სხვა / ძიუდო /
ისტორიული შედეგი ქალთა ძიუდოში - გუნდური პირველი ადგილი ევროპის ჩემპიონატზე
11/05/2019 0:44
217

ევროპის ახალგაზრდული ჩემპიონატი ქართული ძიუდოისთვის გამორჩეული გამოდგა. 

რუსეთის ქალაქ იჟევსკში, 23 წლამდე ძიუდოისტთა შორის ჩატარებულ ტურნირზე საქართველოს ქალთა ნაკრებმა ორი ოქროს მედალი მოიპოვა და პირველად ქართული ძიუდოს ისტორიაში გუნდურ ჩათვლაში პირველ ადგილზე გავიდა. 

- 57 კგ. წონით კატეგორიაში, ეთერ ლიპარტელიანმა ფინალში ტურნირის მასპინძელი, რუსეთის წარმომადგენელი დანა ნაგუჩევა დაამარცხა და მსოფლიო ჩემპიონატის მსგავსად, რუსეთშიც ააჟღერა საქართველოს ჰიმნი. 

ტურნირის საწყის ორ შეხვედრაში ლიპარტელიანმა წმინდა გამარჯვებები მოიპოვა უნგრელ და ხორვატ მეტოქეებთან, ნახევარფინალში კი ასევე იპონით დაამარცხა პორტუგალიელი მოწინააღმდეგე.

ტურნირის მეორე დღეს თანაგუნდელს მარიამ ჭანტურიამ მიბაძა და საქართველოს ნაკრებს მეორე ოქროს მედალი შესძინა.

ჭანტურიამ (-70 კგ.) ისრაელის, ბელარუსის და ხორვატიის წარმომადგენლებს იპონით სძლია, ოქროს მედლისთვის შეხვედრაში კი ჰოლანდიელ ჰილდა იაგერთან ვაზარით გაიმარჯვა.

2017 წლის ევროპის ახალგაზრდულ ოლიმპიურ ფესტივალზე ჩემპიონობის შემდეგ, პირველ მნიშვნელოვან წარმატებას მიაღწია და ისტორიული შედეგის დაფიქსირებაში მნიშვნელოვანი წვლილი შეიტანა. 

ოქროს მედლის გარეშე დაასრულეს კონტინენტის პირველობა ვაჟებმა, თუმცა საქართველოს ნაკრების ყულაბას სამი მედალი შესძინეს. 

ერთი ვერცხლის და ორი ბრინჯაოს მედლით საქართველოს ნაკრები, რომელიც ტურნირზე გადახალისებული შემადგენლობით გაემგზავრა, ვაჟებში მეხუთე ადგილზე გავიდა. 

შეგახსენებთ, რომ ბრინჯაოს მედლები ჯაბა პაპინაშვილმა და თემურ ნოზაძემ მოიპოვეს, ონისე სანებლიძე კი ფინალში გავიდა, თუმცა ვერცხლის მედალს დასჯერდა

საერთო ჯამში, საქართველოს ნაკრებმა ევროპის ახალგაზრდული ჩემპიონატი 5 მედლით დაასრულა და გუნდურ ჩათვლაში მესამე ადგილზე გავიდა.

ქართველი ძიუდოისტები მხოლოდ პირველ ადგილზე გასულ მასპინძელ რუსეთსა და მეორეადგილოსან უნგრეთს ჩამორჩნენ.

 

 

 

#Flashscore