კალათბურთი / NBA /
რუდი გობერი: "მინდა ყველას საჯაროდ მოგიბოდიშოთ"
03/13/2020 15:48
343

როგორც მოგეხსენებათ, იუტა ჯაზის ცენტრმა რუდი გობერმა, რომელიც კორონავირუსით ინფიცირებულობის მიუხედავად საკმაოდ წინდაუხედავად მოიქცა, საკუთარ Twitter-ის გვერდზე ვრცელი წერილი გამოაქვეყნა.

ESPN-ის ავტორიტეტული ინსაიდერის ედრიან ვოჯნაროვსკის ინფორმაციით, ფრანგ ცენტრსა და თანაგუნდელებს შორის ურთიერთობა მნიშვნელოვნად დაიძაბა.

"მე თქვენი ძალიან მადლობელი ვარ. უკანასკნელი 24 საათის განმავლობაში უამრავი მხარდამჭერი შეტყობინება მივიღე, რაც მე ძალიან დამეხმარა. აბსოლუტურად გასაგებია ის აგრესია, შიში და გაღიზიანება, ამან ბევრი რამ მასწავლა.

უპირველესად კი მინდა ყველას საჯაროდ მოგიბოდიშოთ. თავდაპირველად წარმოდგენა არ მქონდა, რომ ინფიცირებული ვიყავი, თუმცა ბევრად ფრთხილად უნდა მოვქცეულიყავი.

იმედია ჩემი შემთხვევა ყველასთვის მაგალითი იქნება, რომ ამ ყველაფერს ბევრად სერიოზულად უნდა მივუდგეთ. ვეცდები ჩემი გამოცდილება საზოგადოებას სასარგებლოდ გავუზიარო.

კიდევ ერთხელ გიხდით ბოდიშს და ჯანმრთელობას გისურვებთ, გავუფრთხილდეთ ერთმანეთს, მიყვარხართ." - დაწერა რუდი გობერმა.

შეგახსენებთ, რომ კორონავირუსით ინფიცირება ჯაზის კიდევ ორ მოთამაშეს, ემანუელ მუდიეის და დონოვან მიჩელს დაუდასტურდათ, მთელი გუნდი კარანტინშია.

ცნობისთვის, ოფიციალური მონაცემებით, ამერიკის შეერთებულ შტატებში COVID-19-ის 696 შემთხვევაა დაფიქსირებული. ამერიკაში კორონავირუსით დაინფიცირებული სულ 25 პაციენტი გარდაიცვალა.

 

ასევე იხილეთ: ადამ სილვერი განცხადებას ავრცელებს - NBA-ს განახლების დრო გაიზარდა

 
#Flashscore