ფეხბურთი / ჩემპიონთა ლიგა /
ფერმიდან ჩემპიონთა ლიგაზე და მანჩესტერული გედის სიმღერა
02/17/2020 5:16
202

როგორც იქნა! ორთვიანი პაუზის შემდეგ ევროპის უპრესტიჟულესი ტურნირი ჩემპიონთა ლიგა, მერვედფინალებით ბრუნდება.

დაბრუნება კი მართლაც, რომ ასეთი უნდა. ფეხბურთის გულშემატკივარს პირველივე დღეს ორი ისეთი დიდი მატჩი ელის, შესაძლოა, რაღაც მხრივ გულიც კი დაგწყდეს იმაზე, რომ ისინი ერთ დღეს გაიმართება და შეხვედრები, არც თუ ისე კარგად გადანაწილდა.

ატლეტიკო "ვანდა მეტროპოლიტანოზე" მოქმედ ჩემპიონს, ლივერპულს დაუპირისპირდება. ამ დაპირისპირებას იმდენად დიდი აფიშა აქვს, ოპერატორებმა თამაშის ჩვენებაზე უარი, რომ თქვან და კამერები მწვრთნელებს მიუშვირონ, სანახაობას არც მაშინ მიადგება ჩრდილი. ერთმანეთს ორი უემოციურესი მწვრთნელი, იურგენ კლოპი და დიეგო სიმეონე დაუპირისპირდებიან.

"წითლებსაც" და "როხიბლანკოსაც", ჯგუფში უმთავრეს კონკურენტებად იტალიური კლუბები ჰყავდათ. ლივერპულმა ნაპოლის ერთი ქულით აჯობა და მერვედფინალში E ჯგუფიდან, პირველი ადგილით გავიდა. ატლეტიკო  D ჯგუფის პირველადგილოსან იუვენტუსს 6 ქულით ჩამორჩა და პლეიოფის საგზური ერთი ტურით ადრე მოიპოვა.

წყვილში ფავორიტად მოქმედი ჩემპიონები მიიჩნევიან, მით უფრო, რომ ლივერპულს პრემიერ ლიგაში საქმე იდეალურად აქვს. მერსისაიდელები მეორე ადგილზე მყოფ მანჩესტერ სიტის 25 ქულით უსწრებენ და როგორც იქნა, 30-წლიანი ლოდინის შემდეგ, პრემიერ ლიგის ნანატრ ტიტულსაც დაეუფლებიან.

ტომას ტუხელი ნაცობ არენას ეწვევა. დორტმუნდისა და პსჟ-ს დაპირისპირებას აფიშა არც ისე აკლდა. გერმანელი მწვრთნელი "სიგნალ იდუნა პარკზე დაბრუნდება" და ამჟამინდელი კლუბით, ყოფილ გუნდს დაუპირისპირდება. "შავ-ყვითლების" სახელგანთქმული კედლების ძალა კი პარიზელთა თავკაცს კარგად მოეხსენება. თუ პსჟ-მ A ჯგუფში პირველადგილოსანის ვინაობა საკმაოდ მარტივად გაარკვია და ამასთან, მეორე ადგილოსან რეალს 5 ქულითაც გაასწრო, გერმანულ კლუბზე იგივეს ნამდვილად ვერ ვიტყვით. დორტმუნდელებმა ბოლო ტურში შინ, სლავია დაამარცხეს და თავის მხრივ, მათ ხელი ბარსელონამაც შეუწყო. კატალონიელებმა "სან სიროზე" ინტერი დაამარცხეს, რაც კონტეს გუნდის F ჯგუფში ჩასატოვებლად საკმარისი აღმოჩნდა.

თუ ფავორიტზე ვისაუბრებთ, როგორც ყოველთვის ფურცელზე უპირატესობა ამჟამადაც პარიზელებს ენიჭებათ. ფავორიტის სტატუსის არგამართლება მათთვის უცხო ნამდვილად არაა, ისევე როგორც პირველ შეხვედრაში მოპოვებული უპირატესობის განიავება. ყველას რომ ეგონა, "კამპ ნოუს" კოშმარულ ღამეს გაკვეთილად გამოიყენებენო, სწორედ მაშინ ოლე გუნარ სულშერის მანჩესტერ იუნაიტედთან გაიმეორეს. ეს დორტმუნდი კი თამამად შეიძლება ითქვას, რომ შარშანდელ "წითელ ეშმაკებზე" გაცილებით ძლიერი და სიმპათიური გუნდია. ყველაფერს რომ თავი დავანებოთ, გერმანელებმა ერლინგ ჰალანდის დამატებით, იანვარში ბრწყინვალე შევსება მიიღეს. ნორვეგიელი ტალანტი ზალცბურგის მსგავსად, დორტმუნდშიც განაგრძობს საოცარ თამაშს და მის ანგარიშზე, ჩატარებულ შეხვედრებზე მეტი, გატანილი გოლია.

