ფეხბურთი / მსოფლიო ფეხბურთი /
პელე: "მბაპეს შეუძლია ახალი პელე გახდეს"
01/15/2019 19:49
492

მსოფლიო ფეხბურთის ბრაზილიელმა ლეგენდამ პსჟ-ს ფრანგ ვარსკვლავზე ისაუბრა.

პელეს თქმით, კილიან მბაპეს შეუძლია ახალი პელე გახდეს. ამავდროულად მსოფლიოს სამგზის ჩემპიონმა თანამემამულე ნეიმარი გააკრიტიკა.

"გასულ სეზონში კილიანი უკვე შევაქე და აღვნიშნე, რომ ის არაჩვეულებრივი ფეხბურთელია. ვიღაცები ორი-სამი წლის წინ მას ნეიმარს ადარებდნენ, მე ის სწორედ ამ დროს შევამჩნიე. მან მსოფლიო ჩემპიონატი 19 წლის ასაკში მოიგო, მე კი სულ რაღაც ჩვიდმეტის ვიყავი. ვთქვი, რომ ის თითქმის გამითანაბრდა. ვფიქრობ, მას შეუძლია ახალი პელე გახდეს! ზოგს ჰგონია, რომ ვხუმრობ, მაგრამ არა, ეს ხუმრობა არ არის", - განაცხადა პელემ.

მან ასევე აღნიშნა, რომ ბრაზილიისა და ეროვნული ნაკრებისთვის საუკეთესო უნდა, სწორედ ამიტომ ხშირად აკრიტიკებს ნეიმარს.

"მამა არ აკრიტიკებს, ის ასწავლის. ხალხს მიაჩნია, რომ ნეიმარს ყურს ხშირად ვუწევ, მაგრამ ამას მხოლოდ მის სასიკეთოდ ვაკეთებ. მისთვის, ბრაზილიისთვის, ეროვნული ნაკრებისთვის საუკეთესო მინდა. ყველაფერს გავაკეთებ, რომ დავეხმარო, ნუ იდარდებთ. ბოლო ორი წლის განმავლობაში მას უნდოდა გამოჩენილიყო. ამას ის არა გოლების გატანითა და ტექნიკური მოძრაობებით, არამედ სიმულაციით აკეთებდა. თუმცა ამაზე ბევრჯერ მისაუბრია მასთან, ასევე მამამისთან, ჩვენ ხშირად ვსაუბრობთ. როგორც ვატყობ, მან საბოლოოდ გაიგო. ის უდაოდ ერთ-ერთი საუკეთესოა მსოფლიოში და იმედი მაქვს, მალე საუკეთესო გახდება", - აღნიშნა პელემ.

#Flashscore