ფეხბურთი / მსოფლიო ფეხბურთი /
ლეგენდარული 13 - ალესანდრო ნესტა
12/10/2019 16:14
357

1976 წლის 19 მარტს იტალიის დედაქალაქ რომში დაიბადა მსოფლიო ფეხბურთის ლეგენდა - ალესანდრო ნესტა. ფეხბურთელი, რომლითაც სრულიად იტალია ამაყობს და ბევრისთვის ის ყველა დროის საუკეთესო ცენტრალური მცველიცაა. მას საკმაოდ ხანგრძლივი და საინტერესო კარიერა ჰქონდა. პირველი ნაბიჯები ფეხბურთში 1985 წელს, 9 წლის ასაკში გადადგა, როცა ლაციოს ბავშვთა აკადემიაში ჩაირიცხა.

თავდაპირველად, მისი ნიჭი რომას სკაუტმა, ფრანჩესკო როკამ აღმოაჩინა, რომელსაც სურდა, რომ პატარა ბიჭუნა სწორედ "მგლების" შემადგენლობაში მოხვედრილიყო, თუმცა ნესტას მამა ლაციოს დიდი გულშემატკივარი გახლდათ, რის გამოც თავისი ვაჟის რომაში მოხვედრა არ სურდა და საბოლოოდ ალესანდრო ლაციალე გახდა. თავდაპირველად, ის თამაშობდა თავდამსხმელის პოზიციაზე, შემდეგ გახდა ნახევარმცველი და ბოლოს ცენტრალური მცველი. 1993-94 წლების სეზონში მას ლაციოს პირველ გუნდში უხმეს. 1994 წლის 13 მარტს შედგა მისი დებიუტი უდინეზესთან მატჩში. ის შეხვედრა ფრედ, 2-2 დასრულდა. ნესტა მინდორზე 78-ე წუთზე შევიდა. მან პიერლუიჯი კასირაჯი შეცვალა. 1997 წელს კი უკვე როგორც გუნდის კაპიტანმა, დიდი როლი ითამაშა იტალიის თასის მოგებაში. ფინალში რომაელებმა მილანი დაამარცხეს. გამარჯვების გოლი სწორედ ალესანდრომ გაიტანა. 1998 წელს, ნესტა სერია ა-ს წლის საუკეთესო ახალგაზრდა ფეხბურთელი გახდა. 

ნესტასთვის და მისი ლაციოსთვის ძალიან წარმატებული გამოდგა 1999-2000 წლების სეზონი. როცა მათ ორი ტიტული მოიგეს. სკუდეტო და იტალიის თასი. ალესანდრო რომაულ კლუბთან ერთად საერთაშორისო ასპარეზზეც აღწევდა წარმატებას. მათ ჯერ მალიორკას თასების მფლობელთა თასის ფინალი მოუგეს, ხოლო შემდეგ მანჩესტერ იუნაიტედს ევროპის სუპერთასისთვის ბრძოლაშi აჯობეს და რაც მთავარია, ყველაფერ ამაში ძალიან დიდი წვილილი მიუძღვოდა ალესანდროს, რომელიც უმაღლესი დონის ფეხბურთს თამაშობდა და პრაქტიკულად გაუვალი კედელი იყო. ამაზე მეტყველებს ის ფაქტიც, რომ ნესტა გახდა სერია ა-ს წლის საუკეთესო მცველი 2000, 2001, 2002 და 2003 წლებში. ზედიზედ 4-ჯერ.

