ფეხბურთი / ქართული ფეხბურთი /
ახალგაზრდული ნაკრები სლოვაკეთთან დრამატულ მატჩში დამარცხდა
11/18/2019 23:03
289
Loading the player...

ევროპის ჩემპიონატის საკვალიფიკაციო ეტაპზე წარმატებული სტარტის შემდეგ, საქართველოს 21 წლამდე ფეხბურთელთა ნაკრებმა ზედიზედ მესამე მარცხი იწვნია. 

სლოვაკეთის ახალგაზრდულ ნაკრებთან შეხვედრა, რომელიც ქალაქ ნიტრაში გაიმართა, გია ცეცაძის გუნდმა აქტიურად დაიწყო და მე-5 წუთზე გიორგი კუციას გოლით დაწინაურდა. ტაიმის პირველი ნახევარი საქართველოს ნაკრების უპირატესობით წარიმართა, თუმცა 28-ე წუთზე სლოვაკებმა კოლეშარის გოლით გაათანაბრეს. მე-40 წუთზე საქართველოს ნაკრების მდგომარეობა კიდევ უფრო მეტად დამძიმდა, როდესაც ლუკა ლოჩოშვილი მეტოქესთან ორთაბრძოლის დროს მსაჯმა დააჯარიმა და მეორე ყვითელი ბარათით მოედნიდან გააძევა.

მეორე ნახევარი სლოვაკეთის უპირატესობით წარიმართა, რაც სტუმართა კარში გატანილი კიდევ ორი გოლით აისახა. ჰერცის და გამბოსის ზუსტი დარტყმებით სლოვაკეთმა ორბურთიანი უპირატესობა მოიპოვა, თუმცა თამაში ბოლო წუთებზე მაინც დაიძაბა. პოკორნის გაძევების შემდეგ, მოედანზე ფეხბურთელთა რაოდენობა გათანაბრდა, 89-ე წუთზე კი ნუგზარ სპანდერაშვილმა ანგარიშში სხვაობის შემცირება შეძლო. მსაჯის მიერ კომპენისირებულ წუთებზე გატანის შანსი ჯერ ნიკა ნინუას, შემდეგ კი გიორგი კუციას ჰქონდა, თუმცა უშედეგოდ. 

სამწუხაროდ, დაძაბულ შეხვედრას უსიამოვნო ინციდენტის გარეშე არ ჩაუვლია. მატჩის ბოლო წუთებზე ვითარება სათადარიგოთა სკამებთან დაიძაბა, მოგვიანებით კი ჩხუბი გადაიზარდა, რაც საქართველოს ნაკრების მწვრთნელის, გია ცეცაძის გაძევებით დასრულდა. 

საკვალიფიკაციო ეტაპის მომდევნო მატჩს საქართველოს ახალგაზრდული ნაკრები 26 მარტს, თბილისში, დღევანდელი მეტოქის წინააღმდეგ გამართავს. 

#Flashscore