ფეხბურთი / ლა ლიგა /
ბარსას კაპიტნები ხელფასების დაკლებას დასთანხმდნენ
03/22/2020 13:48
201
  • ბარსელონას კაპიტნები ხელფასების დაკლებაზე დასთანხმდნენ
  • კლუბი ხარჯების შემცირებაზე ფიქრობს

კორონავირუსის პანდემიის გამო, ბარსელონას კაპიტნები: ლიონელ მესი, ხერარდ პიკე, სერხიო ბუსკეტსი და სერხი რობერტო მზად არიან ჩემპიონატის განახლებამდე დაკლებული ხელფასები აიღონ.

Mundo Deportivo-ს ცნობით, პარასკევს ბარსელონას ხელმძღვანელების შეკრება გაიმართა, სადაც კლუბის პრეზიდენტმა, ჟოზეპ მარია ბართომეუმ განაცხადა, რომ მას საუბარი ჰქონდა გუნდის კაპიტნებთან ხელფასების შესაძლო კლებაზე სანამ ჩემპიონატში იძულებითი პაუზაა, რაზეც მან ფეხბურთელებისგან დადებითი პასუხი მიიღო.

ბარსელონას წლიური ბიუჯეტის 53% ფეხბურთელების ხელფასებში ეხარჯება. კლუბი კი ყველანაირად ეცდება, რომ შემოსავლების მკვეთრი კლების გამო ხარჯები შეამციროს და მიმდინარე წლისათვის გამოყოფილ თანხას, რომელიც 1,47 მილიარდ ევროს შეადგენს, არ გასცდეს.

ამასთანავე, ბარსელონა რამოდენიმე დღის განმავლობაში მოლაპარაკებებს აწარმოებდა ფიფასთან, უეფასთან, ლა ლიგასთან და სხვა მსხვილ სპორტულ ორგანიზაციებთან, რათა კორონავირუსის პანდემიის პერიოდში ხარჯების შემცირების მიზნით უფლება მიეცეს ფეხბურთელებს ხელფასები დაუკლოს. ასევე, სხვა ტოპ-კლუბებიც იმედოვნებენ, რომ ფიფა და უეფა მათ ხარჯების შემცირებაში ხელს შეუწყობს.

აქვე გეტყვით, რომ ორშაბათს დაგეგმილია კლუბებისა და ლა ლიგის წარმომადგენლების შეხვედრა, სადაც მხარეები შეიმუშავებენ სამოქმედო გეგმას ზარალის წინააღმდეგ, რომელსაც კლუბები განიცდიან.

შეგახსენებთ, რომ COVID-19-ის პანდემიის გამო ესპანეთის ყველა საფეხბურთო ტურნირი დროებით შეჩერებულია. ამ დროისთვის ქვეყანაში ვირუსით ინფიცირებულთა რაოდენობა 25 ათასს აჭარბებს და გარდაცვლილია 1 381 ადამიანი.

 

ასევე იხილეთ: ტორესის სიმბოლურში მესი და რონალდუ ვერ მოხვდნენ

 

 

#Flashscore