ქართული სპორტი / ქართული ფეხბურთი /
"არ გამოვრიცხავ, უეფამ საქართველო-ბელარუსი კიდევ გადადოს"
03/25/2020 16:05
106
  • სფფ-ს გენერალურმა მდივანმა საქართველოსა და ბელარუსის მატჩზე ისაუბრა
  • მუჯირი მატჩის კიდევ ერთხელ გადადებას არ გამორიცხავს

საქართველოს ფეხბურთის ფედერაციის გენერალური მდივანი, დავით მუჯირი დღეს ტვ პირველის ეთერში ჩაერთო და საქართველოსა და ბელარუსის მოახლოებულ მატჩზე ისაუბრა.

შეგახსენებთ, რომ კორონავირუსის გამო უეფამ ერთა ლიგის პლეიოფების მატჩები გადადო. ნახევარფინალური შეხვედრა, საქართველოსა და ბელარუს შორის 2020 წლის ივნისში უნდა გაიმართოს, თუმცა დავით მუჯირის თქმით, ის შესაძლოა კიდევ ერთხელ გადაიდოს.

"კორონავირუსის გამო უეფას ევროპის ჩემპიონატის ერთი წლით გადაწევა მოუწია. საქართველოსა და ბელარუსის მატჩის ჩატარების სავარაუდო თარიღად 4 ივნისი სახელდება. ვემზადებით ამ მატჩისთვის და როგორც უეფა, ჩვენც ოპტიმისტურად ვართ განწყობილები და ვიმედოვნებთ, შევძლებთ მატჩის ჩატარებას.

თუმცა არც იმას გამოვრიცხავ, რომ უეფას მატჩის გადადება კიდევ ერთხელ მოუწიოს. ეს თუ მოხდა, შემდეგ როდის გაიმართება მატჩი, ვერ გეტყვით. ამაზე უკვე უეფასთან ერთად მაისში ვიმსჯელებთ. მატჩი რომ ჩატარდეს, აუცილებელია ფეხბურთელებმა ვარჯიში განაახლონ. მოგეხსენებათ, თითქმის ყველა ჩემპიონატი შეჩერებულია. ჩვენს გარდა პლეი-ოფში კიდევ 15 ნაკრები თამაშობს და მათი ფეხბურთელებიც იმ ჩემპიონატებში თამაშობენ, რომელიც ახლა შეჩერებულია. ასე რომ, უეფას შესაძლოა კიდევ ერთხელ მოუწიოს მატჩის გადადება და ამისთვისაც მზად უნდა ვიყოთ", - თქვა მუჯირმა.

ასევე იხილეთ: ქართველები გააჩერეს, ბელარუსი აგრძელებს | ვინ როგორ მივა პლეი-ოფამდე

#Flashscore