ატალანტასა და ვალენსიას წყვილი საკმაოდ საინტერესოა. ორივე გუნდს ჯგუფურ ეტაპზე დიდი ბრძოლის გადატანა მოუხდა. იტალიელებს ევროპის უპრესტიჟულეს ტურნირზე დებიუტი ჰქონდათ. ამასთან ერთად მათ ისტორიული მიღწევაც დააფიქსირეს. ჩემპიონთა ლიგის ისტორიაში, გასპერინის გუნდი გახდა პირველი, რომელმაც საწყის სამ ტურში მარცხი განიცადა და ჯგუფიდან გასვლა მაინც მოახერხა. ატალანტამ C ჯგუფში დონეცკის შახტარსა და დინამო ზაგრებს აჯობა და მეორე ადგილი დაიკავა. პირველ ადგილზე კი, პეპ გუარდიოლას მანჩესტერ სიტი გავიდა, რომელსაც ატალანტა 7 ქულით ჩამორჩა. ვალენსიას თავს, იტალიელებზე არანაკლებ სასწაული ამბები გადახდა. ესპანელებმა ჩემპიონთა ლიგის საგზური ბოლო ტურში გაინაღდეს. "ღამურებმა" ბოლო ტურში, სტუმრად გასული სეზონის ნახევარფინალისტი და დიდი მოულოდნელობა, ამსტერდამის აიაქსი დაამარცხეს და პირველი ადგილიც დაიკავეს. მეორე ადგილზე კი H ჯგუფში ჩელსი გავიდა, რომელმაც ვალენსიას მსგავსად 11 ქულა მოაგროვა.

რაც შეეხება ფავორიტს, შანსები საკმაოდ თანაბრად მოსჩანს. ერთადერთი რამ, რაც შეიძლება უპირატესობად მივიჩნიოთ, ვალენსიელთა საჩემპიონთალიგო გამოცდილებაა.

გასული სეზონის ფინალისტი ტოტენჰემი, აწ უკვე მწვრთნელ გამოცვლილი, ბუნდესლიგის მეორეადგილოსან ლაიფციგს დაუპირისპირდება. ლაიფციგი საკმაოდ სიმპათიური კლუბია, რომელსაც 32 წლის ნიჭიერი სპეციალისტი, იულიან ნაგელსმანი წვრთნის. გერმანელებს თუ ნაგელსმანი ჰყავთ, "დეზებს" ამ ტურნირის ორგზის ტრიუმფატორი (პორტუ, ინტერი), ჟოზე მოურინიო წვრთნით, რომელმაც ნოემბერში მთავარი მწვრთნელის პოსტზე მაურისიო პოჩეტინო ჩაანაცვლა. ლონდონელებმა B ჯგუფში მეორე ადგილი დაიკავეს და ერთი შეხედვით მერვედფინალში გასვლა არც გასჭირვებიათ, მაგრამ ჯგუფის პირველადგილოსან მიუნხენის ბაიერნთან შინ გამანადგურებელი ანგარიშით 2:7 დამარცხდნენ. ნაგელსმანის გუნდმა კი პლეიოფის საგზური ერთი ტურით ადრე პირველი ადგილით გაინაღდა და ლიონთან ერთად G ჯგუფიდან გავიდა.

მიუხედავად მთავარი ლიდერის, ჰარი კეინის ტრავმისა, თუნდაც მცირედად, მაგრამ მაინც ფავორიტად, შესაძლოა, ტოტენჰემი მივიჩნიოთ. ლონდონელები გასული სეზონის ფინალისტები არიან და ამასთან, მათ ამ ტურნირის კარგად მცოდნე და გამოცდილი სპეციალისტი წვრთნით. მიუხედავად ამისა, ეს წყვილი საკმაოდ თანაბარია და არც გერმანელთა წარმატება იქნება მოულოდნელობა და სენსაცია.

