კალათბურთი / ევროლიგა /
"სეზონის ასე განახლება არ გვსურს" - თოკო მხარს ჯიჯი დატომეს დაუჭერს
03/25/2020 15:07
176
  • კალათბურთელებს სეზონის ასე გაგრძელება არ სურთ
  • თოკო მხარს ჯიჯის უჭერს

როგორც მოგეხსენებათ, მსოფლიოში პანდემია COVID-19 მძვინვარებს. ამის გამო, თითქმის ყველა წამყვანი ლიგა შეჩერებულია, მათ შორისაა ევროლიგა, რომლის მოთამაშეთა ასოციაციის ერთ-ერთი ვიცე-პრეზიდენტი ესპანური ბასკონიას ქართველი კალათბურთელი, თორნიკე შენგელიაა.

ევროლიგის მატჩები არსებული პრობლემის გამო 12 მარტს შეწყდა და წინასწარი ინფორმაციით მატჩები 11 აპრილს უნდა განახლებულიყო, თუმცა არსებულ ვითარებაში ეს თითქმის წარმოუდგენლად მოსჩანს. უნდა აღინიშნოს, რომ სეზონის გაგრძელების წინააღმდეგი, ზემოთ ხსენებული ორგანიზაციაცაა, რომელის პრეზიდენტმა, იტალიელმა ჯიჯი დატომემ (ფენერბაჰჩე) საკმაოდ ვრცელი მიმართვა გაავრცელა.

“ჩვენ გვეუბნებიან, რომ თამაში სავარაუდოდ ცარიელ დარბაზში მოგვიწევს, თუმცა ეს ნიშნავს, რომ პრობლემა ისევ ძალაშია. ჯერ ერთი, რომ კალათბურთი კონტაქტური სპორტია და მეორეც – მაყურებლების გარეშე თამაში ვერანაირ სიამოვნებას გვანიჭებს.

კალათბურთს გულშემატკივრებისთვის და იმ ატმოსფეროსთვის ვთამაშობთ, რომელსაც ისინი ტრიბუნებზე ქმნიან.

ამიტომ ჩვენი აზრით, სეზონი მხოლოდ მაშინ უნდა განახლდეს, როდესაც დარბაზები ხალხით გაივსება და ქვეყნებს შორის გადაადგილება აღდგება.

რაც შეეხება ხელფასებს, ეს სამართლებრივი დავის საკითხია. როგორც კალათბურთელთა ასოციაციის პრეზიდენტი, ამ სიტუაციაში გარკვევას ვცდილობ. მართებული იქნება, თუკი ყველაფერს ევროლიგის ხელმძღვანელობასთან ერთად განვიხილავთ.

თუკი სეზონი ვერ განახლდება და მგონია, რომ სწორედ ასე იქნება, რაღაც შეთანხმებას აუცილებლად უნდა მივაღწიოთ”.

შეგახსენებთ, რომ კორონავირუსისს გამო თითქმის ყველა ლიგა შეჩერებულია, ამ დროის ოფიციალური მონაცემებით, მსოფლიოში COVID-19-ის 422 913 შემთხვევაა დაფიქსირებული, 18 905 პაციენტი გარდაიცვალა, ხოლო 109 143-მა ადამიანმა ვირუსი დაამარცხა.

ასევე იხილეთ: ევრობასკეტი 2022 წელს?! - ბერძნული მედია ამ ვარიანტს უკვე განიხილავს

#Flashscore