ფეხბურთი / ჩემპიონთა ლიგა /
უეფამ ჩემპიონთა ლიგისა და ევროპალიგის ფინალები გაურკვეველი ვადით გადადო
03/24/2020 10:35
144
  • ევროტურნირების ფინალები გადაიდო
  • უეფა ახალ თარიღებზე რამდენიმე დღეში იტყვის

უეფამ კორონავირუსის გამო ჩემპიონთა ლიგისა და ევროპალიგის ფინალების გადადებაზე გადაწყვეტილება საბოლოოდ მიიღო. ასევე გადაიდო ქალთა ჩემპიონთა ლიგის ფინალიც.

აღნიშნული ინფორმაცია უეფას საიტზე გამოქვეყნდა.

როგორც განცხადებაშია ნათქვამი, გამომდინარე იქიდან, რომ კორონავირუსი მსოფლიოს თითქმის ყველა ქვეყანაში კვლავ რჩება დიდ პრობლემად, უეფას ამ გადაწყვეტილების მიღება მოუწია. ჯერჯერობით უცნობია, თუ როდის და რა ფორმატით გაიმართება ფინალები. უეფას განცხადებით, ამაზე რამდენიმე დღეში გახდება ცნობილი.

კორონავირუსი ახლა ყველაზე მეტად სწორედ ევროპის კონტინენტზე მძვინვარებს. მსოფლიოს მაშტაბით კი ვირუსს 150-ზე მეტი ქვეყანა ებრძვის. ჯანდაცვის საერთაშორისო ორგანიზაციამ COVID-19 პანდემიად გამოაცხადა და ამ დრომდე პოზიტიური პროგნოზის გაკეთება ვერ ხერხდება.

შეგახსენებთ, რომ 17 მარტს UEFA-მ ვიდეოკონფერენცია გამართა. გენერალურმა მდივანმა, ჯორჯო მარკეტიმ ასოციაციის 55 წევრ ქვეყანასთან განიხილა, თუ რა ფორმატით უნდა გაგრძელდეს საფეხბურთო შიდა და ევრო ტურნირები. შედეგად, გადაიდო ევროპის ჩემპიონატი, ერთა ლიგის პლეი-ოფის მატჩები... გავრცელდა ინფორმაცია, რომ ჩემპიონთა ლიგის ფინალი 27 ივნისისთვის გადაიდო, ხოლო ევროპალიგის - 24 ივნისისთვის, თუმცა უეფას ახალ თარიღებზე ჯერ არაფერი უთქვამს.

ასევე იხილეთ: ჩემპიონთა ლიგის მატჩი, რომელიც კორონავირუსის გავრცელების მთავარი წყარო გახდა

#Flashscore