რაგბი / მსოფლიო თასი /
ბომონტი იაპონიისთვის მიცემულ პირობას შეასრულებს
05/05/2020 11:11
141
  • იაპონია პირველი დონის ქვეყნებს შორის დაწინაურდება
  • ბილ ბომონტი დანაპირებს შეასრულებს

მოგეხსენებათ, რომ რამდენიმე დღის წინ, მსოფლიო რაგბის პრეზიდენტად, უკვე მეორე ვადით ინგლისელი ბილ ბომონტი აირჩიეს. მართალია, ხმის მიცემის პროცედურა საბოლოოდ ხუთშაბათს დასრულდა და შედეგები 12 მაისს უნდა გამოქვეყნებულიყო, თუმცა ცნობილი გახდა, რომ დამატებითი ტურის გამართვა საჭირო აღარ იქნებოდა, ამიტომ კანდიდატები შეთანხმდნენ და გამარჯვებული ორ მაისს გამოვლინდა.

ბომონტმა აგუსტინ პიშოს ხუთი ხმით მოუგო და მომდევნო ოთხი წლის განმავლობაში მსოფლიო რაგბის პრეზიდენტი იქნება. Nikkei–ის ცნობით, ინგლისელი აპირებს, რომ იაპონიისთვის მიცემული პირობა შეასრულოს და უახლოეს მომავალში "საკურები" პირველი დონის ქვეყნებს შორის დაწინაურდებიან.

ივარაუდება, რომ იაპონიისთვის არგენტინის სცენარი განმეორდება. მოგეხსენებათ, რომ "პუმებმა" პირველი რანგის ქვეყნის სტატუსი 2007 წელს მიიღეს და შემდეგ რაგბი ჩემპიონშიფშიც დაემატნენ. დიდი ალბათობით, "საკურებიც" მსგავსი სიახლის მოლოდინში იქნებიან.

ვრცელდება ინფორმაცია, რომ მომავალში ტერმინი პირველი და მეორე რანგის ქვეყნები ხმარებაში აღარ იქნება და მათ ნაცვლად გამოიყენება "დამკვიდრებული სარაგბო ერი" და "მზარდი სარაგბო ერი".

იაპონიამ 2019 წლის მსოფლიო თასზე შესანიშნავად იასპარეზა. ჯგუფურ ეტაპზე მოიგო ყველა მატჩი. დაამარცხა ისეთი მეტოქეები, როგორებიც არიან ირლანდიისა და შოტლანდიის ნაკრებები. მასპინძლებმა მსოფლიო თასის მეოთხედფინალში პირველად გააღწიეს. მოგახსენებთ, რომ იმ შემთხვევაში თუ იაპონია პირველი დონის სტატუსს მიიღებს, ის გახდება მე–11 ასეთი ქვეყანა.

აზია რაგბიმ არჩევნებში მხარი აუგუსტინ პიშოს დაუჭირა, თუმცა იაპონიის რაგბის კავშირმა ორივე ხმა ბილ ბომონტს მისცა, რითაც ინგლისელს გამარჯვებაში დიდი დახმარება გაუწია. 

აქვე მოგახსენებთ იმასაც, რომ საქართველოს ფავორიტი აღნიშნულ არჩევნებში არგენტინელი კანდიდატი იყო, რადგან ივარაუდებოდა, რომ მისი ხელმძღვანელობის პირობებში ბორჯღალოსნებს ექვსი ერის გათამაშებაში მოხვედრის უფრო მეტი შანსი ექნებოდათ.

ასევე იხილეთ: ბომონტი VS პიშო | ვინ ვის მისცა ხმა?!

#Flashscore