ფეხბურთი / ბუნდესლიგა /
ნოიერი და ბაიერნი ახალ კონტრაქტზე ვერ თანხმდებიან
03/25/2020 19:13
197
  • ბაიერნი ნოიერთან ახალ კონტრაქტზე მოლაპარაკებებს აწარმოებს
  • შეთანხმება ჯერჯერობით მიღწეული არ არის

მიუნხენური კლუბის ნომერ პირველ მეკარეს, არსებული კონტრაქტი 2021 წლის ზაფხულში ეწურება. 33 წლის გერმანელს სურს, რომ ახალი ხელშეკრულება გრძელვადიანი იყოს.

Bild–ის ცნობით, ფეხბურთელის აგენტი კლუბის წარმომადგენლებს ოფისში უკვე შეხვდა, თუმცა მოლაპარაკებების პირველი რაუნდი წარუმატებელი აღმოჩნდა, ვინაიდან "რეკორდმაისტერი" გერმანელ მეკარეს არ სთავაზობს ისეთ პირობებს, როგორსაც ნოიერი და მისი აგენტი ითხოვენ.

მოგახსენებთ, რომ გასული სატრანსფერო ფანჯრის დროს, მიუნხენის ბაიერნმა ოფიციალურ შეთანხმებას მიაღწია შალკეს 23 წლის მეკარესთან, ალექსანდრ ნიუბელთან, რომელიც "რეკორდმაისტერს" ზაფხულში თავისუფალი აგენტის სტატუსით შეუერთდება. ახალგაზრდა მეკარემ თავის მომავალ კლუბთან 5 წლიანი კონტრაქტი გააფორმა.

მანუელ ნოიერი მიუნხენურ კლუბს 2011 წელს სწორედ შალკედან შეუერთდა. მაშინ გერმანიის ყველაზე ტიტულოვან კლუბს მისი შეძენა 30 მილიონი დაუჯდა. მიმდინარე სეზონში მანუელმა 37 მატჩი ჩაატარა და 15 შეხვედრაში კარი მშრალად შეინახა. ჯერჯერობით უცნობია თუ როდის განახლდება მოლაპარაკებები კონტრაქტის გახანგრძლივებასთან დაკავშირებით.

ასევე იხილეთ: ფლიკს სპორტულ დირექტორთან უთანხმოება აქვს

#Flashscore