ქართული სპორტი / ქართული ფეხბურთი /
კვერკველია: "ინგლისი ნებისმიერი ფეხბურთელისთვის საოცნებო ქვეყანაა"
01/21/2019 16:51
541

საქართველოს ნაკრების და მოსკოვის ლოკომოტივის ცენტრალურმა მცველმა, სოლომონ კვერკველიამ championat.com-ს ვრცელი ინტერვიუ მისცა. 

მოსკოვურ კლუბთან ერთად ყატარში შეკრებაზე მყოფმა ფეხბურთელმა საინტერესო თემებზე ისაუბრა. 

ლესტერი

"რა თქმა უნდა ლესტერის ინტერესის შესახებ ვკითხულობდი, მაგრამ ჯერჯერობით ლოკომოტივში ვარ და კლუბთან კიდევ 2,5-წლიანი კონტრაქტი მაკავშირებს. ინგლისი ნებისმიერი ფეხბურთელისთვის საოცნებო ქვეყანაა, პრემიერ ლიგა კი ყველაზე ძლიერი ჩემპიონატია. სიომინთან ამ თემაზე საუბარი არ მქონია, თუმცა თუ მოვიდოდა და დარჩენას მთხოვდა, ასეც მოვიქცეიოდი. მას ძალიან დიდ პატივს ვცემ".

შვებულება

"თავისუფალი დღეები ოჯახთან ერთად საქართველოში გავატარე. ბევრი საქმე მქონდა, მაგრამ დასვენებაც მოვახერხე. საქართველოში ნათესავები, მეგობრები მყავს და ყოველთვის ერთად ვიკრიბებით. საბედნიეროდ ზედმეტ წონას დიდად არ შევუწუხებივარ, მხოლოდ 2,5 კილოგრამი მოვიმატე და ნახევარი უკვე დაკლებული მაქვს. საქართველოს ნაკრების წარმატების შემდეგ თბილისის ქუჩებში უფრო მეტად მცნობენ გულშემატკივრები და იმედი მაქვს, რომ ერთა ლიგაზე წარმატებული ასპარეზობა მომავალშიც გაგრძელდება. ფეხბურთის ფედერაციის ხელმძღვანელობა ძალიან გვეხმარება, ფეხბურთელების და მწვრთნელების კარგი თაობა მოდის".

ჩემპიონთა ლიგა

"მიმდინარე სეზონში ჩემპიონთა ლიგის ჯგუფურ ეტაპზე პირველად ვითამაშე. ბავშვობის ოცნება ავიხდინე. უმაღლესი დონის ტურნირია, რომელზეც ასპარეზობა განსაკუთრებული გრძნობაა. სამწუხაროა, რომ მომდევნო ეტაპზე ვერ გავედით, მაგრამ ყველაფერს გავაკეთებთ, რომ კვლავ მოვხვდეთ ჩემპიონთა ლიგის ჯგუფურ ეტაპზე, ამის რესურსი ნამდვილად გვაქვს".

ტრავმები

"მიმდინარე სეზონში თავის ტრავმა მივიღე და ერთი მატჩის ჩატარება ჩაფხუტით მომიწია. ძალიან არაკომფორტულია, ფაქტობრივად ვერაფერს ხედავ. სხვათა შორის, ორი წლის წინ საქართველოს ნაკრებშიც ვითამაშე მსგავსი ჩაფხუტით. შეჯახების შედეგად თავი გამიტეხეს და 21 ნაკერი დამადეს, თუცმცა ორთაბრძოლაში შესვლისას შესაძლო ტრავმებზე არ ვფიქრობ. მოედანზეც და ცხოვრებაშიც არაფრის მეშინია".

ახალი ხელმძღვანელობა

"ლოკომოტივში ახალი ხელმძღვანელობაა, თუმცა მათ ხშირად არ ვხვდები. მადლობელი ვარ ძველი ხელმძღვანელობის, რადგან სწორედ მათი ძალისხმევით აღმოვჩნდი ლოკომოტივში. კარგი ის არის, რომ კლუბის ახალ გენერალურ დირექტორს ქართული ფესვები აქვს, ლოკომოტივისთვის კი ქართველებს წარმატება და ტიტულები მოაქვთ. ახლა უკვე ნამდვილად შეგვიძლია ევროპის ლიგის მოგება, თუმცა მანამდე ჩვენი მიზანი კიდევ ერთი ჩემპიონობაა".