ფეხბურთი / პრემიერლიგა /
პედრომ წასვლასთან დაკავშირებით მინიშნება გააკეთა
03/26/2020 11:42
108
  • პედროს ჩელსისთან კონტრაქტი ზაფხულამდე აკავშირებს
  • ესპანელი შემტევი გადაწყვეტილებას პანდემიის ჩავლის შემდეგ მიიღებს

ჩელსის შემტევმა, პედრო როდრიგესმა COVID-19-თან დაკავშირებულ მოვლენებსა და ლონდონურ კლუბში თავის ამჟამინდელ მდგომარეობაზე ისაუბრა. ესპანელმა ფეხბურთელმა, ერთ-ერთ ბოლო ინტერვიუში ხაზგასმით აღნიშნა, რომ "არისტოკრატებთან" კონტრაქტი ეწურება:

"ჩელსისთან ჩემი კონტრაქტი იწურება, მაგრამ მიუხედავად ამისა ვთვლი, რომ მსგავს საკითხზე საუბრის შესაფერისი დრო ნამდვილად არ არის.

მომავალზე საუბარი ნაადრევია. პირველ რიგში, ცხოვრება ჩვეულ რიტმს უნდა დაუბრუნდეს და საწვრთნელი პროცესები განახლდეს.

ამჟამად კარანტინში ვართ, რადგანაც ჩვენს ერთ-ერთ ფეხბურთელს კორონავირუსი დაუდგინდა. მოხარული ვარ, რომ ჰადსონ ოდოი ამჟამად თავს კარგად გრძნობს", - განაცხადა პედრომ.

პედრო როდრიგესი ჩელსიში 2015 წლის ზაფხულში, ბარსელონადან 27 მილიონი ევროს სანაცვლოდ გადავიდა. ლონდონური კლუბის მაისურით ჩატარებულ 201 შეხვედრაში, საკუთარ აქტივში 43 გოლი და 28 საგოლე გადაცემა მიითვალა. ესპანელმა შემტევმა "არისტოკრატებთან" ერთად პრემიერ ლიგის, ევროპა ლიგისა და ინგლისის ასოციაციის თასების მოგება მოახერხა.

 

ასევე იხილეთ: ჩელსის ნიკოლას ტალიაფიკოს შეძენა სურს

#Flashscore