ფეხბურთი / ქართული ფეხბურთი /
2019 წელი ქართული სპორტისთვის
12/31/2019 11:51
1060
  • 2019 წელი ქართველი სპორტსმენებისთვის ძალიან წარმატებული გამოდგა.
  • ჩვენი ქვეყნის წარმომადგენლებმა უამრავ წარმატებას მიაღწიეს საერთაშორისო ასპარეზზე.

2018 წელს თუ 800 მედალს მოვუყარეთ თავი, წელს ეს რიცხვი 1186-ამდე გაიზარდა. ქართველებმა სწორედ ამ რაოდენობის სხვადასხვა სინჯის მედლები მოუტანეს ქვეყანას. აქამდე საქართველოს ოლიმპიურ სახეობებში ერთდროულად 6 მსოფლიო ჩემპიონი არასოდეს ჰყოლია. ლუხუმ ჩხვემიანი, გენო პეტრიაშვილი, ლაშა ტალახაძე, ნუგზარ წურწუმია, ბექა ლომთაძე და ლაშა გობაძე. ამ ადამიანებმა ქართული სპორტის ისტორიაში უპრეცედენტო ფაქტი დააფიქსირეს. აღნიშნული რაოდენობის მედლბის მოპოვებით რეკორდი დამყარებულია. 

ლუხუმ ჩხვემიანმა ტოკიოში 7 ბრძოლა მოიგო, რითაც მე-7 ქართველი ძიუდოისტი გახდა, რომელმაც მსოფლიოს ჩემპიონობა მოიპოვა. 

გენო პეტრიაშვილმა ყველაზე პრესტიჟულ, მძიმე წონით კატეგორიაში შეძლო წარმატების მიღწევა. მან ყაზახეთში შეძლო მსოფლიო ჩემპიონის სტატუსის მოპოვება.

2019 წელს ლაშა ტალახაძემ კვლავ გაანებივრა ქართველი ხალხი. მან ამ წელს მეოთხედ მოიგო მსოფლიო ჩემპიონატი. ტალახაძემ ატაცში სამივე ცდა გამოიყენა, 208, 215 და 220კგ დასძლია, თავისივე მიღწევა 2 კგ-ით გააუმჯობესა და მსოფლიოს ახალი რეკორდი დაამყარა. მან რეკორდი დაამყარა აკვრაშიც. 247, 255 და 264კგ დაძლია. მანამდე არსებული რეკორდი, 260კგ ასევე ტალახაძეს ეკუთვნოდა. მესამე რეკორდი კი ორჭიდის ჯამში დაამყარა. მან 484 კგ მოაგროვა. 

61-მა ქართველმა სპორტსმენმა მინსკში გამართულ მეორე ევროპულ თამაშებზე ჯამში 30 მედალი მოიპოვა, რითაც გუნდური მე-7 ადგილი დაიკავა. 

პირველი ლიცენზია საქართველოს ლეგენდარულმა ნინო სალუქვაძემ პეკინში გამართულ ტყვიის მსროლელთა მსოფლიო თასზე მოუტანა. 

ქართველი მკლავჭიდელი ლევან საგინაშვილი მსოფლიოს ტოპ 8 მკლავჭიდელის ტურნირის გამარჯვებული გახდა. ჰალკმა ფინალურ ეტაპზე რუსი მეტოქე დაამარცხა.

 

19 წლის ეთერ ლიპარტელიანი ქართული ძიუდოს ისტორიაში გახდა პირველი ქალი მსოფლიოს ჩემპიონი. მან 2019 წელს ასევე ევროპის ჩემპიონობაც იზეიმა. გამოსარჩევია კიდევ ერთი ახალგაზრდა ძიუდოისტი, ლაშა ბექაური, რომელიც ძიუდოს საერთაშორისო ფედერაციამ წლის აღმოჩენად დაასახელა. მან ჩინეთის მასტერსზე ოქროს მედალი მოიგო.

 

ევროპული კალათბურთის მმართველმა ორგანომ 2021 წლის ევრობასკეტის ოთხ მასპინძელ ქვეყანას შორის საქართველოც დაასახელა.

