სხვა / სხვა /
ლერი ხაბელოვი: "მიზანი უცვლელია, განსხვავებული მხოლოდ თარიღია"
03/24/2020 23:03
114
  • ლერი ხაბელოვმა ოლიმპიური გუნდის წევრებსა და კანდიდატებს ფორმის შენარჩუნებისკენ მოუწოდა
  • საქართველოს ეროვნული ოლიმპიური კომიტეტის პრეზიდენტისთვის მიზანი უცვლელია 

საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა ოლიმპიური თამაშების გადადებასთან დაკავშირებით განცხადება გააკეთა:

"საწყენია, რომ ვირუსული პანდემიის გამო, ზაფხულის ოლიმპიური თამაშები გადაიდო. ეს იყო იძულებითი, მაგრამ გარდაუვალი ნაბიჯი, რომელიც საერთაშორისო ოლიმპიურმა კომიტეტმა და იაპონიის მთავრობამ ერთად გადადგეს. სოკ-ისგან და საერთაშორისო ოლიმპიური სპორტული ფედერაციებისაგან დამატებით ოფიციალურ ინფორმაციას ველოდებით.

პირველ რიგში გასარკვევია პანდემიის გამო გადადებლ და ჯერ კიდევ გასამართ სალიცენზიო ტურნირებთან დაკავშირებული საკითხები. ვფიქრობ, უახლოეს პერიოდში შესაბამისი საერთაშორისო უწყებები და შესარჩევი შეჯიბრებების დაგეგმვა-ორგანიზებაზე პასუხისმგებელი პირები შეიკრიბებიან და მნიშვნელოვან გადაწყვეტილებებს მიიღებენ.

ამ უჩვეულო და არაორდინალურ ვითარებაში, ჩვენ ყველა ერთად აღმოვჩნდით. ამ გამოწვევას ადეკვატურად უნდა ვუპასუხოთ. პირველ რიგში მაქსიმალური პასუხისმგებლობით უნდა მოვეკიდოთ ჩვენი ჯანდაცვის ორგანიზაციების და მთავრობის მითითებებს და განკარგულებებს.

ოლიმპიური გუნდის წევრებსა და კანდიდატებს მოვუწოდებ, რომ ფიზიკური ფორმა მაქსიმალურად შეინარჩუნონ და ვარჯიში სახლის პირობებში განაგრძონ. მწვრთნელებისა და სპორტული ექიმების დისტანციური კონსულტაციის მიხედვით, უცილებელი ფიზიკური დატვირთვა მივიღოთ.

ოლიმპიური თამაშები არ გაუქმებულა. ოლიმპიური თამაშები მხოლოდ გადაიდო. ჩვენი საბოლოო მიზანი უცვლელი რჩება - წარმატებული გამოსვლა ტოკიოს ოლიმპიურ თამაშებზე, ახლა უკვე 2021 წელს", - განაცხადა ლერი ხაბელოვმა.

 

წყარო: საქართველოს ეროვნული ოლიმპიური კომიტეტი

 

ასევე იხილეთ: "ოლიმპიადა გადადებულია - ჩვენთვის მთავარი სპორტსმენების უსაფრთხოებაა"

#Flashscore