ფეხბურთი / პრემიერლიგა /
სტივენ ჯერარდი - კაპიტანი ფანტასტიკა
01/18/2020 16:12
459

სტივენ ჯერარდი დაიბადა და გაიზარდა უისტონში, მერსისაიდში. ფეხბურთისადმი ინტერესი და სიყვარული მას ადრეულ ასაკში ეწვია, რის გამოც 9 წლის უკვე ლივერპულის აკადემიაში ჩაირიცხა. მან იქ 17 წლამდე ითამაშა. ბავშვთა გუნდში ყოფნის დროსაც სტივი გამორჩეული იყო. ლიდერული ხასიათის გამოვლინება მან აკადემიაში ყოფნის დროს დაიწყო. ჯერარდმა პიველი პროფესიონალური კონტრაქტი ლივერპულთან 17 წლის ასაკში გააფორმა, თუმცა მანამდე მისი ნიჭი შეუმჩნეველი არ ყოფილა მისი მწვრთნელებისთვის და მას ბავშვობაშიც უამრავი ჯილდო ჰქონდა მინაღები. როგორც თავად აღნიშნავს, მისი საყვარელი ფეხბურთელები ბავშვობის დროს იყვნენ იან რაში და ჯონ ბარნსი. 1998 წლის 29 ნოემბერს შედგა ჯერარდის დებიუტი ლივერპულის შემადგენლობაში. მაშინ მერსისაიდელები პრემიერ ლიგის მატჩს ბლექბერნ როვერსის წინააღმდეგ მართავდნენ. სადებიუტო სეზონში სტივენმა 13 მატჩში მიიღო მონაწილეობა. თავდაპირველად ჯერარდს თამაში უხდებოდა როგორც ცენტრალურ ნახევარმცველად, ასევე მარჯვენა ვინგერად, თუმცა შემდგომ მან აღიარა, რომ ის თავს კომფორტულად მოედნის ცენტრში გრძნობდა და ვინგერობის დროს დისკომფორტს განიცდიდა. დროთა განმავლობაში ახალგაზრდა სტივენი ჯეიმი რედნაპის რეგულარული პარტნიორი გახდა ნახევარდაცვის ცენტრში. პირველი წითელი ბარათი ჯერარდმა მერსისაიდულ დერბიში მიიღო. ევერტონმა ის შეხვედრა 1-0 მოიგო. სტივენი კი მოედანზე რობი ფაულერის ნაცვლად შემოვიდა, თუმცა კევინ კემბელთან უხეშობის გამო მინდორი დატოვა. პირველი გოლი ჯერარდმა შეფილდ იუნაიტედის კარში გაიტანა. მისმა გუნდმა კი მეტოქე 4-1 გაანადგურა. ჯერარდი თამაშის ხარისხს სულ უფრო მეტად აუმჯობესებდა, რის გამოც ახალგაზრდა ასაკშიც კი ბევრ სათამაშო დროს იღებდა, თუმცა ამან მის ჯანმრთელობასთან დაკავშირებით პრობლემები გამოიწვია. სპორტულმა კონსულტანტმა ჰანს-ვილჰეგლმმა განაცხადა, რომ ჯერარდი მეტისმეტად იტვირთებოდა, რაც მისი ორგანიზმზე უარყოფით გავლენას ახდენდა. მისი სხეული არ იყო მზად ასეთი დოზით მიეღო დატვირთვა და მის ტრავმებს და ტკივილებს სწორედ ეს იწვევდა. სტივენს ასეთ ახალგაზრდულ ასაკში 4 ცალკეული ოპერაცია დასჭირდა.

