ფეხბურთი / მსოფლიო ფეხბურთი /
ფრანჩესკო ტოტი - რომის სიამაყე
12/05/2019 12:01
345

 

ფრანჩესკო ტოტი - დაიბადა 1976 წლის 27 სექტემბერს იტალიის დედაქალაქ რომში. ტოტის ფეხბურთი ბავშვობიდან უყვარდა და მისი თამაში რომას ბავშვთა გუნდში 1989 წელს დაიწყო. როგორც თავად აცხადებდა, მისი კუმირი რომაული კლუბის კაპიტანი ჯუზეპე ჯიანინი იყო.
თავდაპირველად ტოტის დაბალი სიმაღლის გამო თანატოლები გნომს ეძახდნენ, თუმცა ასაკის მატებასთან ერთად ტოტის სიმაღლეც დარეგულირდა. მისი დებიუტი რომაში 1993 წელს შედგა ბრეშას წინააღმდეგ. პირველი გოლი მან 1994 წელს ფოჯას კარში გაიტანა. ტოტი ნელ-ნელა გუნდის ლიდერად ყალიბდებოდა.
 
ზემანის მწვრთნელობის პერიოდში 30 გოლი გაიტანა და 1998 წლის მსოფლიო ჩემპიონატზე გამოძახებამაც არ დააყოვნა. ამავე წელს ტოტი გახდა იტალიის სერია ა - ს საუკეთესო ახალგაზრდა ფეხბურთელი. 2001 წელს რომას ფაბიო კაპელო წვრთნიდა, მან მთელი გუნდი სწორედ ტოტის გარშემო ააწყო. როგორც შემდეგ აღმოჩნდა, ამ ექსპერიმენტმა გაამართლა რომა იტალიის ჩემპიონი გახდა. ტოტიმ სკუდეტოსთან ერთად წლის საუკეთესო იტალიელი ფეხბურთელის ტიტული არავის დაუთმო.
 
2003-2004 წლის სეზონში ტოტის რომაში 3-5-2 ტაქტიკაზე მოუწია თამაში , სადაც მას ჩინებული მაჩვენებელი ჰქონდა. გაიტანა რა 20 გოლი. იმ სეზონში რომაელებს საჩემპიონო ბრძოლაში მილანმა აჯობა. ტოტი კვლავ გახდა საუკეთესო ფეხბურთელი. ფრანჩესკო 1993 წლიდან კარიერის ბოლომდე მხოლოდ ერთი გუნდის, რომას ღირსებას იცავდა.
 
იტალიელი ფორვარდის სანაკრებო კარიერა 15 წლამდელთა ასაკობრივ გუნდში დაიწყო. მან ითამაშა 16, 18, 21, 23 წლამდე ასაკის გუნდებშიც რის შემდეგაც 1998 წელს "სკუადრა აძურაში" გამოიძახეს. ტოტიმ ეროვნულ ნაკრებში 2006 წლამდე ითამაშა და 58 მატჩში 9 გოლი გაიტანა. იტალიის მაისურით ტოტი პირველად ევრო 2000 - ზე გამოჩნდა შვეიცარიის ნაკრების წინააღმდეგ მატჩში. 2006 წლის მუნდიალზე კი მან მსოფლიო ჩემპიონობა იზეიმა.
 
ფრანჩესკოს აგენტების განცხადებით, მას ყოველთვის უამრავი შემოთავაზება ჰქონდა ევროპის წამყვანი კლუბებისაგან, მაგრამ ის მათ არც კი განიხილავდა და მუდამ ამბობდა, რომ რომას გარდა სხვა კლუბი არ აინტერესებდა.
 
