ფეხბურთი / პრემიერლიგა /
იურგენ კლოპის "რობოტები"
01/20/2020 12:49
303
  • ლივერპულს პრემიერ ლიგაში ვერ აჩერებენ
  • "წითლებს" მიმდინარე სეზონში არაერთი რეკორდის მოხსნა შეუძლიათ

 

იურგენ კლოპმა ლივერპულისგან მართლაც რომ მონსტრი ჩამოაყალიბა. მერსისაიდელთა მიერ პრემიერ ლიგაში ნაჩვენები შედეგები კი ყველასათვის დიდი მოულოდნელობა გამოდგა.

პრემიერ ლიგაში გასული 23 ტურის შემდეგ მერისაიდელებს 21 მოგება და ფრე აქვთ. "წითლებს" სხვებზე ერთით ნაკლები მატჩი აქვთ ჩატარებული. ამის მიუხედავად ისინი მოქმედ ჩემპიონსა და ამჟამინდელ მეორეადგილოსან მანჩესტერ სიტის 16 ქულით უსწრებენ.

გერმანელი სპეციალისტის გაწვრთნილმა გუნდმა 2019 წლის 3 იანვრის შემდეგ, ჩემპიონატში 39 წაუგებელი მატჩი გადააბა. ბოლოს ისინი გასული წლის 3 იანვარს, მანჩესტერ სიტისთან "ეტიჰადზე" დამარცხდნენ. პრემიერ ლიგაში ჩატარებული ბოლო 31 მატჩიდან კი მათ, შესაძლო 93 ქულიდან, 91 ქულის მოპოვება მოახერხეს. 

ლივერპულმა უკვე მოახერხა და ევროპის ტოპ 5 ჩემპიონატის ისტორიაში გახდა კლუბი, რომელმაც საწყის 22 ტურში ყველაზე მეტ ქულას მოუყარა თავი. გარდა ამისა მათ აქვთ ბრწყინვალე შანსი, რომ პრემიერ ლიგის არაერთი რეკორდი მოხსნან.

თამამად შეიძლება ითქვას, რომ "წითლები" ლონდონის არსენალის ორ რეკორდს უკვე ემუქრებიან. 2003-04 წლების სეზონში "მეთოფეებმა" ჩემპიონის ტიტულის მოგება დაუმარცხებლად მოახერხეს. გარდა ამისა მათ 49-მატჩიანი წაუგებელი სერიაც დაუმატეს.

ლონდონელთა მეორე ისტორიული მიღწევა, რომლის მოხსნაც ლივერპულს შეუძლია, ყველა ტურში მინიმუმ ერთი გოლის გატანაა. 2001-02 წლების სეზონში "მეთოფეებმა" გოლის გატანა 38-ვე ტურში მოახერხეს.

მორიგი რეკორდი, რომელსაც ლივერპულელები შესაძლოა მიმდინარე სეზონში დაემუქრონ, მანჩესტერ სიტის მიღწევაა. 2017-18 წლების სეზონში პეპ გუარდიოლას გაწვრთნილმა გუნდმა პრემიერ ლიგაში თავი სარეკორდო 100 ქულას მოუყარა.

ეზონის წინ, ასეთ არაჩვეულებრივ სტარტზე ვერც ლივერპულში იოცნებებდნენ. სეზონის მაღალ დონეზე დაწყების შემდეგ, არაერთმა ყოფილმა ფეხბურთელმა თუ ექსპერტმა აღნიშნა, რომ მათთვის უმჯობესი იქნებოდა თუ სხვა ტურნირებზე ძალებს დაზოგავდნენ და ძირითად აქცენტს პრემიერ ლიგაზე გააკეთებდნენ. "წითლები" ბოლოს ინგლისის ჩემპიონები 30 წლის წინ გახდნენ.

დღეს კი ლივერპულს საკმაოდ რეალური შანსი აქვთ, რომ მანჩესტერ იუნაიტედის (1998-99) შემდეგ, გახდეს მეორე ინგლისური კლუბი, რომელმაც ტრიპლეტის შესრულება მოახერხა. მერსისაიდელები ჩემპიონთა ლიგასა და ინგლისის ასოციაციის თასზეც, მერვედფინალში იმყოფებიან და ორივე ამ ტურნირზე ერთ-ერთ უმთავრეს ფავორიტებადაც მოიაზრებიან.

 

ასევე იხილეთ: სტივენ ჯერარდი - კაპიტანი ფანტასტიკა

#Flashscore