არ გამიხარდება. ამით პატივისცემას გამოვხატავ, თუმცა, თუ მათ არ სურთ, მომავალში ასე აღარ მოვიქცევი", - განაცხადა გოგამ. 

"პეისერსი ბედნიერი უნდა იყოს, თუ ეს ბითაძის ერთადერთი შეცდომა იყო. კლივლენდთან მოედანზე გატარებულ 25 წუთში მოპოვებული 10 ქულა და 9 მოხსნა გადამწყვეტი იყო მიმდინარე სეზონში ზედიზედ მეორე გამარჯვების მოსაპოვებლად. ტერნერის ტრავმის გამო ბითაძეს მომდევნო მატჩებში მეტი დრო მიეცემა", - წერს ლიგის ოფიციალური ვებგვერდი, სადაც ინდიანელთა მთავარი მწვრთნელის კომენტარსაც ვკითხულობთ: 

"ნელნელა, ის შეძლებს ჩვენს დახმარებას. ბითაძემ და საბონისმა კარგად გაართვეს თავი, ორივე "მაღალი" გვჭირდებოდა კლივლენდის კევინ ლავისა და ტრისტან ტომპსონის წინააღმდეგ. ვფიქრობ, მან კარგი სამუშაო გასწია მოედანზე, ის ეჩვევა უბურთოდ თამაშს", - განაცხადა პეისერსის მთავარმა მწვრთნელმა, ნეით მაკმილანმა მატჩის დასრულების შემდეგ. 

ახალგაზრდა ქართველი ცენტრის შესახებ კომენტარი პეისერსის ლიეტუველმა ლიდერმა, დომანტას საბონისმა გააკეთა და განაცხადა, რომ ქართველს ხშირად აძლევს რჩევებს, თუმცა ცდილობს ზომიერი იყოს. 

"ის შესანიშნავაი ბიჭია და სულ თვალებში გვიყურებს მე და მაილსს (ტერნერი). მართალია, თავს "მოხუცად" ვგრძნობ, თუმცა ვცდილობ სწორი მაგალითი მივცე. მეც ყველას ვუსმენდი, როცა ლიგაში ახალბედა ვიყავი, თუმცა ძალიან არ მიყვარდა, ყველა რომ ყურში რაღაცას ჩამყვიროდა. ამიტომ, გოგასთან ასე არ ვიქცევი. არ მინდა დიდად შევაწუხო", - განაცხადა საბონისმა.

კლივლენდთან წარამტებული მატჩი თავად გოგამაც შეაფასა და აღნიშნა, რომ თავის დაჩაგვრის უფლებას არავის მისცემს.

"ყოველდღიურად ვმუშაობ და ვცდილობ რომ უფრო ძლიერი, ათლეტური და ფეთქებადი გავხდე. ვფიქრობ, საკმარისად ღონიერი ვარ იმისთვის, რომ მოედანზე გავიდე და არავინ დამჩაგროს. ვიცი, რომ ახალბედა ვარ და მეტოქეები ჩემს დაჩაგვრას შეეცდებიან, მაგრამ ეს არ მოხდება", - აღნიშნა გოგამ. 

ინდიანას გამარჯვებას ცნობილი ამერიკელი ჟურნალისტი, ზაკ ლავი გამოეხმაურა და აღნიშნა, რომ გოგამ ინდიანელთა რიგებში კარგი წუთები ჩაატარა და საინტერესო იქნება, როგორ განვთარდება ტერნერის ტრავმის ფონზე პეისერსის თამაში. 

რეგულარული ჩემპიონატის მომდევნო მატჩს ინდიანა ჩიკაგო ბულსის წინააღმდეგ 4 ნოემბერს, თბილისის დროით 02:00-ზე გამართავს.

 

#Flashscore