ტოტიმ "მგლების" შემადგენლობაში მოახერხა იტალიის სერია ა-ს მოგება. ასევე იტალიის თასის ორჯერ და იტალიის სუპერთასის აგრეთვე ორჯერ. 1996 წელს იტალიის 21 წლამდელებთან ერთად გახდა ევროპის ჩემპიონატის გამარჯვებული. გარდა იმისა, რომ ტოტიმ "სკუადრა აძურასთან" ერთად მოახერხა 2006 წლის მუნდიალის მოგება, ამავე ნაკრებთან ერთად 2000 წელს ევროპის ჩემპიონატზე დაიკავა მეორე ადგილი.
 
ტოტი არის სერია ა -ს საუკეთესო ახალგაზრდა ფეხბურთელი 1999წელს. ის მოხვდა ევრო 2000 - ის სიმბოლურ ნაკრებში. ფიფამ ფრანჩესკო 100 საუკეთესო ფეხბურთელში შეიყვანა. 2007 წელს გახდა ოქროს ბუცის მფლობელი. ამავე წელს სერია ა -ს ბომბარდირი.
 
ტოტი არის რომას ყველა დროის საუკეთესო ბომბარდირი - 307 გოლით. რომაელთა საამაყო კაპიტანს ყველაზე მეტი მატჩი აქვს ჩატარებული ''მგლების'' შემადგენლობაში - 786 შეხვედრა. ტოტი მოხვდა 2006 წლის მუნდიალის სიმბოლურ ნაკრებშიც. ორჯერ გახდა სერია ა -ს საუკეთესო ფეხბურთელი. ხუთჯერ მიიღო იტალიის საუკეთესო ფეხბურთელის წოდება. ევროპის ყველაზე პრესტიჟულ ტურნირზე, ჩემპიონთა ლიგაზე ტოტი არის ყველაზე ხანდაზმული ფეხბურთელი, რომელმაც გოლი გაიტანა. ფრანჩესკო ტოტი რომას გულშემატკივრებს რომ ძალიან უყვართ, მათ ეს არაერთხელ დაუმტკიცებიათ.
 
ლეგენდარული იტალიელის კარიერა რომაულ კლუბში 2017 წელს დასრულდა.
 
''სიმართლე გითხრათ, ჩემი ცხოვრება რომას და ფეხბურთის გარეშე ვერც კი წარმომიდგენია. არ ვიცი რა უნდა ვაკეთო, როცა დიდ ფეხბურთში აღარ ვიქნები, მაგრამ ალბათ ყოველდღიურად გავიხსენებ იმ მომენტებს, რომლებიც განსაკუთრებულად დამამახსოვრდა. რომა - ეს ჩემი ცხოვრების უდიდესი ნაწილია, რომელიც მუდამ ჩემს გულში იქნება. მე ალბათ ძალიან იღბლიანი ადამიანი ვარ, რადგან წილად მხვდა ბედნიერება, რომ ამხელა სიყვარული მეგრძნო ხალხისგან. ეს ჩემი კარიერის ყველაზე დიდი მონაგარია. არ არსებობს ამაზე დიდი ჯილდო. ჩემი კარიერით ამაყი ვარ. როგორც კლუბში, ასევე ნაკრებში ვითამაშე უამრავ ჩინებულ ფეხბურთელთან ერთად. მყავდა არაჩვეულებრივი მწვრთნელები და მათთან ერთად ვიბრძოდი ყოველი კრიზისის დროს. ჩემთვის ფეხბურთის ხიბლიც სწორედ ამაში მდგომარეობს, რომ რთული პერიოდები წარმატებით გადავლახო. 2000-2001 წლებში, როცა სკუდეტო მოვიგეთ, ყველაზე ბედნიერი ადამიანი ვიყავი. მახსოვს იმ დროინდელი ჩვენი შემადგენლობა. განსაკუთრებით კი ბატისტუტა, რომელიც ჩემთან ერთად ზედიზედ 3 დღე სვამდა. ჩემი კარიერის ყველაზე დიდი მიღწევ რა თქმა უნდა იტალიის ნაკრებთან ერთად მსოფლიო ჩემპიონატის მოგებაა. "სკუადრა აძურას" შემადგენლობაში ნებისმიერი იტალიელი ორმაგი მონდომებით თამაშობს ყოველ მატჩს. ალბათ შეგიმჩნევიათ თუ როგორ განსაკუთრებულად ვასრულებთ ჰიმნს. იტალიელი ხალხისთვის საერთაშორისო ასპარეზზე გამარჯვება - ეს მწვერვალია. ისტორია, რომელიც არასოდეს წაიშლება და ათწლეულების შემდეგაც გაიხსენებენ. ფეხბურთმა დიდი ბედნიერება მაჩუქა და მიხარია, რომ ჩემი წვლილი შევიტანე იმ საქმეში, რასაც გულშემატკივრების გახარება ქვია.'' - ტოტი
ვინჩენსო მონტელა:"ფრანჩესკო ტოტი იყო უნიკალური ფეხბურთელი. ნამდვილი ლიდერი და მებრძოლი პიროვნება. ჩვენ ერთად ძალიან დიდხანს ვთამაშობდით და მას ძალიან კარგად ვიცნობ. შესაძლოა ბევრს ეგონოს, რომ მას ფიცხი ხასიათი ჰქონდა, რასაც ხშირად მინდორზეც ავლენდა, მაგრამ ვფიქრობ, რომ ეს საჭიროც კი იყო, რადგან ის ამას ბუნებრივად აკეთებდა და ფეხბურთს უხდებოდა კიდეც. ტოტი ნამდვილი ჩემპიონია."
 
