რაგბი / ქართული რაგბი /
"ამის გამო ვიტირო? არა, ასეთი არ ვარ! 200 000-ზე მეტი ადამიანი გარდაიცვალა..."
05/05/2020 14:26
261
  • გორგოძის ინტერვიუ კარიერის დასრულბამდე ერთი კვირით ადრე
  • "მე ასეთი არ ვარ!"

ყველა დროის საუკეთესო ქართველმა მორაგბემ მამუკა გორგოძემ კარიერა დაასრულა, თანაც ისე, რომ მსოფლიო პანდემიის გამო, გამოსამშვიდობებელ მატჩში ვერ ვიხილავთ.

საფრანგეთის რაგბის კავშირმა მთავრობასთან შეთანხმებით მიმდინარე სპორტული ღონისძიებების შეწყვეტის გადაწყვეტილება მიიღო, რაც იმის მანიშნებელია, რომ 35 წლის მორაგბემ ტოპ 14-ში თავისი უკანასკნელი შეხვედრა 2019 წლის 30 ნოემბერს, პოსთან გამართა. მაშინ ის ტრავმამ შეაჩერა, რომელიც ახლა აღარ აწუხებს, მაგრამ საქმეში COVID-19 ჩაერია და მამუკას ბოლო თამაშებით სიამოვნების მიღების შესაძლებლობა არ მოგვცა.

1 კვირის წინ, სანამ გორგოძე კარიერის დასრულებას გადაწყვეტდა, ფრანგულმა გამოცემა rugbyframa.fr-მ ქართველთან ვრცელი ინტერვიუ ჩაწერა. გთავაზობთ რამდენიმე ამონარიდს.

- ტულონთან კონტრაქტი გისრულდებათ. თუ რაგბი აგვისტომდე არ განახლდა, ეს ნიშნავს იმას, რომ ვეღარ ითამაშებთ.
- ეს ჩემი კარიერის ყველაზე საშინელი დასასრული იქნება. რაგბის 16 წელია ვთამაშობ, ყველაფერი მივეცი მას... ახლა კი ერთდროულად ტრავმა და ვირუსი... ეს არაა ის დასასრული, რომელიც წარმომედგინა. ამდენი წელი თამაშობ და შემდეგ ასე მიდიხარ... ახლა ბევრმა ახლობელი დაკარგა, ზოგმა მშობელი. ეს სერიოზულია!

რა უნდა ვუთხრა ამ ხალხს? ვწუხვარ, რომ მოედანზე ვერ გავედი და ბოლო მატჩი ვერ ჩავატარე? ჩემთვის ეს ძალიან მძიმეა, მაგრამ ახლა ამის დრო არაა.

- ანუ კარიერას ასრულებ?
- მინდოდა, სეზონი ჩამემთავრებინა.

- ჩვენ ვფიქრობდით, კიდევ 1-2 სეზონს ითამაშებდით.
- არ მივეკუთვნები იმ კატეგორიას, ვინც კარიერის დასრულების შიშით ახალ კონტრაქტებს ეძებს. თუ ხვალ ვიგრძნობ, რომ კარიერის დასრულების დროა, ამას ვიზამ. ჩემი აზრით, ერთადერთი რამ ნათელია: სეზონი დასრულებულია. ჩემპიონატი ჩემი კონტრაქტის ამოწურვამდე არ განახლდება, ამაში დარწმუნებული ვარ... მაგრამ 200 000-ზე მეტი ადამიანი გარდაიცვალა და მე მხოლოდ იმის გამო ვიტირო, რომ ბოლო მატჩში მოედანი ყვავილებით არ დავტოვე? ასეთი არ ვარ!

ასევე იხილეთ: "გორგოძემ ისე დაანახა ქართველი მოთამაშეების სახე, რომ აქ ძალიან გვენდობიან"

 
#Flashscore