ქართული სპორტი / ქართული ფეხბურთი /
ჯიმი ტაბიძე რუსეთში ყველაზე პროგრესირებად ფეხბურთელებში შეიყვანეს
04/08/2020 13:48
131
  • საქართველოს ნაკრების მცველი რუსეთში გამოარჩიეს
  • "ამ სეზონში ტაბიძე პრაქტიკულად შეუცვლელ ფეხბურთელად იქცა"

რუსულმა გამოცემა Sovsport.ru-მ რუსეთის პრემიერ ლიგაში მოთამაშე ყველაზე სწრაფად პროგრესირებადი ფეხბურთელების სია შეადგინა.

ყველაზე პროგრესირებად ფეხბურთელებში საქართველოს ეროვნული ნაკრებისა და უფას მცველი, ჯიმი ტაბიძეცაა მოხვედრილი. გამოცემამ ტაბიძე მეოთხე ადგილზე გაიყვანა.

"ქართველი მცველი უფაში 2017 წელს გენტის დუბლებიდან გადმობარგდა და ძირითად შემადგენლობაში ადგილი მალევე დაიმკვიდრა. ჯერ სერგეი სემაკთან, შემდეგ სერგეი ტომაროვთან, დმიტრი კირიჩენკოსთან კი სასტარტოში ადგილი დაკარგა. მიუხედავად ამისა, სპარტაკთან (2:0) გამართულ მატჩში ტაბიძემ თავისთვის უჩველო მარცხენა ფლანგზე ითამაშა და ორი საგოლე გადაცემა გააკეთა.

ქართველის ნიჭი თავიდან ვერც ვადიმ ევსეევმა შეამჩნია და მთელი გაზაფხული სათადარიგოთა სკამზე დასვა. სამაგიროდ, ამ სეზონში ტაბიძე პრაქტიკულად შეუცვლელ ფეხბურთელად იქცა - მან ზენიტთან ორივე მატჩში (1:0, 0:0) ითამაშა, სპარტაკთან საშინაო მატჩშიც (1:0) და ასევე სტუმრად ცსკასთან (0:0).

ერთი წლის განმავლობაში ტაბიძემ ყველა კომპონენტში მოუმატა: მეორე სართულზე ბრძოლაში, ართმევებში, ბურთის ატანასა და ბლოკირებაშიც კი. გარდა ამისა, ის ძალიან კარგია გუნდურ თამაშში, გრძელი გადაცემებით შეტევას კარგად ავითარებს, ხშირად არც თვითონ ერიდება ბურთით მოძრაობას. ის იდეალურად ითავსებს როგორც დაცვით ფუნქციებს, ისე - შემტევს", - წერს გამოცემა ქართველზე.

აღსანიშნავია, რომ ყველაზე პროგრესირებადი ფეხბურთელების სიას სათავეში რუსეთის მოქალაქეობის მქონე ქართველი გიორგი მელქაძე უდგას.

ასევე იხილეთ: სარეკორდო თანხა?! - ტაბიძე უფადან წავა

#Flashscore