გამოჯანმრთელების შემდეგ, 2000-2001 წლების სეზონში ჯერარდმა 50 მატჩში მიიღო მონაწილეობა. გაიტანა 10 გოლი და პირველ დიდ წარმატებასაც მიაღწია. გახდა ინგლისის თასის, ფეხბურთის ლიგის თასის და უეფას თასის გამარჯვებული. ის ამ წელს საუკეთესო ახალგაზრდა ფეხბურთელადაც დაასახელეს. მომდევნო სეზონში ჯერარდმა ლივერპულთან ერთად უკვე უეფას სუპერთასის მოგებაც მოახერხა. ჯერარდი ყოველ სეზონში უკეთესი ხდებოდა და ნელ-ნელა მსოფლიოს საუკეთესო ნახევარმცველებს შორის დაიწყო ადგილის დამკვიდრება. 2003 წლის მარტში, ჯერარდმა მილენიუმის სტადიონზე მანჩესტერ იუნაიტედის კარი აიღო. აღნიშნული შეხვედრა ინგლისის ლიგის თასის ეგიდით ტარდებოდა და გუნდები ერთმანეთს უკვე ფინალში ხვდებოდნენ. “წითელი ეშმაკები“ ლივერპულელებთან 2-0 დამარცხდნენ და სტივენმა ამ ტიტულის მოპოვებაში თავისი წვლილი შეიტანა.

2003 წლის ოქტომბერში ჯერარდი ლივერპულის კაპიტანი გახდა. მან კლუბთან კონტრაქტი კიდევ 4 წლით გაახანგრძლივა. 2003-04 წლების პერიოდში ბრიტანული პრესა წერდა, რომ ჯერარდი თავს ვეღარ გრძნობდა ბედნიერდ ლივერპულში და კლუბის დატოვებაზე ფიქრობდა. მისი შეძენის მსურველი მაშინ ლონდონის ჩელსი იყო, რომელიც 20 მილიონს იხდიდა, თუმცა რაფა ბენიტესმა ჯერარდი დაარწმუნა, რომ ის დარჩენილიყო. ბენიტესის მოსვლასთან ერთად ლივერპულში ჯერარდის ახალი თავგადასავლები დაიწყო. ესპანელი სპეციალისტი ბრიტანულ კლუბში ვალენსიადან გადაბარგდა და სტივენ ჯერარდი გუნდის ერთპივონულ ლიდერად აქცია. 2004-2005 წლების სეზონი მსოფლიო ფეხბურთის ისტორიაში ალბათ ერთ-ერთი ყველაზე დასამახსოვრებელია ჩემპიონთა ლიგაზე მომხდარი სასწაული და დაუვიწყარი ფინალის გამო. იმ წელს ბენიტესის გაწვრთნილმა ლივერპულმა ევროპის ყველაზე პრესტიჟულ საკლუბო ტურნირზე ფინალში გააღწია, სადაც იტალიურ მილანს დაუპირისპირდა. “როსონერიმ“ შეხვედრის პირველი ნახევარი 3-0 მოიგო. პრაქტიკულად პირველივე ტაიმში გაანადგურა მეტოქე და მხოლოდ ლივერპულის ჭეშმარიტი გულშემატკივარი თუ დაიჯერებდა, რომ შეხვედრის მეორე ნახევარში მათ სასარგებლოდ რაიმე შეიცვლებოდა. დაიწყო მეორე 45 წუთი და მსოფლიო დაუვიწყარი წუთების მომსწრე გახდა. 54-ე წუთზე ჯერარდმა თავური დარტყმით ერთი ბურთი გაქვითა. ამას ზუსტად 2 წუთში მოჰყვა ვლადიმ სმიჩერის გოლო და კიდევ 4 წუთში უკვე ხაბი ალონსომ ანგარიში გაათანაბრა და ტაბლოზე 3-3 დაფიქსირდა. შეხვედრა საბოლოოდ პენალტების სერიამდე მივიდა. ჯერარდს თერთმეტმეტრიანი არ დაურტყამს, თუმცა მისმა გუნდმა 2-3 იმარჯვა და ისტორიაში მე-5-ჯერ შეძლო ჩემპიონთა ლიგის თასის მოგება. ისტორიაში პირველად მოხდა ისე, რომ ამ ტურნირის ფინალში გუნდმა 3 ბურთიანი ჩამორჩენის აღმოფხვრა მოახერხა და რა თქმა უნდა ამაში უდიდესი წვლილი შეიტანა სტივენ ჯერარდმა, რომელიც კლუბს კაპიტნობდა, გაიტანა პირველი გოლი თავისი გუნდის მხრიდან და მთელი მატჩის განმავლობაში მოუწოდებდა გულშემატკივრებს მხარდაჭერისკენ, თანაგუნდელებს კი ბოლომდე ბრძოლისკენ. სტივენს სჯეროდა, რომ მათ შეეძლოთ ამ შეხვედრაში წარმატების მიღწევა და ეს ასეც მოხდა. ჯერარდმა სტამბოლში თასი აღმართა.