ჩელსისა და ბაიერნის მატჩი მერვედფინალების მორიგი საინტერესო აფიშაა. ალბათ, მიუნხენელებს არასდროს დაავიწყდებათ 2012 წელს, მშობლიურ "ალიანს არენაზე" წაგებული ფინალი, რომლის ტრიუმფატორებიც სწორედ "არისტოკრატები" იყვნენ. თუ დღევანდელ ჩელსიში მაშინდელი ფინალისტები ნაკლებად მოიძებნებიან, "რეკორდმაისტერთა" რიგებში დღესაც ირიცხებიან ფეხბურთელები, რომელთაც იმ ავადსახსენებელ შეხვედრაში მონაწილეობა მიიღეს: მანუელ ნოიერს, ჟერომ ბოატენგსა და თომას მიულერს, ის საღამო დღესაც მწარედ ახსოვთ. შესაბამისად, ამ წყვილის ყოველი დაპირისპირება, მიუნხენელთა მხრიდან ერთგვარი შურისძიების მცდელობა იქნება.

"რეკორდმაისტერებმა" ცოტა ხნის წინ, ბუნდესლიგაში ლიდერობა წინ დაიბრუნეს. "არისტოკრატების" უმთავრეს საპრემიერლიგო მიზანს კი ოთხეულში შესვლა და ჩემპიონთა ლიგის მომავალი სეზონის საგზურის მოპოვება წარმოადგენს.

წყვილში ფავორიტად ფლიკის ბაიერნი სახელდება. ნიკო კოვაჩის გაშვების შემდეგ, გერმანელი დროებით მწვრთნელად დაინიშნა. აღსანიშნავია, რომ ამ დროისთვის, მას კლუბის ისტორიაში მოგებათა საუკეთესო პროცენტული (80%) მაჩვენებელი აქვს. რაც შეეხება ფრენკ ლამპარდის გუნდს, ლონდონელები არასტაბილურობით გამოირჩევიან, რაც მეტწილად ხანგრძლივმა სატრანსფერო დისკვალიფიკაციამაც გამოიწვია.

როდესაც ბარსელონაზე ვსაუბრობთ, განურჩევლად იმისა თუ რა დროება უდგას კლუბს, გუნდი რომელსაც მესი ჰყავს, ტურნირის მოგების ერთ-ერთი უმთავრესი ფავორიტია. ერნესტო ვალვერდეს გაშვება კატალონიურ გრანდზე, ჯერ-ჯერობით დადებითად, არც შედეგითა და არც სათამაშო ხარისხით ასახულა. ახალმა მთავარმა მწვრთნელმა კიკე სეტიენმა, პირველ ინტერვიუში განაცხადა, რომ ბარსაში მუშაობის გამო, ფერმასა და სამეურნეო ცხოვრებას მოსწყდა. ლა ლიგაში "ბლაუგრანა" მეორე ადგილზეა და ლიდერ რეალს 1 ქულით ჩამორჩება.

კატალონიელთაგან განსხვავებით, ნეაპოლელებმა საკმაოდ უცნაური ცვლილება განახორციელეს. კარლო ანჩელოტის გაშვებასა და მის ადგილზე ჯენარო გატუზოს დანიშვნას, ალბათ, არავინ იფიქრებდა. მაგრამ, როდესაც საქმე გვაქვს ისეთ ადამიანთან, როგორიც აურელიო დე ლაურენტისია, ასეთი პრეზიდენტისაგან მსგავსი რამ არც უნდა გაგვიკვირდეს. ნაპოლის საჩემპიონატო მდგომარეობა საკმაოდ მძიმეა. ნეაპოლელები სერია ა-ში მერვე ადგილს იკავებენ და ჩემპიონთა ლიგაზე გამსვლელ მეოთხე ადგილს, 12 ქულით ჩამორჩებიან.

იუვენტუსისა და ლიონის წყვილში კი ტურინული გრანდი, რა თქმა უნდა, უპირობო ფავორიტია. ფრანგებს არც ისე ჰქონდათ დიდი შანსი, მაგრამ მას შემდეგ, რაც მათ ორი ლიდერი, მემფის დეპაი და რენე ადელაიდე სეზონის ბოლომდე დაკარგეს, შანსი იმისა, რომ "ბებერი ქალბატონების" ბარიერის გადალახვას შეძლებდნენ, კიდევ უფრო მიზერული გახდა.

