ჩოგბურთი / ATP /
USTA US Open-ის გადადებას არ გამორიცხავს
03/18/2020 17:32
127
  • კორონავირუსის გამო შესაძლოა ამერიკის ღია პირველობაც გადაიდოს
  • USTA ტურნირის შესაძლო გადადებაზე საუბრობს

ამერიკის შეერთებული შტატების ჩოგბურთის ასოცოაცია (USTA) ავრცელებს განცხადებას, სადაც საუბარია US Open-ის შესაძლო გადატანაზე. 

მოგეხსენებათ, გუშინ, 17 მარტს დიდი მუზარადის ტურნირი, საფრანგეთის ღია პირველობა, რომელიც მაისის ბოლოს (24 მაისი - 7 ივნისი) იყო ჩანიშნული კორონავირუსის პანდემიის გამო გადაიდო და 20 სექტემბერიდან 4 ოქტომბრის ჩათვლით გაიმართება.

"ამ ეტაპზე USTA ტურნირის ჩატარების თარიღებთან დაკავშირებით რაიმე ცვლილებეს არ გეგმავს. თუმცა, მოცემული მდგომარეობიდან გამომდინარე, განვიხილავთ სხვადასხვა ვარიანტებს, მათ შორის US Open-ის უფრო გვიან პერიოდზე გადატანის საკითხსაც.

იმ დროს, როცა მთელი მსოფლიო გაერთიანებულია, რა თქმა უნდა ჩვენ არ ვაპირებთ ვიმოქმედოთ ცალმხრივად. ამიტომ USTA მზად არის კონსულტაციები გაიაროს სხვა დიდი მუზარადის ტურნირების ორგანიზატორებთან, WTA, ATP, ITF და სხვა პარტნიორებთან. ასევე, ლეივერის თასის ორგანიზატორებთან", - ვკითხულობთ USTA-ს განცხადებაში.

შეგახსენებთ, რომ ამერიკის შეერთებულ შტატებში ბოლო მონაცემებით COVID-19-ით ინფიცირებულთა რაოდენობა 6 535 შეადგენს. აქედან გარდაცვლილია 116 ადამიანი.

 

ასევე იხილეთ: კორონავირუსის გამო "ინდიან უელსი" აღარ ჩატარდება

 

 

 

#Flashscore