რაგბი / 6 ერი /
ედი ჯონსი: "ექვს ერში ახალი გუნდების დამატება შეცდომა იქნება"
02/10/2020 14:16
107
  • ინგლისის ეროვნული ნაკრების მთავარი მწვრთნელი ექვსი ერის გაფართოების წინააღმდეგია
  • ედი ჯონსის თქმით, ტურნირზე ახალი გუნდის დამატება დიდი შეცდომა იქნება

ბოლო დროს მსოფლიო მედიაში გავრცელებული ინფორმაციის თანახმად, შესაძლოა, 2023 წლიდან ექვს ერში ცვლილებები შევიდეს და ერთ-ერთ ყველაზე პრესტიჟულ სარაგბო ტურნირს სამხრეთ აფრიკა დაემატოს. ამასთანავე, კიდევ ერთი გუნდი, რომლის დამატების განხილვაც ექვს ერში განიხილება, ფიჯია. წყაროების ცნობით, ფიჯის მორაგბეთა ეროვნული ნაკრები, ექვს ერში დამატების შემთხვევაში, საშინაო მატჩებს საფრანგეთში გამართავს.

ამასთან დაკავშირებით საკუთარი მოსაზრება ინგლისის ეროვნული ნაკრების მთავარმა მწვრთნელმა, ედი ჯონსმა გამოთქვა. ჯონსის აზრით, ექვსი ერი ტრადიციული ტურნირია და მასში ახალი წევრების დამატება შეცდომა იქნება.

"ექვს ერს მსოფლიოში უდიდეს ტურნირს უწოდებენ და ვფიქრობ, ასეცაა. და რატომ უნდა გვინდოდეს ისეთი გუნდის დამატება, რომელიც ტურნირის დონეს დასწევს?! ყველას სურს, რომ ერთმანეთის წინააღმდეგ საუკეთესო გუნდებმა ითამაშონ. ექვს ერს აქვს რაღაც განსაკუთრებული - ისტორიისა თუ მონაწილე ქვეყნების ურთიერთობის გამო. სწორედ ეს ხდის ამ ტურნირს ასე განსაკუთრებულს", - განაცხადა ედი ჯონსმა.

ზუსტად 20 წელი გავიდა მას შემდეგ, რაც ხუთი ერის ტურნირმა ფორმატი შეიცვალა და იტალია დაიმატა. ზუსტად 2000 წელს, იტალიამ სარაგბო ელიტაში შეაღწია, თუმცა მას შემდეგ სულ რაღაც თერთმეტი მატჩი მოიგო. იტალია შოტლანდიასთან ერთად ექვსი ერის ერთადერთი მონაწილეა, რომელსაც ტურნირი არცერთხელ მოუგია. იტალიელებმა ბოლო ხუთ წელიწადში ვერცერთი მატჩი მოიგეს და მათი საუკეთესო შედეგი ექვსი ერის ისტორიაში მეოთხე ადგილია.

"ექვსი ერი ბევრად უფრო რთული ტურნირია, ვიდრე მსოფლიო თასი. აქ უფრო მეტი ფიზიკური ძალისხმევა გჭირდება და ეს ყველაფერი უფრო და უფრო რთულდება", - ამბობს ჯონსი.

ინგლისელი სპეციალისტი სუპერ რაგბისაც შეეხო და აღნიშნა, რომ გაფართოებამდე ტურნირი მსოფლიოში ერთ-ერთი საუკეთესო იყო.

"მხოლოდ ჩემი გამოცდილებიდან შემიძლია ვისაუბრო. სუპერ რაგბი მსოფლიო რაგბის ნამდვილი ბრილიანტი იყო, მხოლოდ იქამდე, სანამ ტურნირზე თორმეტი გუნდი მონაწილეობდა. მას შემდეგ, რაც გაფართოვდა და მონაწილეთა რაოდენობა 14-15 გუნდამდე გაიზარდა, მისი ხიბლი დაკარგა", - განაცხადა ინგლისის ნაკრების მწვრთნელმა.

აღსანიშნავია, რომ ექვსი ერის გაფართოების საკითხი საქართველოს ეროვნულ ნაკრებსაც ეხება. ბოლო წლების განმავლობაში, ბორჯღალოსნების ექვს ერში გაწევრიანებაზე არაერთხელ ყოფილა საუბარი. თუმცა ჩვენი ტურნირში მოანწილეობის საკითხი კვლავაც მხოლოდ საუბრის დონეზეა. ექვსი ერი ერთ-ერთი ყველაზე ჩაკეტილი სივრცეა, რომელში მოხვედრაც პრაქტიკულად შეუძლებელია. მიუხედავად იმისა, რომ ბორჯღალოსნების პროგრესს მსოფლიოში ყველა აღიარებს და ერთ-ერთ ყველაზე პროგრესირებად გუნდადაც მოიხსენიებს, სპეციალისტები ამტკიცებენ, რომ საქართველოსთვის ექვს ერში გაწევრიანება არამხოლოდ სათამაშო დონის, არამედ კომერციული თვალსაზრისითაც ადრეა.

ფაქტია, რომ თუ გუნდები მსოფლიოს ჩემპიონის, სამხრეთ აფრიკის მიღების წინააღმდეგნი სათამაშო დონის დაცემის გამო იქნებიან, საქართველოს არავინ უწყალობებს.

ასევე იხილეთ: ბორჯღალოსნები მანდელას სახელობის სტადიონზე ითამაშებენ

#Flashscore