ფეხბურთი / ლა ლიგა /
ლიონელ მესი "ოქროს ბურთის" გამარჯვებულია
12/03/2019 0:32
495
  • ლიონელ მესი წლის საუკეთესო ფეხბურთელად კიდევ ერთხელ დაასახელეს
  • არგენტინელმა "ოქროს ბურთი" მეექვსედ მოიგო

საფრანგეთის დედაქალაქ პარიზში, შატლეს თეატრში "ოქროს ბურთის" დაჯილდოების რიგით 64-ე ცერემონია გაიამრთა.

France Football-ის მორიგ დაჯილდოებაზე თავი მსოფლიოს საუკეთესო ფეხბურთელებმა მოიყარეს. ცერემონიის კულმინაცია კი ბოლოს შედგა, სადაც "ოქროს ბურთის" მამაკაცი გამარჯვებული გამოავლინეს.

30 ნომინანტს შორის ჟურნალისტებმა ერთი საუკეთესო გამოავლინეს. საბოლოოდ კი 446 ქულით "ოქროს ბურთის" 2019 წლის გამარჯვებული ლიონელ მესი გახდა, რომელმაც ტიტული მეექვსედ მოიგო. აღსანიშნავია, რომ ბარსელონას კაპიტანმა მორიგი რეკორდი დაამყარა - იგი პირველი ფეხბურთელია, რომელმაც ექვსი "ოქროს ბურთის" მოგება შეძლო. მის შემდეგ იუვენტუსი პორტუგალიელი სუპერვარსკვლავი, კრიშტიანუ რონალდუ მოდის, რომლის ანგარიშზეც ხუთი ოქროს ბურთია.

"ოქროს ბურთის" გათამაშებაში მეორე ადგილი ლივერპულის ჰოლანდიელმა მცველმა, ვირჯილ ვან დეიკმა დაიკავა, რომელმაც წელს უეფას ევროპის წლის საუკეთესო ფეხბურთელის ჯილდო მოიგო.

ყველაზე პრესტიჟული საფეხბურთო ჯილდოს ათეული კი ასე გამოიყურება:

1. ლიონელ მესი

2. ვირჯილ ვან დეიკი

3. კრიშტიანუ რონალდუ

4. სადიო მანე

5. მოჰამედ სალაჰი

6. კილიან მბაპე

7. ალისონ ბეკერი

8. რობერტ ლევანდოვსკი

9. ბერნარდო სილვა

10. რიად მაჰრეზი

სარეკორდო მეექვსე "ოქროს ბურთი"

ლიონელ მესიმ "ოქროს ბურთების" მოგება 2009 წლიდან დაიწყო და ზედიზედ ოთხჯერაც (2009, 2010, 2011, 2012) აღმართა. აღსანიშნავია, რომ ზედიზედ ოთხჯერ "ოქროს ბურთი" არცერთ ფეხბურთელს მოუგია. ლეომდე რეკორდი ლეგენდარულ ფრანგ ფეხბურთელს, მიშელ პლატინის ეკუთვნოდა, რომელმაც ეს პრესტიჟული ჯილდო ზედიზედ სამჯერ მოიგო, თუმცა არგენტინელმა ეს რეკორდიც მიისაკუთრა.

გარდა ამისა, იგი პირველი ფეხბურთელი გახდა, რომელმაც ოთხი ოქროს ბურთი მოიგო, თუმცა მოგვიანებით რაოდენობაში მას კრიშტიანუ რონალდუ გაუთანაბრდა. 32 წლის ლიონელ მესიმ კი რონალდუს კიდევ ერთხელ აჯობა და "ოქროს ბურთების" რაოდენობაში კიდევ ერთხელ წინ გაიჭრა (მესი 6:5 რონალდუ).

შეგახსენებთ, რომ ლიონელ მესიმ 2019 წელს ბარსელონასთან ერთად ესპანეთის ჩემპიონატი მოიგო, კოპა ამერიკაზე არგენტინასთან ერთად კი ბრინჯაოს მედალს დასჯერდა. არგენტინელმა გასულ სეზონში ლა ლიგაში 36 გოლი გაიტანა და ევროპის ოქროს ბუცის მფლობელიც გახდა. მიუხედავად იმისა, რომ მისი გუნდი ტურნირს ნახევარფინალში ლივერპულთან საოცარი "ქამბექით" გამოეთიშა, ლეო ჩემპიონთა ლიგის საუკეთესო ბომბარდირიც გახდა. სექტემბერში კი ლეო მესის ფიფას The Best-ის ტიტული გადაეცა. ეროვნული ნაკრებების მთავარმა მწვრთნელებმა, კაპიტნებმა და ჟურნალისტებმა ბარსელონას კაპიტანი წლის საუკეთესო ფეხბურთელად აირჩიეს.

ასევე იხილეთ: ფიფას წლის საუკეთესო ფეხბურთელი ლიონელ მესი გახდა

#Flashscore