ფეხბურთი / ლა ლიგა /
81 დღიანი პაუზის შემდეგ აზარი ბრუნდება!
02/16/2020 16:14
75
  • ედენ აზარი სელტასთან მატჩში დაბრუნდება
  • ბელგიელი სათამაშოდ მზად არის

ედენ აზარი მინდორს 81 დღიანი პაუზის შემდეგ, სელტასთან მატჩში დაუბრუნდება. მადრიდის რეალის 29 წლის შემტევმა დაზიანების გამო ყველა ტურნირზე ერთად ჯამში 16 მატჩი გამოტოვა. "სამეფო კლუბი" ლა ლიგის 24-ე ტურში აუტსაიდერს დაუპირისპირდება. შეხვედრა თბილისის დროით 00:00 საათზე დაიწყება.

Marca-ს ცნობით, ექიმებმა ზინედინ ზიდანს აცნობეს, რომ აზარს თამაში უკვე შეუძლია, თუმცა ამ ეტაპზე ფეხბურთელის სათამაშო დრო მაინც შეზღუდული უნდა იყოს. 

ზემოთხსენებული წყაროს ცნობით, ზინედინ ზიდანს ბელგიელის ჯანმრთელობის მდგომარეობის შესახებ ექიმებმა დეტალური ინფორმაცია მიაწოდეს და ფრანგმა სპეციალისტმა იცის, რომ სელტასთან მატჩში მისი მოედანზე გამოყვანა მაქსიმუმ 30 წუთითაა შესაძლებელი.

მომდევნო 2 კვირის განმავლობაში კი ლევანტესთან და მანჩესტერ სიტისთან შეხვედრებში მან 1 საათზე მეტი არ უნდა ითამაშოს, რათა ყოველგვარი საფრთხე აირიდონ თავიდან. ყოველივე ამის შემდეგ კი ზიდანის გუნდს ლა ლიგაში "ელ კლასიკო" ელის. ივარაუდება, რომ მადრიდელთა შვიდიანი იმ მატჩისთვის 100%-ით მწყობრში იქნება.

მადრიდელები ბარსელონას 2 მარტს 00:00 საათზე "სანტიაგო ბერნაბეუზე" დაუპირისპირდებიან. აზარის სადებიუტო სეზონი ისე ნამდვილად არ მიმდინარეობს, როგორც მას გულშემატკივრები ელოდნენ და ბელგიელს შანსი ეძლევა, რომ თავის გამოჩენა საკმაოდ მნიშვნელოვან შეხვედრებში შეძლოს.

ასევე იხილეთ: ჰაკერებმა ბარსელონას ტვიტერი გატეხეს

 

#Flashscore