 

2002 წელს ლაციოს ფინანსური პრობლემები შეექმნა, რის გამოც კლუბის პრეზიდენტი იძულებული გახდა, რომ რამდენიმე წამყვანი მოთამაშე გაეყიდა. ალესანდრო ნესტას ბრწყინვალე თამაშით არაერთი გუნდი იყო მოხიბლული. მას მსურველებიც არ აკლდა, თუმცა მისი ტრანსფერისთვის ბრძოლა მილანმა მოიგო, რომელმაც ჯამში 31 მილიონი გადაიხადა და იტალიელი მცველი გაიფორმა. ალესანდრო შეუერთდა გუნდს, რომელმაც მსოფლიო დაიპყრო. ნესტა ყოველ სეზონში უფრო და უფრო იხვეწებოდა, ვითარდებოდა და თავისი კარგი თამაშით გუნდს წარმატებების მიღწევაში ეხმარებოდა. იტალიელი ხშირად უწყვილდებოდა დაცვაში კახა კალაძეს, რომლებსაც ფლანგებიდან კაფუ და მალდინი ეხმარებოდნენ. საერთო ჯამში კი ოთხივე ერთად ევროპაში საუკეთესო დაცვის ხაზს ქმნიდნენ, რაც გუნდისთვის უდიდესი პლიუსი იყო. ნესტამ მილანის შემადგენლობაში 2012 წლამდე ითამაშა და მოიგო ყველფაერი, რისი მოგებაც საკლუბო დონეზე შესაძლებელი იყო. სერია ა (2), იტალიის თასი, იტალიის სუპერთასი (2), ჩემპიონთა ლიგა (2), უეფას სუპერ თასი (2) და მსოფლიო საკლუბო ჩემპიონატი. ის ხშირად ხვდებოდა სხვადასხვა სეზონებში წლის გუნდში. იგებდა სხვადასხვა ნომინაციებს და ჯამში 19 ინდივიდუალურ ჯილდოს დაეუფლა. ის შეიყვანეს მილანის დიდების დარბაზშიც.

ალესანდრო ნესტასთვის ძალიან წარმატებული იყო სანაკრებო კარიერაც. მან ჯერ 21-წლამდელებთან ერთად 1996 წელს ევროპის ჩემპიონატი მოიგო, ხოლო შემდეგ 2006 წელს "სკუადრა აძურას" შემადგენლობაში მსოფლიო ჩემპიონობაც იზეიმა. აღნიშნულ მუნდიალზე ის გუნდის ერთ-ერთი წამყვანი ფიგურა იყო. მისმა კარგმა თამაშმა კი იტალიელები არაერთი გაშვებული გოლისგან იხსნა. ნესტამ მიიღო როგორც მეხუთე, ასევე მეოთხე კლასის ორდერები, ასევე სპეციალური ჯილდო იტალიის ეროვნული ოლიმპიური კომიტეტისგან.

შესანიშნავი 10-წლიანი მილანური კარიერის შემდეგ, ვეტერანმა ნესტამ გადაწყვიტა ევროპული კარიერა დაესრულებინა და მონრეალ იმპაქტში ჩაირიცხა, სადაც ასევე შეძლო ტიტულის მოგება. ის კანადის ჩემპიონატის გამარჯვებული გახდა. ამის შემდეგ უკვე მის კარიერაში განსაკუთრებული არაფერი მომხდარა. ალესანდრომ გადაწყვიტა, რომ საფეხბურთო საქმიანობისთვის თავი დაენებებინა და ხელი მწვრთნელობას მიჰყო. თავდაპირველად, ის წვრთნიდა მაიამის, შემდეგ პერუჯას, ხოლო ამჟამად ფროსინონეს თავკაცი გახლავთ.

კარლო ანჩელოტი:"ჩემთვის, როგორც მწვრთნელისთვის, დიდი ფუფუნება იყო გუნდში ერთდროულად მყოლოდა ისეთი ფეხბურთელები, როგორებიც იყვნენ ნესტა, მალდინი, კალაძე, კაფუ, კოსტაკურტა. მათი მეშვეობით შემეძლო საკუთარი თავისთვის მიმეცა იმის უფლება, რომ შეტევაში მოთამაშე ფეხბურთელებისთვის უფრო მეტი სითამამე მიმენიჭებინა და მათი შეცდომებისგან გამომდინარე მიღებული კონტრ-შეტევების არ შემშინებოდა, რადგან დაცვაში უშეცდომო ბიჭები მყავდა."