გოგა ბითაძემ 2019 წელს მსოფლიოს ნომერ პირველ საკალათბურთო ლიგაში გადაინაცვლა. ის ჯერ ევროლიგის საუკეთესო ახალგაზრდა მოთამაშედ დაასახელეს, შემდეგ კი ადრიატიკის ლიგის წლის საუკეთესო კალათბურთელის წოდებაც მიიღო. 2019 წელს კი ბითაძე რიგით მე-6 ქართველი კალათბურთელი გახდა, რომელიც NBA-ის დრაფტზე აირჩიეს. ის მე-18 ნომრად ინდიანა პეისერსმა აიყვანა. ამ მომენტისთვის ქართველ ცენტრს 23 მატჩში აქვს მონაწილეობა მინაღები და თამამად შეიძლება იმის თქმა, რომ ქართველ ლეგიონერთა შორის მას ყველაზე კარგი სტარტი ჰქონდა.

ევროპაში 2019 წელს ბრწყინავდა 2 ქართველი კალათბურთელი. თორნიკე შენგელია და გიორგი შერმადინი. თამამად შეგვიძლია იმის თქმა, რომ ისინი საკუთარ კლუბებში გამორჩეული მოთამაშეები, უპირობო ლიდერები არიან და კარიერაშიც საუკეთესო სეზონებს ატარებენ. 

საქართველოს საფეხბურთო ნაკრებმა მნიშვნელოვან წარმატებას მიაღწია 2019 წელს. ევრო 2020-ის ფინალურ ეტაპზე მოსახვედრად, "ჯვაროსნებს" მხოლოდ 2 მატჩის მოგება სჭირდებათ. პირველ რიგში მათ ბელორუსის დამარცხება მოუწევთ, ხოლო შემდეგ ჩრდილოეთ მაკედონიასა და კოსოვოს შორის გამარჯვებულის ბარიერი უნდა გადალახონ. ეს ყველაფერი კი იმის დამსახურებაა, რომ ერთა ლიგის ჯგუფური ეტაპი პირველი ადგილით დავასრულეთ.

ზედიზედ მე-5 მსოფლიო თასზე იასპარეზეს ქართველმა მორაგბეებმა. მათ ჯგუფში ერთი მატჩი მოიგეს, ურუგვაის წინააღმდეგ. მეტად წარმატებული წელი ჰქონდათ უმცროს "ბორჯღალოსნებს". 18 წლამდელებმა ევროპის ჩემპიონის სტატუსი შეინარჩუნეს. 20 წლამდელებმა კი მსოფლიოს თასზე შოტლანდია და ფიჯი დაამარცხეს, რითაც მეხუთედ შეძლეს პლანეტის 12 ყველაზე ელიტურ გუნდს შორის ადგილის შენარჩუნება.

2019 წელს წყალბურთში თბილისის დინამო პრესტიჟულ საკლუბო ტურნირზე, ჩემპიონთა ლიგაზე კონტინენტის 16 საუკეთესო გუნდს შორის მოხვდა, რაც ქართული წყალბურთის ისტორიაში პირველად მოხდა. ეროვნული ნაკრები კი 2020 წელს ევროპის ჩემპიონატზე იასპარეზებს.

2019 წელს ნიკოლოზ ბასილაშვილმა მესამე კატეგორიის ATP-ის კატეგორიის ტურნირი მოიგო. მან შარშანდელი ტიტული ჰამბურგში დაიცვა. ამ წელს მხოლოდ ოთხმა ჩოგბურთელმა შეძლო ტიტულის დაცვა: როჯერ ფედერერი, ნოვაკ ჯოკოვიჩი, რაფაელ ნადალი და ნიკოლოზ ბასილაშვილი.

ქართველმა პარასპორტსმენებმა წელს 6 ოქროს მედალი მოიპოვეს. მათ გულშემატკივრები გამარჯვებებით კვლავ გაანებივრეს. 

ლეგენდარულმა მოჭადრაკემ, ნონა გაფრინდაშვილმა ვეტერან მოჭადრაკეთა შორის მსოფლიო ჩემპიონის ტიტული მეშვიდედ მოიპოვა. ქართველმა ქალმა მოჭადრაკეებმა ევროპის საკლუბო ჩემპიონატზე პირველი ადგილი დაიკავეს. გუნდურ ტურნირზე კი რომელიც ბათუმში გაიმართა მე-2 პოზიციას დასჯერდნენ.

ასევე იხილეთ: შერატონში წლის საფეხბურთო დაჯილდოება გაიმართა

#Flashscore