კალათბურთი / NBA /
8points9seconds - "ამ სიტუაციაში გოგა ბითაძე ინდიანა პეისერსის მთავარი კოზირია"
03/26/2020 12:24
132
  • ინდიანურმა გამოცემამ ბითაძის ტალანტი შეაფასა
  • მომავალი სეზონი მისთვის გარდამტეხი იქნება

სპორტულმა გამოცემა 8points9seconds-მა, რომელიც ძირითადად ინდიანა პეისერსზე წერს, ქართველ ცენტრ გოგა ბითაძეს, საკმაოდ ვრცელი და საინტერესო ნარკვევი მიუძვნა.

აქ საკმაოდ კარგად არის ახსნილი, თუ რატომ იქნება მომავალი წელი გოგასთვის გარდამტეხი და რა უპირატესობა ექნება მას, პანდემიით გამოწვეული მიზეზის გამო.

"NBA-ს სეზონი გაჩერებულია და მისი მომავალი ბუდნოვანია, ჯერ კიდევ გადასაწყვეტია, რა ბედი ელის დარჩენილ სეზონს, შესაძლოა ის საერთოდ გაუქმდეს, რასაც 2020/21 წლების სეზონზე და NBA-ს დრაფტზე უდიდესი გავლენა ექნება.

დრაფტი გუნდებისთვის სასიცოცხლოდ მნიშვნელოვანი მოვლენაა, კლუბების სკაუტები თვეების განმავლობაში აკვირდებიან ტალანტებს, ხდება პერსონალური მუშაობა, ამას ისინი საკმაოდ დიდ დროს ანდომებენ, სავარაუდო მოთამაშეების სანახავად ქალაქებში და ქვეყნებში დადიან.

ESPN-ის დრაფტის ანალიტიკოსმა და რეპორტიორმა ჯონათან ჯივონიმ სწორად შენიშნა, რომ ეს პროცესი მთლიანად მოშლილია - ტურნირები გაუქმებულია, ქვეყნებს შორის ფრენები არ არის, ყველაფერი კი კორონავირუსის პანდემიის ბრალია.

ინფორმადიის არ არსებობის გამო, შესაძლოა ყველა დროის უცნაური დრაფტი მივიღოთ, რომელიც ყველა მონახაზს თავდაყირა დააყენებს, დიდი ალბათობით, ის ძალიან დაემსგავსება ბრმა არჩევანს. ცნობილი ტალანტებიც კი ნაკლებად შესწავლილები არიან -  რადგან "მიმდინარე" სეზონში ლამელო ბოლმა მხოლოდ 12 თამაში ითამაშა, ჯეიმს ვაისმენმა - 3. 

დიდი ალბათობით, კლუბებმა ტალანტებს ვორქაუთებზეც არ მიიწვევენ. ამის გამო კი შეგვიძლია დავასკვნათ, თუკი ჩვეულებრივ დრაფტს დარტსის თვალახვეულ სროლას ადრიან, 2020 წლის დრაფტიც დარტსის თვალახვეული სროლა იქნება, ოღონდ მას მერე, რაც 10-ჯერ დატრიალდებით.

თუმცა ამის გამო პეისერსი ნაკლებად ინერვიულებს და მშვიდად იქნება, გუნდს "ბრმა" დრაფტზე შეუძლია ზედმეტი არ იფიქროს, რადგან რეზერვში გოგა ბითაძე ჰყავს. შარშან არჩეული ევროპელი ბიგმენი დივიდენდების მოტანას მომავალ სეზონში დაიწყებს.

შესაძლოა, ჯერ კიდევ მიმდინარე სეზონი გოგასთვის ცუდია, ამაზე მისი სტატისტიკაც მეტყველებს - საშუალოდ 3.1 ქულა და 2.0 მოხსნა. მაგრამ ამას ლოგიკური ახსნაც აქვს, პეისერსს ფარქვეშ ორი ვარსკვლავი ჰყავს და გოგას თავის გამოჩენის ნაკლები შანსი აქვს.

ქართველი ახალბედა საშუალოდ მხოლოდ 8.4 წუთს თამაშობდა, ხოლო იმ დროს, როცა გოგას მეტი შანსი ეძლეოდა, ის აუცილებლად იყენებდა. თუ ის მოედანზე საშუალოდ 20-29 წუთს გაატარებს, მისი სტატისტიკა 11.5 ქულა და 6.5 მოხსნა იქნება, რაც საკმაოდ სოლიდური მონაგარია. 

სეზონი შესაძლოა, ცუდი იყო ბითაძისთვის, მაგრამ ახლა პეისერსი მშვიდად იქნება, "ბრმა" დრაფტზე გონების დაძაბვა საჭირო არ არის, გუნდს ჰყავს რეზერვში ბითაძე. პეისერსში უკვე კარგად იციან, როგორი მოთამაშეა ბითაძე და როგორ სწავლობს, მათ ყველაფერი იციან გოგაზე. ასეთ ინფორმაციას პოტენციურ ტალანტზე წლეულს უბრალოდ ვერ მოიპოვებ. 

ყველაფერს რომ თავი დავანებოთ, მალკოლმ ბროგდონის ტრეიდის გამო, პეისერსის პირველი წრის არჩევანი მილუოკის ეკუთვნის. ამიტომაც, ინდიანას  უბრალოდ გოგას ტალანტის განვითარება ესაჭიროება. პეისერსმა ბითაძის აირჩევით კარგი გადაწყვეტილება მიიღო, ეს გუნდს სხვებთან შედარებით უპირატეს პოზიციაში ჩააყენებს. მისი აქციები ამ ვითარებაში მხოლოდ გაიზრდება".

შეგახსენებთ, რომ კორონავირუსის გამო NBA-ს სეზონი დროებით შეჩერებულია, ამ დროის ოფიციალური მონაცემებით, ამერიკის შეერთებულ შტატებში COVID-19-ის 68,489 შემთხვევაა დაფიქსირებული, 1,032 პაციენტი გარდაიცვალა, ხოლო 394-მა ადამიანმა კი ვირუსი დაამარცხა.

 

ასევე იხილეთ: VIDEO | პირველი ნაბიჯები NBA-ში - ექსკლუზიური ინტერვიუ გოგა ბითაძესთან

 
#Flashscore