ბენიტესი ლივერპულს 2010 წლამდე წვრთნიდა. ამ პერიოდში ჯერარდმა კაპიტნის რანგში 4 სხვადასხვა თასი აღმართა. ის იმ პერიოდში მსოფლიო დონის ფეხბურთელად გარდაიქმნა, რომლის ყოლაზეც ნებისმიერი გუნდი იოცნებებდა. საბოლოოდ ჯერარდს ლივერპულთან ერთად მონაგები აქვს 9 ტიტული. მისი კარიერის განმავლობასი სტივენმა 32 ინდივიდუალური ჯილდო მიიღო. 2005 წელს ოქროს ბურთის ნომინანტებს შორის მე-3 ადგილი დაიკავა. 4-ჯერ გახდა ლივერპულის სეზონის საუკეთესო მოთამაშე. მას ასევე მიღებული აქვს ბრიტანეთის იმპერიის ორდენი. ლივერპულის შემადგენლობაში ჯერარდმა ყველაზე მეტი - 473 შეხვედრა ჩაატარა კაპიტნის სამკლაურით. ის ასევე გახლავთ კლუბის საუკეთესო ბომბარდირი ჩემპიონთა ლიგაზე 30 გოლით. პრემიერ ლიგაში კი 504 მატჩში მიიღო მონაწილეობა. გაიტნა 120 გოლი და შეასრულა 92 საგოლე გადაცემა. ჯერარდმა ჩემპიონთა ლიგაზე უკანასკნელი გოლი ბაზელის კარში გაიტანა. მაშინ ინგლისელმა მეტოქის კარი საჯარიმო დარტყმით აიღო, თუმცა მისი გუნდი გათამაშებას გამოეთიშა. სტივენმა ლივერპული 2015 წელს დატოვა. თვალაცრემლებულმა “ენფილდმა“ ის აპლოდისმენტებით გააცილა და ინგლისელმა ამერიკას მიაშურა. სწორედ მაშინ დასრულდა დიდი ეპოქა. კერძოდ კი ლოს-ანჯელეს გალაქსიში ჩაირიცხა, სადაც 2016 წლამდე ითამაშა და 34 მატჩში 5 გოლი გაიტანა. 2015 წელს MLS-მა ის ALL STAR-ის შემადგენლობაშიც შეიყვანა.

რაც შეეხება ჯერარდის სანაკრებო კარიერას. ის 2000 წლის 31 მაისს დაიწყო. სტივს დებიუტი უკრაინასთან ჰქონდა. მართალია ნაკრებში 14 წლის განმავლობაში 114 შეხვედრაში 21 გოლს მოუყარა თავი, თუმცა სახარბიელოს ვერაფერს მიაღწია. მისი თაობის დროს ინგლისის ნაკრებს ნამდვილად ჰყავდა ვარსკვლავებით სავსე ფეხბურთელები, თუმცა გუნდმა განსაკუთრებულ წარმატებას ვერ მიაღწია.