იუვენტუსი ტურნირის ერთ-ერთი მთავარი ფავორიტია. საოცარ სეზონს ატარებს ჩემპიონთა ლიგის ყველა დროის საუკეთესო ბომბარდირი (128) კრიშტიანუ რონალდუ, რომელმაც მიმდინარე სეზონში, ტურინელთა მაისურით უკვე 24 გოლის გატანა მოახერხა.

იუვე სერია ა-ს ლიდერია და უახლოეს მდევრებს, ლაციოსა და ინტერს, 1 და 3 ქულით უსწრებს. რაც შეეხება ლიონს, საფრანგეთის ლიგა 1-ში, მისთვის უჩვეულო მე-11 ადგილს იკავებს და ჩემპიონთა ლიგაზე გამსვლელ მესამე ადგილს 7 ქულით ჩამორჩება.

მანჩესტერ სიტისა და რეალის დაპირისპირება, ლივერპულისა და ატლეტიკოს წყვილის მსგავსად, შეგვიძლია, როგორც მწვრთნელების დუელი ისე მოვნათლოთ. ტურნირის ორგზის ტრიუმფატორი პეპ გუარდიოლა, სამ გზის ჩემპიონს, ზინედინ ზიდანს დაუპირისპირდება. ორივე ამ სპეციალისტმა ჩემპიონთა ლიგაზე წარმატებას, სწორედ ერთსა და იმავე გუნდში მიაღწია. პეპმა ბარსელონაში, ხოლო ზიზუმ რეალში.

თამამად შეიძლება ითქვას, რომ ინგლისში ჩატარებული გასული ზღაპრული სეზონის შემდეგ, გუარდიოლას გუნდმა მიმდინარე სეზონი ჩააგდო. 2018-19 წლების სეზონში ესპანელი მწვრთნელის გუნდმა, ინგლისური ჰეთთრიკი შეასრულა: მოიგო რა პრემიერ ლიგა, ინგლისის ასოციაციისა და ინგლისის ლიგის თასები. დღეს კი პრემიერ ლიგაში სიტი, ლიდერ ლივერპულს 25 ქულით ჩამორჩება და ერთადერთ ხსნად ჩემპიონთა ლიგაზე წარმატების მიღწევა მოსჩანს. მით უფრო, რომ ცოტა ხნის წინ, UEFA-მ ფინანსური Fair Play-ის დარღვევის გამო, ქალაქელებს დისკვალიფიკაცია მისცა და ევროპის უპრესტიჟულესი ტურნირიდან 2 წლით მოკვეთა. ჩემპიონთა ლიგაზე ჩატარებული მიმდინარე სეზონი, მათთვის ერთგვარი გედის სიმღერაც კი იყოს.

როდესაც, UEFA-ს ამ განაჩენთან დაკავშირებით მადრიდელთა მწვრთნელს, ზინედინ ზიდანს აზრი ჰკითხეს, ფრანგმა განაცხადა, რომ ინგლისელებს ეს სასჯელი რეალთან დამატებით მოტივაციას მისცემთ. მით უფრო, რომ ისინი უახლოესი ორი წლის მანძილზე, ჩემპიონთა ლიგაზე ვერ იასპარეზებენ.

მანჩესტერ სიტისგან განსხვავებით, რეალის მიმდინარე სეზონი, შესაძლოა, დადებითად შეფასდეს. რეალი ლა ლიგის ლიდერია და მეორეადგილოსან ბარსელონას ერთი ქულით უსწრებს. კლუბი ნელ-ნელა სწავლობს რონალდუს გარეშე თამაშს და ბოლო დროს, სანახაობაზე მეტად, აქცენტს შედეგზე აკეთებს. ყველაზე თვალში საცემი კი ის არის, რომ მადრიდელებმა ბოლო პერიოდში დაცვაში თამაში მკვეთრად გააუმჯობესეს და სულ უფრო და უფრო ცოტა გოლს უშვებენ.

რაც შეეხება ფავორიტს, რთულია ტურნირის 13 გზის ჩემპიონთან ეს სტატუსი სხვას მიანიჭო. მიუხედავად ამისა, გამომდინარე იქიდან თუ რა მდგომარეობაშია ინგლისური კლუბი და ვინ წვრთნის მას, მოულოდნელობა და სენსაცია, არცერთი შედეგი იქნება.

ასევე იხილეთ: ჩემპიონთა ლიგის საუკეთესო საგოლე გადაცემები

#Flashscore