რაგბი / მსოფლიო თასი /
პოლარდი საჩემპიონო ტურნეს გამოაკლდა
11/09/2019 10:45
96

მოგეხსენებათ, რომ 2019 წლის რაგბის მსოფლიო თასის გამარჯვებული ნაკრები სამხრეთ აფრიკა გახდა. ამ მომენტისთვის გუნდი გაჩემპიონებით ხარობს და თასი მთელი ქვეყნის მასშტაბით მოგზაურობს. აღნიშნულ საჩემპიონო ტურნეს გამოაკლდა "სპრინგბოკსის" ერთ-ერთი მთავარი შემოქმედი, ანდრე პოლარდი.

ის საავადმყოფოში იმყოფება და ამ ტურნეს სწორედ იქიდან ადევნებს თვალს. ფინალში, სადაც სამხრეთ აფრიკელებმა 32:12 დაამარცხეს ინგლისელები, 22 ქულა სწორედ პოლარდმა მოიტანა და აღნიშნულ შეხვედრაში მან თვალის ბუდის დაზიანება მიიღო. სწორედ ამიტომ საჭირო გახდა მისი მკურნალობა და საავადმყოფოში დაწვენა. ანდრე დაახლოებით 6 კვირას იუქმებს. შეგახსენებთ, რომ პოლარდი 69 ქულით მსოფლიო თასის საუკეთესო მექულე გახდა.

"თასის მოგებით რა თქმა უნდა ბედნიერი ვარ, თუმცა გული ძალიან მწყდება, რომ ეს ის საჩემპიონო ტურნე არ არის, რომელიც მე წარმომედგინა. ვებ ელისის თასი ქვეყნის მასშტაბით მოგზაურობს და მორაგბეები სიხარულს გულშემატკივრებს უზიარებენ. ეს დიდებული სანახაობაა, თუმცა ჩემდა სამწუხაროდ მე მასში მონაწილეობას ვერ ვიღებ." - განაცხადა ანდრე პოლარდმა.

#Flashscore