გაბრიელ ბატისტუტა:"როცა ტოტიზე ვსაუბრობ, მახსენდება 2000-01 წლების სეზონი, როცა ჩვენ სერია ა მოვიგეთ. ის იყო ფანტასტიური პარტნიორი და მერწმუნეთ, რომ ჩემთვის დიდი პატივი გახლდათ მის გვერდით თამაში."
 
მარჩელო ლიპი:"როცა ტოტი ჩემს განკარგულებაში იყო, ვიცოდი, რომ ნებისმიერ დროს შემეძლო მისთვის დამეძახა, მიმეცა კონკრეტული დავალება და ის აუცილებლად შესრულდებოდა. თუ ისე ხდებოდა, რომ სათადარიგოთა სკამიდან უწევდა თამაშში ჩართვა, ის ჩემი კოზირი იყო. მას ყოველთვის შეეძლო გაეოცებინა პუბლიკა და ეს ყველაზე დიდი ნიჭია."
 
ფაბიო კაპელო:"ფეხბურთისგან ორმაგ სიამოვნებას ვიღებდი, როცა ტოტისთან ერთად ვმუშაობდი. ის განსაკუთრებული თვისებებით გამოირჩეოდა. მის წინააღმდეგ თამაში ნებისმიერი მცველისთვის დიდი პრობლემა იყო. ტოტის მსგავსი ფეხბურთელები თანამედროვე საფეხბურთ სამყაროს ძალიან აკლია. რომაელები მისით ყოველთვის იამაყებენ, რადგან მსოფლიო ფეხბურთის ლეგენდა მათი კაპიტანი იყო."
დანიელე დე როსი:"შეიძლება რომამ გამოიცვალოს მწვრთნელები და ფეხბურთელები, თუმცა ვერასოდეს შეცვლის ტოტის. მასთან ერთად ჩემი კარიერის ძირითადი ნაწილი გავატარე და ჩვენ შესანიშნავი ურთიერთობა გვაქვს. ტოტის არასოდეს შევეჯიბრები რომას სიყვარულში."
 
ნებისმიერი ფეხბურთის მოყვარული, მიუხედავად იმისა მოსწონს თუ არა რომა ან იტალიის ნაკრები თანხმდება იმაზე, რომ ფრანჩესკო ტოტი არის ფეხბურთელი, რომლის სახელი და გვარი ფეხბურთის ისტორიაში ოქროს ასოებითაა ჩაწერილი. ის ლეგენდაა, რომელიც არასოდეს განმეორდება. ტოტი - რომის სიამაყეა ! 
#Flashscore