ჯერარდის საფეხბურთო კარიერა 2016 წელს დასრულდა. სტივენმა ფეხბურთისგან განშორება ვერ აიტანა და სამწვრთნელო კურსების გავლა დაიწყო. 2 წლის შემდეგ, 2018 წლის აპრილში ჯერარდმა შოტლანდიური გრანდი, რეინჯერსი ჩაიბარა. მართალია, სამწვრთნელო კარიერაში მას ჯერჯერობით არაფერი მოუგია, თუმცა მისი გაწვრთნილი გუნდი მიმდინარე სეზონში შესანიშნავად გამოიყურება. რეინჯერსს პრემიერშიფში ჩემპიონობაზე აქვს პრეტენზია. მათ თავიანთი უშუალო კონკურენტი, სელტიკიც კი დაამარცხეს მისსავე მოედანზე და კლუბის ხელმძღვანელები ჯერარდის მუშაობით კმაყოფილნი არიან, რის გამოც მასთან ახალი კონტრაქტიც გააფორმეს, რომლის თანახმადაც ინგლისელი შოტლანდიაში 2024 წლამდე დარჩება. თანამედროვე ლივერპული დღეისათვის ჩემპიონთა ლიგის მოქმედი გამარჯვებულია. იურგენ კლოპის ხელმძღვნელობით გუნდი მიმდინარე სეზონში ახლოსაა ასევე ისტორიულ შედეგთან. უდიდესი ალბათობით “მერსისაიდელები“ პრემიერ ლიგის გამარჯვებულებიც გახდებიან. უამრავი საფეხბურთო ექსპერტი ვარაუდობს, რომ ახლო მომავალში გერმანელ სპეციალისტს ლივერპულში სწორედ ჯერარდი ჩაანაცვლებს, რომელიც ახლა რეინჯერსის თავკაცობით გამოცდილებას აგროვებს. ალბათ ეჭვი არავის ეპარება იმაში, რომ სამომავლოდ ჯერარდის მთავარი მწვრთნელობა ლივერპულში გულშემატკივრების სურვილი და შეიძლება ითქვას ოცნებაც კი გახლავთ.

რაფა ბენიტესი:“ლივერპულში გატარებული პერიოდი ჩემი სამწვრთნელო კარიერის საუკეთესო პერიოდია. რა თქმა უნდა ყველა იხსენებს 2005 წლის სტამბოლის ფინალს. იქ ჩვენ შეუძლებელი შევძელით და ამ ყველფერში გარდატეხა ჯერარდმა შეიტანა. მან როგორც კაპიტანმა, იმ დღეს თავის მოვალეობა იდეალურად შეასრულა და მომხდარით ყველანი ვვამაყობთ.“

ხაბი ალონსო:“ჯერარდი საუკეთესო ნახევარმცველია, ვისთან ერთადაც ოდესმე მითამაშია. ის ფანტასტიური კაპიტანი და ფეხბურთელი გახლდათ. ჩვენ დღემდე გვაკავშირებს მჭიდრო მეგობრობა და მე მიხარია, რომ მასთან ერთად მინდორზე ერთი გუნდის მაისურით მიწევდა თამაში.“

ფერნანდო ტორესი:“ჯერარდმა ბევრი რამ მასწავლა. ლივერპულში გატარებულ პერიოდს სიამოვნებით ვიხსენებ. მას მე ძალიან მოვწონდი და ყოველთვის ცდილობდა გავემხნევებინე. ერთად თამაში ძალიან კარგად გამოგვდიოდა. მინდორზე ერთმანეთს შესანიშნავად ვუგებდით. დიდი პლუსია, როცა გუნდს ისეთი კაპიტანი ჰყავს, როგორიც იყო ჯერარდი.“

ლუის სუარესი:“ჯერარდი ჩემთვის უდიდესი პიროვნებაა. საოცრებაა იმის ყურება თუ როგორ უყვართ ის გულშემტკივრებს. “ენფილდზე“ ხალხის დიდი ნაწილი ხშირად სწორედ მის სანახავად დადიოდა.“

კენი დალგლიში:“ლივერპულს უამრავი ლეგენდა ჰყავდა. ერთ-ერთი სწორედ ჯერარდია. ის ლეგენდაა. ქომაგები მას ლივერპულის სიმბოლოსაც უწოდებენ.“

ფრენკ ლამპარდი:"მე მოხარული ვარ, რომ სტივენ ჯერარდთან ერთად ინგლისის ეროვნულ ნაკრებში გამოვდიოდი. ჩვენ ხშირად გვადარებდნენ. ვფიქრობ, რაღაცით ვგავართ კიდეც ერთმანეთს. მასთან ყოველთვის შესანიშნავი ურთიერთობა მქონდა. ის ძალიან მეგობრული და სამართლიანი პიროვნებაა. მისნაირ ადამიანებს ძალიან ვაფასებ. სტივი ჩემთვის იყო ღირსეული მეტოქე და თანაგუნდელი."

#Flashscore