 

ანდრეა პირლო:"მე და სანდროს განსაკუთრებული მეგობრობა გვაკავშირებს. ნებისმიერი ფეხბურთელისთვის ყოველთვის ძალიან მარტივია გაუგოს ნესტას, რადგან ის თავის საქმეს იდეალურად ასრულებს. როცა ზურგს ისეთი ფეხბურთელები გიმაგრებენ, როგორებიც ნესტა და მალდინი არიან, მოედანზე ბევრად უფრო მშვიდად ხარ. როცა ვიცოდი, რომ ის ჩემს უკან იყო, ამით მე თავდაჯერებულობა მემატებოდა და ჩემს საქმესაც უკეთ ვაკეთებდი."

ნელსონ დიდა:"ნესტა იდეალურად კითხულობდა სიტუაციებს. თითქოს წინასწარ იცოდა, თუ რა ჰქონდა ჩაფიქრებული მეტოქეს. 10 დან 9 ვარდნას სუფთად ასრულებდა. არასოდეს ერიდებოდა მეტოქეებს. კარგად მახსოვს რომასთან მატჩი, როცა ის სრულიად მარტო დარჩა 3 შემტევის წინააღმდეგ, თუმცა როგორც უკვე გითხარით, ის ჩინებული ტაქტიკოსი იყო და შეეძლო წაეკითხა მეტოქის თამაში. სწორედ ამის ხარჯზე ის 3 რომაელს მარტო გაუმკლავდა თან ისე, რომ კარისკენ დარტყმის უფლებაც არ მისცა."

არიგო საკი:"ნესტას თითქმის მთელი კარიერის განმავლობაში აწუხებდა ხერხემლის პრობლემა. ამის მიუხედავად მან სტაბილურად წლების განმავლობაში ითამაშა ისე, რომ მსოფლიო ფეხბურთის ისტორიაში შევიდა როგორც ერთ-ერთი გამორჩეული მცველი. წარმოიდგინეთ, მას რომ ის პრობლემა არ ჰქონოდა იმაზე უფრო ძლიერი იქნებოდა, ვიდრე იყო. ამ შემთხვევაში კი ალბათ მას ვერასდროს ვერავინ გასცდებოდა."

რონალდინიო:"ნესტა იყო სიხარულიც და ტკივილიც. ტკივილი მათთვის, ვისაც მის წინააღმდეგ თამაში უწევდა და ვინც მის ზონაში აღმოჩნდებოდა, ხოლო სიხარული თანაგუნდელებისთვის, რომლებსაც მუდამ შეეძლოთ მის იმედზე ყოფნა. ის უბრალოდ იდეალური დაზღვევა იყო შემტევი ფეხბურთელისთვის.

მარჩელო ლიპი:"იტალიაში იყვნენ ბავშვები, რომლებიც ოცნებობდნენ თავდამსხმელობაზე და ბევრი გოლის გატანაზე. შემდეგ მათ ნახეს ნესტა და მათი საფეხბურთო გემოვნება შეიცვალა. მიხვდნენ, რომ მცველად თამაში არც თუ ისე ცუდი რამაა. გატანილ გოლზე არანაკლებ ემოციას იწვევს ის მომენტი, როცა კარგ ვარდნას შეასრულებ, მეტოქეს ბურთს წაართმევ და კარის ხაზიდან გამოიტან. გრძნობ, რომ გმირი ხარ, რომელმაც თავისი გუნდი გადაარჩინა. ამ ყველაფრით კი შენს თანაგუნდელებს მუხტავ და აგრძნობინებ, რომ მათაც შენნაირი შემართებით უნდა ითამაშონ. სწორედ ამ ყველაფრის ერთობლიობა იყო ნესტა. იდეალური მცველი."

ბევრი ცრუმორწმუნე გეტყვით, რომ 13 თარსი ციფრია, თუმცა ამ დროს თქვენ შეგიძლიათ გაიხსენოთ ალესანდრო ნესტა, რომელიც 13-ნომრიან მაისურს ატარებდა და მიხვდებით, რომ მთავარი ხართ თქვენ და არა ციფრები.

ასევე იხილეთ: მცველის ეტალონი - პაოლო მალდინი

#Flashscore