ქართული სპორტი / ქართული რაგბი /
ქართველი გულშემატკივრების ყვირილი გაჯიევისთვის სტიმულის მიმცემია
03/24/2020 13:37
157
  • რუსეთის ნაკრების ერთ-ერთმა ლიდერმა საინტერესო განცხადება გააკეთა
  • ტაგირ გაჯიევი საქართველოსაც შეეხო

Rugger.info "დათვების" გამორჩეული წევრის ინტერვიუს ავრცელებს. 25 წლის მესამეხაზელი 2019 წელს რუსეთის საუკეთესო მორაგბედ დასახელდა. მან რაგბი ევროპის მიმდინარე გათამაშების განვლილ შეხვედრებზე და ბორჯღალოსნებთან გადადებულ მატჩზე ისაუბრა.

"ესპანეთთან შეხვედრის პირველი ნახევარი კარგად ჩავატარეთ და შესვენების დროს ვფიქრობდით, რომ მათ მეორე ტაიმშიც ვაჯობებდით, თუმცა ეს ასე არ მოხდა და შესაბამისი შედეგი დაფიქსირდა. იყო მომენტები, როცა შეცდომებს ტაქტიკური თვალსაზრისითაც ვუშვებდით. 

ბელგიის ნაკრებთან თამაში თითქმის არასდროს გვიჭირდა. ჩვენ თავდაჯერებულები ვიყავით და მეტოქე სათანადოდ არ დავაფასეთ. მათ აგრესიული რაგბი შემოგვთავაზეს, რისთვისაც მზად არ ვიყავით. სწორედ ეს გახდა იმის მიზეზი, რომ ბელგიელებმა მიზანს მიაღწიეს.

ჩემს კარიერაში პირველად მოხდა ისე, რომ ჩავედით ქვეყანაში და ამის შემდეგ მატჩი გაუქმდა. ჩვენ უკვე თბილისში ვიყავით, თუმცა შეხვედრა არ შედგა. ამ რაგბი ევროპაზე ტრავმების გამო ბევრი სათამაშო დრო არ მქონია, თუმცა წელს ბევრი უცნაური რამ მოხდა. არაერთ თამაშში დაფიქსირდა საკმაოდ მოულოდნელი შედეგები. ამის შემდეგ კი კორონავირუსის გამო ბოლო ტურის ყველა მატჩი გადაიდო.

ცუდია რომ ასე მოხდა. სპორტსმენები კონკრეტული დაპირისპირებებისთვის დიდი ხნის განმავლობაში ვემზადებით. ტურნირები კი შანსია, რომ სხვებს შენი შესაძლებლობები დაუმტკიცო და როცა ისინი უქმდება, იმედები გიცრუვდება. მე ვეთანხმები იმ მოსაზრებას, რომ არსებულ სიტუაციაში მაყურებლების დაშვება არ უნდა მოხდეს, თუმცა შეხვედრები უნდა იმართებოდეს. ვფიქრობ, უმჯობესი იქნებოდა საქართველოსთან მატჩი ცარიელი ტრიბუნების ფონზე ჩატარებულიყო.

რა თქმა უნდა, გაცილებით საინტერესო იქნებოდა საქართველოსთან გასამართი შეხვედრა სავსე ტრიბუნების ფონზე გამართულიყო, თუმცა ნებისმიერ შემთხვევაში უნდა აღინიშნოს, რომ ძლიერ გუნდთან თამაში ყოველთვის კარგი გამოცდილებაა. 2018 წელს მე თბილისში ვითამაშე და მინდა გითხრათ, რომ მსოფლიო თასზეც კი არ მიმიღია ისეთი ემოციები, როგორიც იმ შეხვედრაში. ქართველი გულშემატკივრები შეუჩერებლად ყვირიან ჩვენს წინააღმდეგ, მაგრამ ეს ხელს სულაც არ გვიშლის. პირიქით, სტიმულს გვაძლევს, რომ მათ გუნდს უკეთესად ვეთამაშოთ. 

ვისურვებდი, რომ სპორტი და პოლიტიკა ერთმანეთში არ ირეოდეს, თუმცა საქართველო - რუსეთის მატჩებზე ისეთი ხალხიც დადის, ვისაც რაგბი არ აინტერესებს და კონკრეტულად ჩვენი ნაკრებისთვის მოდიან. სხვა თამაშებზე კი საერთოდ არ დადიან".

"ჩემი ტრანსფერი კლერმონში პრაქტიკულად შეთანხმებული იყო. მე მათ ყველა ის მონაცემი გავუგზავნე, რაც საჭირო იყო. გუნდს არჩევანი უნდა გაეკეთებინა ჩემსა და ახალზელანდიელ მორაგბეს შორის. როცა კლუბის წარმომადგენელს ვესაუბრე, მითხრა, რომ სჭირდებოდათ ისეთი მოთამაშე, რომელსაც ორ პოზიციაზე შეეძლო ეასპარეზა. მე მათ ვუთხარი, რომ მეორე ხაზში მხოლოდ იმ შემთხვევაში დავდგებოდი თუ სხვა ვარიანტი ფიზიკურად არ იარსებებდა, რადგან 2016 წლის შემდეგ იმ პოზიციაზე აღარ მითამაშია. ჩემი ადგილი მესამე ხაზშია და შესაბამისად არჩევანი ჩემზე არ შეაჩერეს. ამ ეტაპზე ვევეა პადმასკოვიეში ვრჩები, თუმცა სამომავლოდ რამდენიმე ვარიანტს განვიხილავ", – განაცხადა გაჯიევმა.

შეგახსენებთ, რომ რაგბი ევროპის ბოლო ტურის მატჩი საქართველო - რუსეთს შორის კორონავირუსის საფრთხის გამო გადაიდო. თავდაპირველად საქართველოს რაგბის კავშირმა Facebook–ის საშუალებით გაავრცელა ინფორმაცია, რომლის თანახმადაც აღნიშნული შეხვედრა გულშემატკივრების თანდასწრებით უნდა გამართულიყო და ქომაგებს ჰიგიენური და პრევენციული ზომების მიღებისკენ მოუწოდა.

ამის შემდეგ გაირკვა, რომ ეს დაპირისპირება დათქმულ დროს აღარ გაიმართებოდა. რაგბი ევროპამ ბოლო ტურის ყველა შეხვედრა მინიმუმ 15 აპრილამდე გადადო. აღსანიშნავია, რომ ბორჯღალოსნებმა ჩემპიონობა ერთი ტურით ადრე, პორტუგალიასთან მოპოვებული გამარჯვების შემდეგ გაინაღდეს.

ასევე იხილეთ: მამუკა გორგოძის მორიგი აღიარება!

#Flashscore